Toona 14

Ikonium doo labaar

1Pɔɔl nan Banabas nba din baar Ikonium, ki bi saan Juu teeb Yenjiantu diiuk ni, ki mɔɔntir Yisa barŋanii, li paak ki niburchiauŋ teen Yisa yada; bi siab din tee Juu teeb, ki siab mun din tee Griik teeb. 2Ŋaan ki Juu teeb nba din tee nikangbata din biir Yisaweira sann, ki fiin boorganu na wutoa. 3Ki toomiinba na ji din jii yoo bonchiann ki be leŋ, ki ŋammit piak nan parcheenn ki jikit saa ti Yomdaanɔ Yisa po, ki u turib yaak a bii tuun bakitnauŋ toonjaana, ki li din want nan ba piak u ninbatinu po na, li maan maŋ set nyii u boore. 4Ki doo na niib din bɔkit, ki siab din see Juu teeb poor, ki leeb na mun see toomiinba na poor. 5Ŋanne ki Juu teeb nan boorganu na lakin leeb nan bi doo maŋ yudamm, ki dukii a bin teen toomiinba biasin ki jaatib tana; 6ki bi ji tan bann nan bi yaa bin jaatib na, ki bi chiar saan Listra nan Debe, nan digbanbis nba kpia kpia, Likaonia yent ni.

Listra nan Debe doi labaar

7Ba din saa baar leŋ yoonba maŋ, ki bi mɔɔntir Yisa barŋanii. 8Ki jasɔɔ nna din be Listra ki tee wɔbik. Bi din marɔ ki u tee wɔbike, ki ki mi sommi. 9Ki u din tan gbat Pɔɔl mɔɔntii na. Ki Pɔɔl gotɔ sirrr, ki tan bann nan u mɔk yada nba sa la laafiawa. 10Ki u yetɔ sanpaapowa a “Fiit ki set a taa paak.” Ki u tab naat ki fiir ki ji somm.

11Niib na nba din la Pɔɔl nba tun linba maŋ na, ki bi ji piin yikin bi mɔŋ mɔŋ maan ni a “Ti yennii sik ti boor ni ki kpint ki naan nan nisaarii na.” 12Ki bi taan yi Banabas sann a Seus, ki Pɔɔl mun, ki bi yiu a Hemes, kimaan ŋɔɔ din tee barpakirɔ. 13Ki bi yennu Seus tingbandaanɔ nyii pochianfeek ni, (pochianfeek maŋ din see doo na tɔɔnn poe,) ki u tan baar nan naajai nan tipuut doo na tammɔb ni, ki ŋɔɔ nan nibur na tikir a bin mann marouŋ a ki tur toomiinba maŋ.

14Banabas nan Pɔɔl nba din gbat ba yaa bin tun biaŋinba na, ki bi para biir, ki bi pat pat bi liata, ki chiar kɔɔ nibur na ni, ŋaan yikin a 15“Bee ki i tee nna? Ti mun tee nisaariie kaman nan yimm na, ki mɔɔntir Yisa barŋanii, a tin ŋmanti ki yi nyik bon-yana maŋ, ŋaan kii waa manfodaanɔ Yennu, wunba din nan sanpaak nan tiŋ nan mɔkgbeŋŋa nan linba kur be li ni. 16Yaayoo niewa ki u din ŋaan ki nibooru kur din tuun bi yama ni mɔkmɔk nan mɔtana, 17ŋaan yoo kur u tuun bonŋana, ki li set want nan u be; ki u te ki saak nyi sanpaapo ki baa ki teeni, ki bia teeni dii dijaan-yoo, ki gboonti jeet, ki i laat parpeenn.” 18Toomiinba maŋ nba din pak nna maŋ, ŋaan li lek din paar nan bin tia nigbouŋ maŋ ki bi daa mann marouŋ ki teemmi.

19Li poorpoe ki Juu tesiab din nyii Antiok nba be Pisidia tiŋ ni, nan Ikonium, ki baar ki pak tunn nigbouŋ na yan a bin biir Banabas nan Pɔɔl. Ŋanne ki nibur na jaat Pɔɔl tana, ki ji fuurɔ nyinnɔ doo na ni, kimaan bi mi a u kpoe. 20Ki Yisaweira baar ki set lintɔ; ki u tan fiir, ki ŋamm nan ŋɔɔ ŋmat doo na ni biak.

Biaŋinba ki bi ŋmat jen Antiok

Ki li yent sanyiɔk, ki Pɔɔl nan Banabas saan Debe ki saa mɔɔnt Yisa barŋanii na leŋ, 21ki dak niib bonchiann, ki bi teen Yisaweira. Ŋaan ki bi ŋmat saa Listra nan Ikonium nan Antiok nba be Pisidia tiŋ ni na, 22ki ŋammit want Yisaweira u maan, ki cheen bi para doi maŋ ni, ki beerib a “I kpaŋŋii dia i yada maŋ nna man,” ki wantib a “Nan ki tin tan kɔɔ Yennu naan ni na, see ki ti fabir ki dii muksuk bonchiann.” 23Ki doi kur ni ki bi tuu gann Yisaweira saakab, ki din mei Yennu ki lorin mɔi, ki jikit Yisaweira nan bi saakab na ki kubintib bi Yomdaanɔ Yisa nuu ni, wunba ki bi poŋ teenɔ yada na.

24Ba din gar Pisidia digbanbis na poorpoe, ki bi baar Pega nba be Pamfilia tiŋ ni na, 25ki din pak Yisa maan leŋ ki fit lian yen sik Atalia. 26Leŋe ki bi din kɔɔ ŋaruŋ ni, ki ŋmat saan Antiok; ŋaan sɔɔ ki leŋ ki Yisaweira poŋ din teemm Yennu nuu ni a wun sommib bi toonn ni. Ki mɔtana bi tun toonn maŋ ki gbenna.

27Bi baaru Antiok maŋ nie, ki bi tikir Yisaweira na, ki tan betib linba kur ki Yennu tun namm, nan wa loot sɔnu biaŋinba ki tur binba ki tee Juu teeb a bin teen Yisa yada ki teen u weira. 28Ŋaan ki bi ji din biar leŋ ki yukir bonchiann nan Yisaweira maŋ.

Currently Selected:

Toona 14: BIM

Highlight

Copy