Matiu 10

Yisa poorpoweiteeb piik nan bannlee labaar

(Mak 3.13-19; Luk 6.12-16)

1Ki Yisa din tan yiin u poorpoweiteeb piik nan bannlee na, ki tan chabib yikoo a bii nyint narinbiit niib ni; ŋaan ki te ki yiarboorii boorii damm kur-n paak, nan binba ki yiarbiit diab na kura. 2U poorpoweiteeb piik nan bannlee maŋ sanae na: Simon, wunba sann bia din yi Piita na; nan u waarɔ Andru; nan Jems nan u waarɔ Jɔɔnn, binba din tee Sebedee waas na; 3nan Filip nan Batolomiu; nan Tomas, nan Matiu wunba din tee lampogaartɔɔ na; nan Jems wunba din tee Alfeus bik na, nan Tadeus; 4nan Simon wunba din loon ŋamm Juu teeb-ii yen bi mɔŋ na; nan Judas Iskariot wunba din tan nyii Yisa poor na.

Yisa nba din tun u poorpoweiteeb maŋ biaŋinba

(Mak 6.7-13; Luk 9.1-6)

5Ki Yisa din tun u poorpoweiteeb piik nan bannlee maŋ, ŋaan kpaamm a bii mi ki bin saan binba ki tee ŋamm Israel teeb na boor ni, a bii mi ki bin kɔɔ Samaria teeb doi ni, 6a ŋaan bin saan Israel teeb nba tee kaman nan pei nba bot na boor ni kuukɔɔe; 7ŋaan yetib a “Ya saa na, yii mɔɔntir Yennu naan barŋanii, kii yeen a ‘Yennu naan dinu per na,’ 8ki te ki baatib-n paak, kii fiint kpeemm, ki bia te ki gbaata paak, kii bia kii nyint narinbiit niib ni. I gaar yanne, i mun-ii bia kii teen man yann. 9I daa jikit likirii. I mi man ki yin jii kobu gbaa ki teen i likibɔɔrii ni. 10I mi man ki yin jii paka ki saan i sɔnu maŋ; amii liata ŋannlelee, amii ki pir taasaati, amii kii dia patdiakai; kimaan li ŋan ki toontunnɔ-n di u toona ni.

11“Ŋaan digbangbeŋŋa amii digbanbis nbae ni ki i sa kɔɔ, yin boi ki la popeendaanɔ ŋaaka, ki kɔɔ kii be leŋ nan i fiiru daar. 12Ki yoo nba ki i yaa i kɔɔ ŋaak nba ni, yin foont ŋaak maŋ ni teeb fanu. 13Ŋaak maŋ teeb-i tee niburchimm, i parmaasir-n biar ŋaak maŋ teeb paak; ŋaan niburchimm-i kaa leŋi, i parmaasir maŋ bia sa jen i paak na. 14Wunba sa yêt i gaaru ki bia yêt wun gbat i barŋanii mɔɔntii maŋi, yoo nba ki i nyii ŋaak maŋ ni amii doo maŋ ni, yin pit pit i taapant ni tant ki lu bi doo ni. 15Barmɔniie ki n beeri na, daar nba ki Yennu tan sa bu niib buut na, doo maŋ niib tubdatu tan sa gar Sodom teeb nan Gomora teeb yara.

Fara baaru labaar

(Mak 13.9-13; Luk 21.12-17)

16“Gotir man, n tuumi ki i sii tee kaman nan pei nba be kinkata sinsuuk ni. Yii sub man kaman nan walabirii na, ŋaan kii be soonna kaman nan ŋmana na. 17I mi man niib po, kimaan bi tan sa soori saan nani barbuteeb boor ni, ki bia booi bi jiantu diit ni. 18Bi tan sa saan nani tiŋ yudamm nan kpanbara boor ni, ki bin bu i buut, kimaan ya waan na paak; ŋaan i tan sa bet ŋamm nan binba ki tee Juu teeb na n barŋanii. 19Ŋaan bi-i taŋŋi saan nani buut damm boor, i daa te ki li daamiini nan ya sa pak jiin biaŋinba, kimaan li yoo nee ki Yennu Seyeeŋ sa turi mɔbona nba ki i sa pak ki jiinib, 20kimaan li ki tee yimm kaa tan sa paki, ŋaan i Baa Yennu Seyeeŋe tan sii be i ni ki piak.

