Matiu 13

Tanburtɔɔ barjouk

(Mak 4.1-9; Luk 8.4-8)

1Li daar maŋ ki Yisa din nyii ŋaak na ni ki saan ki saa kar mɔkgbeŋŋir kpiŋ. 2Ki niburchiauŋ lakin u boor ni; ŋanne ki u saan kɔɔ kar burgbetir ni, ŋaan ki niburchiauŋ na din see gbingbann. 3Ki u din yimm barjokit bonchiann ki yet a “Jasɔɔ din doo kpaab a wun saa bur dii. 4Wa din buur na ki bonboorii na yenninba din yat baa sanjouk ni, ki nɔɔnii baar ki tan dii. 5Ki leer mun din baa tanpuut paak, siaminba ki tant ki yabi, ki li din pia ki kpaat yiama, kimaan tant ki yab leŋi, 6ŋaan yennu nba din tan toŋ yoonba, ki li jɔɔk. La din ki fit sikin jiina na paak, li kur din kpoe. 7Ki leer mun bia din baa kunkonii ni, ki tan lakin pia ki kpaat, ŋaan ki kunkonii ŋmabirir. 8Ŋaan ki leer mun din baa tinŋaŋ ni, ki nan naanŋauŋ; ki siab nan kobik kobik, ki siab piinnloob loob, ki siab mun piinntataa.

9“Wunba mɔk tuba, wun gbiint!”

Barjokit yinu paak

(Mak 4.10-12; Luk 8.9-10)

10Ŋanne ki Yisa poorpoweiteeb din baar u boor ni ki tan boiɔ a “Bee ki a piak barjokit kuukɔɔ ki teen niib na?”

11Ki u jiin ki betib a “Yimm ŋanin, Yennu chab a yin bann woonin ni barii ki jii jiin u naan po, ŋaan ŋamm ŋanin, u ki chabibi. 12Tɔn, wunba mɔk Yennu bannu, ŋɔɔe sii laat ki pukii ki sii mɔk bonchiann, ŋaan wunba ki mɔki, u sa kɔŋ linba ki u mɔk na gbaa. 13Li paake te ki n yiimm barjokit, kimaan bi goriie, ŋaan ki laati, ki bia gbiae, ŋaan ki bant li paaki. 14Bi binbeŋ na paake te ki Yennu sɔkinii Aisaya nba din sɔkin linba na set tan teen ki gbee nan mɔnii na. U din yet a Yennu yet a

‘Niib maŋ set sa gbat,

ŋaan bi kan bann li paaki.

Bi set sa la,

ŋaan bi kan bann ba la linba maŋ paaki.

15Kimaan niib na yan dɔkin,

bi tuba mun paare,

bi bia mun bi ninbinae,

kimaan bi ki loon bin la siari,

ki bia ki loon bin gbati,

ki bia ki loon a bi yan-n dɔkiti,

ki bia ki loon bin nyik bi biit, ki min tinnibi.’

16“Tɔn, yimm ŋanin, parpeenn tee i yare, kimaan i ninbina laat; parpeenn bia tee i yare, kimaan i tuba gbia maan. 17Ŋaan barmɔniie ki n beeri, Yennu sɔkiniinba nan yentina bonchiann din loon bin la linba ki i laat na, ŋaan din ki laati; ki bia din loon bin gbat labaar nba ki i gbia na, ŋaan din ki gbati.”

Tanburtɔɔ barjouk na paak

(Mak 4.13-20; Luk 8.11-15)

