Toona 17

Tesalonika doo labaar

1Tɔn, ki bi ji din saa ki saa gar Amfipolis nan Apolonia, ki baar Tesalonika. Leŋe ki Juu teeb jiantu diiuk din be. 2Ki Pɔɔl din tan saan kɔɔ leŋ kaman nan wa din tuu kɔɔ ki tuun biaŋinba na. U din jii foon daa ŋanntaae ki kɔɔ leŋ, ki fiitir Yennu gbouŋ, 3ki want binba be leŋ na, ki karin Yennu gbouŋ ni, a lin wann a see ki Yennu Niganntɔɔ Masia na-n di fara ki kpo; ki u kuun poorpo, ki u bia tan sa fiir jen u manfoor ni; a “Yisa nba nee ki n piaki u po, ŋɔɔe tee Yennu Niganntɔɔ Masia maŋ.” 4Ki u din tan pak tunn bi siab yan, ki bi ji baar taan ŋɔɔ nan Sailas po ki waab. Ki Griik teeb bonchiann nba jiantir Yennu na, nan poojaana bonchiann, ki bi mun pukin bi po ki waa Pɔɔl nan Sailas.

5Juu teeb nba din la nna maŋ yoonba, ki bi donn punponn, ki lin ki tikir niyinyeka nba bi na, ki taamm, ki te ki bi muk doo na, ki tan baar kpir Jason ŋaak, ki loon Pɔɔl nan Sailas boor, a bin nyinnib niib ni. 6Ba ki lab yoonba, ki bi soor Jason nan Yisaweilesiab, ki datib baar namm doo na yudamm boor, ŋaan tian yeen a “Niib na lin labii tingbouŋ na ki te ki mukir muk niib, ki mɔtana ki bi tan baar ti doo na, 7ki Jason gaarib u ŋaak ni, ki bi lin ki want niib barsaana ki biir ti kpanbara yudaanɔ Siisa sennu, ki yaa a kpanbarlɔɔe mun be, a ki bi yiu Yisa.” 8Ba yet nna yoonba, ki li daan nibur na nan yudamm na para ni bonchiann. 9Ki yudamm na te ki Jason-nba pa likirii ŋaan ki bi ŋaab.

Berea doo labaar

10Nyiɔk nba tan bɔnn yoonba, ki Yisaweira chab Pɔɔl nan Sailas, ki bi saan Berea, ki saa baar kɔɔ Juu teeb jiantu diiuk ni. 11Leŋ niib yan din kɔɔ Yisa maan maŋ ni ki gar Tesalonika teeb, ki bi set din sak maan na nan bi para kura, ki daa kur ki bi karin Yennu gbouŋ, ki gorii, a bin laan Pɔɔl nba piak linba maŋ, a li set tee mɔnii amii nlee. 12Ŋanne ki siab bonchiann teen yada ki kpint ki teen Yisaweira. Ki Griik poojaana bonchiann nan Griik jab bonchiann mun din teen yada ki kpint ki teen Yisaweira.

13Ŋaan Juu teeb maŋ nba din be Tesalonika na din gbat a Pɔɔl bia mɔɔntir Yennu maan Berea, ki bi baar leŋ, ki pak ki biir Pɔɔl, ki fiin nibur na wutoa, a bin kpirɔ. 14Li taakpaak ni ki Yisaweira na chab Pɔɔl nan binba chiantɔ na, ki bi nyii ki tɔkin sɔnu ki baar mɔkgbeŋŋir na ni, ŋaan ki Sailas nan Timoti ŋarin din biar Berea.

Atens doo labaar

15Niib nba din chiant Pɔɔl na din saan nanɔ kaman nan Atens nawa, ki bi tan yaa bin ŋmat kun, ki Pɔɔl betib a bin saa bet Sailas nan Timoti a ki bin yabir ki baar yian yian na. Ki niib na ji din ŋmat kun Berea.