21“Li yoo maŋ, nirɔ tuu tan sa fikis u mɔŋ mɔŋ ninja ki bin kpiu; ki baanba mun tan sa fikis bi waas ki bin kpib; ki waas mun bia tan sa kɔn nan bi damm ki chabib nan kuun. 22Ki sɔɔ kur tan sii nami kimaan ya waan na paak; ŋaan wunba tan gubin nan fara yoo na joontu tan sa la tinnuwa. 23Bi-i taŋŋi mukisi digban-yenn ni, yin nyi leŋ ki lɔɔr digbanleer ni; ŋaan barmɔniie ki n beeri na, i daa kan fit ki lin ki gbenn Juu teeb digbana kuri, ki min nisaarik Bik poŋ jenna.

24“Tɔn, tumiitɔɔ ki gar u wanntɔɔ; daabir mun bia ki gar u yomdaanɔ. 25Li ŋan ki tumiitɔɔ binbeŋ-ii tee kaman nan u wanntɔɔ binbeŋ na; ki daabir binbeŋ-ii munii tee kaman nan u yomdaanɔ binbeŋ na. Bi-i taŋŋi pur ŋaadaanɔ narinbiit bat Beelsebuli, nlee ki bi ji sii yi u ŋaateebi?”

Ti sa tin ŋmee jaŋmaanii?

(Luk 12.2-7)

26“I daa tiimm jaŋmaanii, kimaan barsai kaa ki be woonin ni ki tan kan woot ki nyi paanu ni, amii ki bɔr ki tan kan nyi paanu ni. 27Linba ki n beeri bunbɔnn ni na, ŋaan nyintir man yeenin ni; ki linba ki n lɔkinii na, nyintir man paanu ni. 28I daa tiin binba sa fit kpi i gbanant, ŋaan kan fit ki kpi i sei; ŋaan i tiin man Yennu wunba sa fit ki biir i gbanant nan i sei kura muu ni na. 29Bi kɔi jinjera bannlee jenjen kuukɔɔe, ŋaan li-i kii tee ti Baa Yennu loommi, bi yenɔkɔɔ kan baa tiŋ ni. 30Yimm ŋanin, Yennu mi i yut kann. 31Li paak, i daa tiin jaŋmaanii, kimaan i mɔk nyɔɔt ki gar jinjera bonchiann.

I nyint a mɔŋ paanu ni nan a tee Yisaweirɔe

(Luk 12.8-9)

32“Wunba nyint u mɔŋ paanu ni niib boor ni nan u tee n weirɔe, nnee ki n mun tan sa nyinnɔ paanu ni n Baa Yennu nba be sanpaapo na boor ni. 33Wunba yaa a u ki tee n weirɔ niib ni, nnee ki n mun tan sa yet a n ki miu n Baa nba be sanpaapo na boor ni.

Bɔkitu labaar

(Luk 12.51-53; 14.26-27)

34“I daa dukii nan n baar nan parmaasir tingbouŋ na teeb paaki; ŋaan n ki baar nan parmaasir kaa, ŋaan n baar nan bɔkitue. 35N baar ma n tan tukin bonjabike nan u baa, bonpobik nan u naa, poo nan u siponaa. 36Nirɔ mɔŋ mɔŋ ŋaateebe tan sii tee u datai.

37“Wunba loon u naa amii u baa ki garin, u ki ŋan nan wun teen n poorpoweitɔɔ; wunba mun bia loon u bija amii u bipoo ki garin, u ki ŋan nan wun teen n poorpoweitɔɔ. 38Wunba ki jii u kuun dapunpunn ki buk ki waami, u ki ŋan nan wun teen n poorpoweitɔɔ. 39Wunba yaa ŋɔɔ dekii u manfoor tan sa kɔŋŋira, ŋaan wunba likin u saaŋmaŋ n paak, u tan sa la u manfoora.

Binba tan sa la paauk labaar

(Mak 9.41)

40“Wunba gaari saauŋ, u gaar mine saauŋ; ki wunba mun bia gaar min saauŋ, u gaar Yennu wunba tumin nee mun biak. 41Wunba gaar Yennu sɔkinii saauŋ nan wa tee Yennu sɔkinii na paaki, u tan sa gaar Yennu sɔkinii nyɔɔta; wunba gaar popeendaanɔ saauŋ nan wa tee popeendaanɔ na paaki, u tan sa gaar popeendaanɔ nyɔɔta. 42Wunba finn nyumaasin waaminna kuukɔɔ ki tur n poorpoweitɔɔ yenɔ nba pɔ i ni gbaa, nan wa tee n poorpoweitɔɔ na paak, barmɔniie ki n beeri na, u tan kan mi kɔŋ li paauko.”

Currently Selected:

Matiu 10: BIM

Highlight

Copy