18Ki Yisa din yet u poorpoweiteeb a “Gbiintir man ki bann tanburtɔɔ na barjouk paak. 19Nirɔ-i gbat Yennu naan barŋanii, ŋaan ki bann li paaki, Sintaanii tuu baare ki tan nyinn linba bo kɔɔ li daanɔ par ni maŋ; ŋanne tee bonboorii nba baa sanjouk paak na. 20Bonboorii nba mun baa tanpuut paak na tee kaman nan wunba gbat Yennu maan na, ki gaar yiama nan parpeenn; 21ŋaan ki li daa ki sik u par ni fanu, ki u tuu yabir waaminna; ŋaan ki fara nan muksuk-n baarɔ Yennu maan na paak, u tuu fokee ki lu yiama. 22Bonboorii nba baa kunkonii ni na mun tee kaman nan wunba gbat Yennu maan na, ŋaan ki tingbouŋ na fara nan mɔkint loomm nyakin maan maŋ u par ni, ki li kan nami. 23Ŋaan bonboorii nba baa tinŋaŋ ni na tee kaman nan wunba gbat Yennu maan na, ki bann li paak, ki li tan kpaat ki nan; ki siab nan kobik kobik, siab mun nan piinnloob loob, siab mun bia nan piinntataa nee.”

Dinatimii pianu barjouk

24Ki Yisa bia din yimm barjouk na ki pukin a “Yennu naan tee kaman nan jasɔɔ nba din doo u kpaab ni ki saa bur diboorŋanii, ŋaan ŋmat kun. 25Ki niib tan dɔɔr, ki u dataak saan saa bur dinatimii ki kɔɔn diboorŋanii na ni, ŋaan yaat. 26Dii na nba din tan puk ki ji maar yoonba, ki bi ji bann nan dinatimii be leŋ. 27Ŋanne ki u ŋaatoontunna baar ki tan boiɔ a ‘Chanbaa, diboorŋanii kuukɔɔ kaa ki a daan bur a kpaab na ni-ii? Ŋaan li teen nlee ki dinatimii tan be leŋi?’ 28Ki u betib a u datasɔɔe tun nna. Ki bi boiɔ a ‘Ki a loon tin saan ki saa ŋabir dinatimii maŋii?’ 29Ŋanne ki u jiin a ‘Aaii, kimaan i-i yaa yin ŋabiri, i tan sa kpet ŋabir dimɔniie. 30Li paak, nyikin man ki lii be nan dijaan yoo; ki dijaan yooe ki n tan sa bet dijaan teeb na ki bin chɔɔ dinatimii na sinsinn ki poon ki joo muu; ŋaan kpen nan diŋanii na ki tan wuun n dii sinsoŋ ni.’ ”

Bonboorik barjouk

(Mak 4.30-32; Luk 13.18-19)

31Ki Yisa bia din yimm barjouk na ki pukin a “Yennu naan tee kaman nan kanpotik binn nba ki nirɔ din jii ki bur u kpaab ni, 32ki li waar ki gar bonboorii kur saaka, ŋaan ki li tan pia ki kpaat ki yab tiinii kura, ki tan teen tiwakutuk, ki nɔɔnii baar ki tan tia tiat li yiinii na paak.”

Datiŋ barjouk

(Luk 13.20-21)

33Ki Yisa bia din yimm barjouk na ki pukin a “Yennu naan tee kaman nan datiŋ nba ki poo jii ki ŋmat nan boroboro yon nba yab, ki lin tan miik nan la tuu tan pukir nee.”

Barjokit maŋ yinu paak

(Mak 4.33-34)

34Yisa din yiin barjokite ki piak linba na kura ki teen nibur maŋ. U din ki pak siar ki turib ki li ki tee barjokit ni kaa. 35U tun nnee a linba ki Yennu sɔkiniisɔɔ din sɔkin na, lin teen gbeen, a

“N tan sa yaat n mɔb ki yet nan barjokite,

ki pak fiit wann woonin ni bona nba din woon

ki ki nyii paanu dunia piinu niwa ki tan tuu mɔtana na.”

Dinatimii barjouk na paak

36Ŋanne ki Yisa din nyik nibur maŋ leŋ, ŋaan saan kɔɔ u ŋadɔɔtik ni. Ki u poorpoweiteeb din baar u boor ni ki tan betɔ a “Betirit dinatimii barjouk na paak.”

