II Petro 1
1
Ku xeweta
1Mina Simoni Petro, nandza ni muapostola wa Yesu Kriste, ndzi tsalela lava nyikiweke ku pfumela loku ringanaka hi xiyimo ni ku pfumela ka hina, hi ku lulama ka loyi a nga Xikwembu ni muponisi wa hina Yesu Kriste, ndzi ri:
2Tintswalo ni ku rhula a swi ve na n'wina swi mi talela, eku tiveni ka Xikwembu ni ka Yesu Hosi ya hina.
Ta ku vitaniwa ni ku hlawuriwa hi Xikwembu
3Hi matimba ya yena ya vukwembu, Kriste ú hi nyikile swilo hinkwaswo leswi swi hi pfunaka ku hanya vutomi bya vukhongeri, hi mhaka ya ku tiva loyi a hi vitaneleke eku kwetsimeni ka yena ne ku sasekeni ka yena ka xiviri. 4Hi ndlela leyi hi nyikiwile switshembiso swa Hosi leswikulu ngopfu, swa risima, leswaku ha swona mi ta kota ku pona eku onhakeni loku nga kona emisaveni hikwalaho ka ku navela loko biha, mi hundzuka lava averiweke vutomi lebyi humaka eka Xikwembu. 5Hikwalaho ka swona sweswo, endlani hi matimba hinkwawo ku seketela ku pfumela ka n'wina hi vunene, vunene byona mi byi seketela hi vutivi, 6mi seketela vutivi hi ku tikhoma, ni ku tikhoma hi ku tiyisela, ni ku tiyisela hi vukhongeri, 7ni vukhongeri hi ku tsakelana ka vuxaka, ni ku tsakelana ka vuxaka hi rirhandzu. 8Hikuva loko mi ri ni swilo leswi, ni loko swi mi talela swi andza, swi ta endla leswaku mi nga phyami kumbe ku pfumala mihandzu, kutani swi ta mi fikisa eku tiveni loku hetisekeke ka Hosi ya hina Yesu Kriste. 9Hikuva loyi a pfumalaka swilo leswi, ú file mahlo, a nga voni kule, naswona wa rivala leswaku ú susiwile swidyoho swa yena swa khale. 10Hikokwalaho, vamakwerhu, hisekelani ngopfu-ngopfu ku tiyisa ku vitaniwa ni ku hlawuriwa ka n'wina, hikuva loko mi endla sweswo a mi nga khuguki mi wa ni siku ni rin'we. 11Hi mukhuva wolowo, mi ta nyikiwa fanelo hinkwayo ya ku nghena eMfun'weni lowu nga heriki wa Hosi ni muponisi wa hina Yesu Kriste.
12Hikokwalaho, hi masiku hinkwawo, ndzi navela ku tshama ndzi ri karhi ndzi mi tsundzuxa timhaka leti, hambileswi mi ti tivaka ni ku tiyisela entiyisweni lowu mi nga na wona. 13Ndzi ehleketa leswaku swi lulamile ku mi pfuxa hi ku mi tsundzuxa swilo leswi, loko ndza ha ri emirini lowu. 14Hikuva ndza swi tiva leswaku ku rhurha ka mina emirini lowu wa mina ku le kusuhi, hilaha Hosi ya hina Yesu Kriste yi ndzi kombeke hakona. 15Kutani ndzi ringeta ku endla leswaku mi tsundzuka timhaka leti minkarhi hinkwayo; mi ta ti anakanya ni loko ndzi ta va ndzi fambile.
Ta lava voneke ku kwetsima ka Yesu hi mahlo
16A hi landzanga mintsheketo yo endliwa hi vutlhari, loko hi mi tivisile ta ku humelela hi matimba ka Hosi ya hina Yesu Kriste; hina hi timbhoni ta vukulukumba bya yena, lebyi hi nga byi vona hi mahlo. 17 Hikuva siku a nga nyikiwa ku dzuneka ni ku twala hi Xikwembu Tatana, rito ri fikile eka yena ri ta hi ku kwetsima loku hlamarisaka, ri ku: “Loyi i N'wananga, loyi ndzi n'wi rhandzaka ni ku n'wi tsakela.” 18Kutani hina hi ri twile rito leri, loko ri huma etilweni, hikuva a hi ri na yena entshaveni leyo hlawuleka. 19Hikokwalaho, rito ra vaprofeta, hina hi ri kuma ri tiyile ku tlula ni khale. Mi ta va mi endla swona loko mi hlayisa swinene rito rero, ku fana ni rivoni leri voningaka lomu ku nga ni munyama, ku fikela loko vurhonga byi tshwuka, ni loko nyeleti ya mixo yi humelela etimbilwini ta n'wina. 20Ehenhla ka hinkwaswo, mi fanela ku twisisa leswaku ku hava marito ya vaprofeta eMatsalweni lawa munhu a nga ma hlamuselaka hi ku tisungulela. 21Hikuva ku hava rito ni rin'we ra vaprofeta leri teke hi ku titwa ka munhu, kambe vanhu lava susumetiweke hi Moya lowo Kwetsima, va vurile leswi humaka eka Xikwembu.
Currently Selected:
II Petro 1: TSO89
Highlight
Share
Copy
Want to have your highlights saved across all your devices? Sign up or sign in
© Bible Society of South Africa 1989. Used with permission. All rights reserved.
