Matiu 21
21
Yisa kɔɔ Jerusalem nan baakir
(Mak 11.1-11; Luk 19.28-40; Jɔɔnn 12.12-19)
1Ba din tan per Jerusalem ki baar Betfej doo nba biak kunkonn nba ki bi yir Olif Tiinii kunkonn na, ki Yisa tun u poorpoweiteeb na ni bannlee u tɔɔnn po, 2ŋaan betib a “I saa man digbanbik nba be i tɔɔnn po na ni. I sa saa la ki bi lor bonnaaŋ nan u bik; ki yin lotib ki baar namm n boor ni na. 3Li-i tee ki sɔɔ boi-i siarie, yin betɔ a i Yomdaanɔe loomm, ki u sa chabi ki yin baar namm.”
4Linba na din tun ki teen nna a lin gbeen linba ki Yennu sɔkinii Aisaya din sɔkin na poe, a
5“Yetir Sion doo teeb a
‘Gotir man, i bat nee baat i boor ni na.
U tee wunba sikint u mɔŋe
ki jak boŋ nba set tee bonbik na paak.’ ”
6Ki Yisa poorpoweiteeb na set din saan ki saa tun nan wa betib biaŋinba na. 7Ki bi din baar nan bonnaaŋ na nan u bik, ki tan jii bi liata ki paan bi bɔɔna paak a Yisa-n jak. 8Ki niib na siab din lat bi tiat sanjouk paak, ki leeb mun chɔɔn tiinii yiinii nan tutuut ki lat sanjouk na paak. 9Ki niburchiauŋ nba din gar u tɔɔnn po nan binba din waa u poorpo ji din yikin ki yeen a “Hosana! I piak man David yaaboonn maŋ. Yennu mɔsonŋann-ii be wunba baat nan ti Yomdaanɔ sann ni na paak. Yii woot man hosana sanpaapo.”
10Wa din tan kɔɔ Jerusalem yoonba, ki doo maŋ niib kur fiir, ki bi boi bi leeb a “Ŋmee na?”
11Ŋanne ki nibur na jiin a “Yisa, wunba tee Yennu sɔkinii nba nyii Nasaret nba be Galilee tingbouŋ ni na.”
Yisa nba ŋamm Yennu jiantu ŋasaakak biaŋinba
(Mak 11.15-19; Luk 19.45-48; Jɔɔnn 2.13-22)
12Ki Yisa din kɔɔ Yennu jiantu ŋasaakak ni ki saa ber nyinn binba kɔi nan binba daa na kura, ki labir chibin likikpenta teebura nan ŋmankɔi teeb kokii ki labir chibin chibin, 13ŋaan betib a “Li sɔb Yennu gbouŋ ni a ŋɔɔ Yennu yet a ‘N ŋaak na sii tee Yenmiaru ŋaake,’ ŋaan yimme kpintir ki teen fatiteeb kinkar boor.”
14Ki jɔɔnii nan wɔbii din baar u boor ni Yennu jiantu ŋasaakak ni, ki u din te ki bi kura paaka. 15Ŋaan Yennu jiantu yudamm nan sennu wannteeb nba din la bakitnauŋ toona nba ki u tun na, ki bia gbat ki waas yikin Yennu jiantu ŋasaakak ni ki yeen a “Hosana! I piak man David yaaboonn na,” ki li donn bi wutoa. 16Ki bi boiɔ a “A gbat ba yeen linba nawa-aa?”
Ki u jiin a “Nn, ŋaan li sɔb Yennu gbouŋ ni a ‘A te ki waas nan sanpantii piaka fanu;’ i ki mi karimii?”
17Ŋanne ki u din nyikib ŋaan nyii Jerusalem ki saan Betani ki saa dɔɔ.