37Ki u betib a “Min nisaarik Bike tee wunba bur diboorŋanii na. 38Tingbouŋ nae tee kpaab na; ki diboorŋanii na tee Yennu naan ni niib; ŋaan ki dinatimii na mun tee Sintaanii niib. 39Dataak nba bur dinatimii na mun tee Sintaanii; ki dijaan yoo na tee dunia na gbennu yoo; ki dijaanteeb na mun tee Yennu malakanba. 40Biaŋinba ki bi tikir dinatimii na ki joo muu na, nnee ki li tan sii tee dunia gbennu daar. 41Min nisaarik Bik tan sa tun n malakanba ki bin gann nibiit kur nba te ki leeb tuun toonbiit, nan biitdamm kur nba be n yent ni, 42ki lub musaakau ni; leŋe ki niib tan sii fabin mɔn ki junt bi nyana. 43Ŋaan li yoo maŋ, yentina kur tan sii be bi Baa Yennu naan niewa ki nyirii kaman nan yennu nba nyirii na. Wunba mɔk tuba, wun gbiint.

Mɔkint nba bɔr barjouk

44“Yennu naan tee kaman nan mɔkint nba din pii tiŋ ni sɔɔ kpaab ni nee; ki jasɔɔ tan baar la ki ŋamm gbiir tant piinnir, ŋaan saan nan parpeenn ki saa kɔi wa mɔk linba kura, ki jen tan daa kpaab maŋ.

Tuliiat barjouk

45“Tɔn, Yennu naan bia tee kaman nan daakɔɔrɔɔ nba din kak lin loon tuliiat bonŋana a wun daa nee. 46U din saa la yenn ki li daauk paar bonchiann; ki u ŋmat saa kɔi wa mɔk linba kura, ki saan saa daa tuliiat maŋ.

Janlaauŋ barjouk

47“Yennu naan bia tee kaman nan janlaauŋ nba ki bi tuu jii ki lu nyun ni ki soor janbooru booru nee. 48La din gbee yoonba ki bi dat donn gbingbann, ki kar gann janŋanii ki teen chubit ni, ŋaan lu janbiit na. 49Li tan sii tee nnee dunia na gbennu daar; Yennu malakanba tan sa baare ki gann nifoŋamm, ŋaan nyik nibiit. 50Bi tan sa jii nibiit maŋ ki lub musaakau ni. Leŋ maŋewa, ki niib tan sii fabin mɔn ki junt bi nyana.”

Barkperii nan barpaanii po

51Ŋaan ki Yisa boib a “I bann barjokit maŋ kur paakaa?”

Ki bi sak a “Nn.”

52Ki u betib a “Li paak, Yennu sennu wanntɔɔ nba kur tumii n wannu ki jii jiin Yennu naan po ki bann li paak fanu, u tee kaman nan ŋaadaanɔ nba nyint bonkpera nan bonpaana u mɔkint ni nee.”

Biaŋinba ki Nasaret doo ni teeb yêt Yisa

(Mak 6.1-6; Luk 4.16-30)

53Yisa nba din yin barjokit na ki gbenn yoonba, ki u nyii leŋ 54ki kun u mɔŋ mɔŋ doo ni, ki saa want niib Yennu maan bi jiantu diiuk ni. U wannu maŋ din teen niib na bakitnauŋ bonchiann, ki bi boi bi leeb a “Lee ki jɔɔ na la yanbooru na? Lee ki u la paŋ ki tuun bakitnauŋ toonjaana na? 55Waa, kanpinta bik na kaa na-aa? U naa kaa tee Mari na-aa? U waarii kaa tee Jems nan Josef nan Simon nan Judas na-aa? 56U niipoob kaa ki timm nan ŋamm lakin be doo na na-aa? U la bannu na kur lee?” 57Linba na paak bi din ki teenɔ yada.

Ŋanne ki u din betib a “Yennu sɔkinii ki kɔŋŋit nibaakiri, see u mɔŋ mɔŋ doo ni, nan u ŋaateeb boor ni.” 58Li paak, u din ki tun bakitnauŋ toonjaana bonchiann leŋi, kimaan niib maŋ nba ki teenɔ yada na paak.

Currently Selected:

Matiu 13: BIM

Highlight

Copy