16Pɔɔl nba din daa be Atens ki guu Sailas nan Timoti na, ki u la doo maŋ ni ki bi maa pata ki senn senn sɔnii ni ki pukiib, ki li din biir u par ni bonchiann. 17Ki u tuu kɔɔ Yenjiantu diiuk ni ki faa labaar nan Juu teeb nan boorganu nba jiantir Yennu na. Ki u bia din tuu saan bi linlakin boor ni daa kur, ki saa faa nan binba baat leŋ na labaar, Yisa barŋanii po. 18Ki saakayandaansiab nna din be, ki bi yi bi yemm Epikurus teeb, ki leeb mun Stoik teeb, ki bi mun tan baar ki faa labaar nan Pɔɔl. Ki bi siab tan pak nan bi leeb a “Barifoouk daanɔ nba want u mɔŋ na mun yeen bee na?” Ki bi yemm jiin a “Li taan tee nan u piak digbangana yennii poe na.” Bi din yet nna maŋ, kimaan Pɔɔl mɔɔntir Yisa po nan u kuunfiiru po.

19Ŋanne ki bi jii Pɔɔl ki baar nanɔ bi saakab tintaankaanu boor nba ki bi din yi Areos Kunkonn na, ŋaan din yet Pɔɔl a “Ti sii loon ki tin bann barsaann nba ki a want na, 20kimaan a piak baryena, ki li tee barsaanniie ti peŋ, ki ti loon ki tin bann li paak.” 21(Atens niib kur nan binba din nyii tinganii ki baar ki be na, ki bi tuu jii bi yoo ki faa labaar, ki bia gbiintir barsaanii nba joont baar na.)

22Tɔn, ki Pɔɔl fiir bi tintaankaanu maŋ ni, ki set bi tɔɔnn, ŋaan yetib a “Atens teeb, n la i benu kur ni ki i loon i pata bonchiann; 23ki ma kak ki lin i doo na, n got i pata, ki bia la binbintir ki li sɔb li paak a ‘Yennu nba ki ti ki miu.’ N loon ki n wanni wunba ki i pukii ki teenɔ ŋaan ki miu na. 24Yennu maŋ, ŋɔɔe din nan dunia nan bont kur nba be li ni. Ŋɔɔe tee sanpaak nan tiŋ Yomdaanɔ, ki ki tee daanɔ nba be pochianfei nba ki niib maa ni kaa. 25Ki nisaarik kan fit tun siar nan u nuu ki turɔ ki lin pukinɔ siari, kimaan ŋɔɔe tee daanɔ nba teen nisaarii kur manfoa nan bona kur. 26Ŋɔɔe mun te ki nibooru kur nyii yeja yenɔkɔɔ ni, ki bia te ki bi be tingbouŋ na kur ni, ki u mɔŋ mɔŋ din senn yoo nba ki nibooru kur sii be, ki bia teen bi binbeboa terii. 27U din teen nna maŋ a bin lomɔ, a ki li pasiari bin turin ki tan nakin bannɔ. Ŋaan ŋɔɔ Yennu set ki fɔk nan ti sɔɔ. 28Nisɔɔ din yet a

‘Li tee Yennu paake ki ti be ki tuun.’

I yandamm pinpakit mun bia lek want nna maŋe a

‘Ti bia tee Yennu waase.’

29Tɔn, timm nba tee Yennu waas na, li ki ŋan ki tin dukin nan Yennu tee kaman nan siara bonninauŋ nba tee sarima amii tann nba ki nirɔ ŋammir nan u yan amii u dudukit ni. 30Yoo nba din gar, ki niib ki mi Yennu na, u din ki jii bi biiti. Ŋaan mɔtana u beer a sɔɔ kur-n nyik u biit, 31kimaan ŋɔɔ Yennu poŋ senn daar nba ki u sa bu tingbouŋ na ŋaateeb kur buut chib chib. U sa te ki sɔɔ nba ki u gannɔ na-n bu buut maŋ, ki u set fiinɔ kuun ni, ki li tee nyinn ki tur sɔɔ kur a ŋɔɔe sii tee barbuurɔ.”

32Ba gbat ki Pɔɔl pak kuunfiiru po na, ki siab laa ki sarikitɔ, ŋaan ki siab mun yaa a “Ti bia loon ki tin ŋamm gbiint linba ki a sa pak nee.” 33Ŋanne ki Pɔɔl din nyii ŋaan nyikib. 34Ki bi siab mun din teen yada ki kpint ki teen Yisaweira. Ki bi ni maŋ, Dionisius din be. Ŋɔɔe din tee daanɔ nba din tuu be Areos Kunkonn tintaankaanu ni. Ki poosɔɔ mun din be bi ni, ki u sann yi Damaris. Ki leeb mun din be ki pukimm.

Currently Selected:

Toona 17: BIM

Highlight

Copy