Yisa nba yet kinkaŋ biaŋinba na
(Mak 11.12-14, 20-24)
18La din yent ki Yisa nyii leŋ ki ŋmat Jerusalem. Ki kon saa soorɔ; 19ki u la kinkaŋ, ki li see sanjokpiŋ. Ki u saan ki saa baar a wun pɔɔr kinkana, ki sɔɔ siar kaa kinkaŋ na paaki see faat kuukɔɔe. Ŋanne ki u yet tiik na a “La nyii dinna ki jii saa, a kan mi ki lon lɔɔna.” Li taakpaak ni na, ki tiik na koor.
20U poorpoweiteeb na nba din la nna yoonba, ki li bakitib, ki bi boi bi leeb a “Li teen nlee ki kinkaŋ na taan koor yiama na?”
21Ŋanne ki u jiin ki betib a “Barmɔniie ki n beeri na, li-i tee ki i teen Yennu yada nan barmɔnii ki ki birisɔɔ, i mun sii tuun kaman nan ma tun tiik na biaŋinba nee; ŋaan li ki tee nna kuukɔɔ kaa ki i sa tumi, ŋaan li-i tee ki i bet jɔɔr na gbaa a wun fikit ki saa baa mɔkgbeŋŋir na ni, u sa fikita. 22Siar kur nba ki i sa miar Yennu li po na, li-i tee ki i teen yada a i sa lar, i set sa lawa.”
Nisiab nba boi Yisa u yikoo po biaŋinba
(Mak 11.27-33; Luk 20.1-8)
23Yisa nba din saan ki saa kɔɔ Yennu jiantu ŋasaakak ni ki want niib Yennu maan yoonba na, ki Yennu jiantu yudamm nan tiŋ maŋ ni saakab baar u boor ni, ki tan boiɔ a “Yikoo lannpoe ki a mɔk ki tuun linba na kuri? Ki ŋmee chaba li yikoo?”
24Ki Yisa jiin a “N mun mɔk buboit ki sa boi-i; li-i tee ki i fit ki jiini, n mun sa wanni yikobooru nba ki n dia ki tuun linba na: 25Jɔɔnn wunba daan wuur niib Yennu nyunwuru na, Yennue chabɔ li yikoo amii nisaarikee?”
Ŋanne ki bi ji din faa bi leeb labaar ki yeen a “Ti-i yet a Yennue chabɔ li yikoo, u sa boit a ki bee te ki ti ki teenɔ yada; 26ki ti mun bia tiin niburchiauŋ na jaŋmaanii nan tin yet a ‘Niibe chabɔ li yikoo,’ kimaan sɔɔ kur teen yada nan Jɔɔnn set daan tee Yennu sɔkiniie.” 27Ŋanne ki bi jiin ki bet Yisa a “Ti ki mi.” Ki Yisa mun betib a “Tɔn, n mun kan beti wunba chabin li yikoo ki n tuun linba na.”
Jasɔɔ waas bannlee barjouk
28Li poorpoe ki Yisa din boib a “I dukii nlee linba na po? Jasɔɔ nna mun din mɔk u waas bannlee, ki tan yet wunba tee saakɔɔ po na a ‘N bik, don kpaab ni ki saa ko dinna.’ 29-30Ŋanne ki u bet u baa a u kan doo. Ŋanne ki u baa din nyikɔ ŋaan yet u waarɔ na kaman nan wa bo bet u yɔɔrɔ biaŋinba na. Ki ŋɔɔ ŋanin sak ki jiin a ‘N baa, min sa dowa,’ ŋaan ki ki doo. Li poorpoe ki saakɔɔ na ji tan lebit u dudukit ki doo. ” 31Yisa nba din yimm barjouk maŋ ki gbenn na, ki u ji boi niib na a “Waas bannlee na ni, ŋmee tun u baa loommu?”
Ki bi jiin a “Saakɔɔ po na.”
Ki Yisa betib a “Barmɔniie ki n beeri na, lampogaarteeb nan bonchonchona tan sa dɔŋi Yennu naan ni kɔɔnuwa, 32kimaan Jɔɔnn wunba daan wuur niib Yennu nyunwuru na daan baar i boor ni ki wanni yentinu binbeŋa, ŋaan ki i ki teenɔ yada, ŋaan ki lampogaarteeb nan bonchonchona teenɔ yada. Ya lek la linba na nba kur poorpo, ŋaan i ki lebit i dudukit ki teenɔ yada.”
Toontunna barjouk
(Mak 12.1-12; Luk 20.9-19)
33Ki Yisa bia din betib a “Gbiintir man barjouk leer. Ŋaadaansɔɔ nnee din be ki wuu tilontii u kpaab ni, ŋaan chaan gungouŋ ki lint tiinii maŋ, ki bia gbiir gbiouk nba ki bi tuu sii ŋmaki tilontii maŋ lɔɔna nyun leŋ, ki bia maa sukir leŋ; ŋaan jii kpaab na ki teen toontunna nii ni a bii gorii. Li-i taŋŋi jaŋ nan pɔɔru, bin pɔɔr ki turɔ, ŋaan mun tan pɔɔr bi yar. Li poorpoe ki u din yaat ki saan tinsiak. 34Ki tilɔɔna maŋ punpɔɔr yoo tan baar, ki ŋaadaanɔ na tun u daaba a bin saan toontunna na boor ni a ki saa gaar u tilɔɔna na. 35Ŋaan ki toontunna na din soor u daaba maŋe, ki boo yenɔ bonchiann, ŋaan kpii lɔɔ, ŋaan jaat lɔɔ na mun tana. 36Ŋanne ki u bia ŋamm tun daabileeb, ki bi yab ki gar sinsinn yab na, ki toontunna na bia teemm nna. 37Linba na poorpo ki u ji tun u mɔŋ mɔŋ bijae, ŋaan yeen a ‘N mi nan bi sa baak n bija na.’ 38Ŋaan toontunna na nba din tun ninbinn ki la u bija na ki u baat na, ki bi bet leeb a ‘U fadiirɔe na; ŋaant tin kpiu man, ŋaan ki faar na-n kpant ti yar.’ 39Ki bi din soorɔ ki nyii nanɔ kpaab na kpiŋ po ki saa kpiiu.”
40Yisa nba yin barjouk na ki gbenn na ki u boib a “Li paak, kpadaanɔ maŋ-i tan baari, u sa teen toontunna maŋ nlee?”
41Ŋanne ki bi jiin ki yetɔ a “U sa kpi toontunbiit damm maŋ gbenna, ŋaan bia jii u kpaab maŋ ki tur toontunsiab nba sa sak kii yɔɔ kii teenɔ li lɔɔna li punpɔɔr yoo.”
42Ki Yisa boib a “I daa ki mi karin la sɔb Yennu gbouŋ ni biaŋinba-aa? Li sɔb a
‘Tann nba ki tanmaara yêtɔ na,
ŋanne set tee lɔtik ni tanŋann,
ki ti Yomdaanɔ Yennue teen nna,
ki li teent bakitnauŋ na.’ ”
43Ki Yisa ji betib a “Barmɔniie ki n beeri na, Yennu tan sa gaar u naan i boor ni ki tur nibooru nba sa te ki wun di u naan nyɔɔt. 44Ŋaan wunba tan baa tann maŋ paak, u sa but butee, ŋaan tann maŋ-i baa wunba paak, see ki li nannɔ buk buk nan yon na.”
45Ki Yennu jiantu yudamm nan Farisiinba na nba din gbat barjokit na ki gbenn, ki bi bann nan Yisa yin barjokit na ki denn ŋamme. 46Ki bi ji din loon bin soorɔe, ŋaan tiin niburchiauŋ na jaŋmaanii, kimaan sɔɔ kur din teen yada nan u set tee Yennu sɔkiniie.
Currently Selected:
Matiu 21: BIM
Highlight
Share
Copy
Want to have your highlights saved across all your devices? Sign up or sign in
