Toona 11

1Li yoo na ki Yisa toomiinba nan Yisaweira nba be Judea lokir kur po na din gbat a binba ki tee Juu teeb mun tan sak Yennu maan. 2Li paak, Piita nba din tan doo Jerusalem, ki bisiab nba dukii nan punpotu kpaa talas ki tur Yisaweira kur na din yakii nanɔ, ki betɔ a 3“A saan ki saa be punjook daanɔ ŋaak ni, ki bia taan di namm gbaa.”

4Ŋanne ki Piita piin li pinpiik, ki kat wannib linba kur din teen a 5“N daan be Jɔpa ki mei Yennue ki tan la yerintu, ki bonsiar nna naan nan chinchengbeŋŋir ki nyii sanpaapo, ki bi dia li mɔgbana ŋanna ki sikint n boor ni. 6Ki n dɔɔnt li nɔɔk ni, ki la ti kɔɔt booru booru kur, bonkobitii, bonsosootii, bonfurinkaa nan bonyuyukit kura. 7Ŋanne ki n gbat ki kunkɔr yet a ‘Piita, fiit, ki kpi ki di.’ 8Maa, ‘O! O! O! N Yomdaanɔ, nna kaa. N poŋ ki mi dii ti kɔɔti.’ 9Ki kunkɔr na bia ŋamm ki yet Yendɔuŋ ni a ‘Linba ki Yennu kpintir a li ki kɔɔ, daa yeen a li kɔɔ.’ 10Li daan teen nna ki saa jaŋ taar munntaa, ki bi jiinn donn sanpaapo.

11“Li tonton na ki Siisarea jab banntaa nba ki bi daan tumm n peŋ na baar ŋaak nba ki n be na ni. 12Ŋanne ki Yennu Seyeeŋ betin a n saan namm ki daa birisi. Ki Yisaweira nba be Jɔpa na, bi ni bannloob nba be nna na mun chianin ki saan Siisarea, ki ti kura baar kɔɔ Kɔnelius ŋaak ni. 13Ki u betit biaŋinba ki u la ki malaka baar set u ŋaak ni ki betɔ a ‘Tumin sɔɔ Jɔpa, ki wun saa yiin jɔɔ nba ki bi yiu Simon, ki u sanjɔɔk tee Piita na, 14ki u sa pak maan ki tura, ki fin nan a ŋaateeb kura-n la tinnu.’

15“Tɔn, ma piin maan paku yoonba, ki Yennu Seyeeŋ sik kɔɔ bi ni kaman nan wa din sik kɔɔ ti ni li pinpiik ni biaŋinba na. 16Ŋanne ki n tiar ti Yomdaanɔ Yisa nba din yet a ‘Jɔɔnn ŋarin din wuur niib nan nyume, ŋaan yimm ŋarin sa gbee yent nan Yennu Seyeeŋe.’ 17Tɔn, li-i tee ki Yennu set pib u Seyeeŋ maŋ kaman nan wa mun din pit biaŋinba na, yoo nba ki ti din teen ti Yomdaanɔ Yisa Masia yada naie, ki ŋann n tee ŋmee ki mun sii yaa n tia Yennu ki u daa te ki boorganu tee u niibi?” 18Ba din gbat nna maŋ yoonba, ki bi ji nyik bi kpayakit na, ŋaan donn Yennu sann, ki yeen a “Yennu chab binba ki tee Juu teeb mun a bin nyik bi biit ki teen Yisaweira ki la manfoor nba kaa gbennu.”

Antiok teeb nba teen Yisaweira biaŋinba

19Tɔn, Stiifen kpinu poorpoe ki muksuk din baar Yisaweira paak, ki bi din yat; ki bi siab din yaat ki saan Fonisia, nan Saiprus, nan Antiok, ki din mɔɔntir Yisa maan ki teen Juu teeb kuukɔɔ. 20Ŋaan Yisaweira siab nba din tee Saiprus teeb, nan Sairene teeb na, saan Antiok, ki saa mɔɔntir ti Yomdaanɔ Yisa barŋanii ki teen binba ki tee Juu teebi; 21ki ti Yomdaanɔ paŋ din be namm, ki niib bonchiann din teenɔ yada ki lebit bi binbeŋ ki teen u weira.

22Ki Yisaweira nba din be Jerusalem na gbat labaar maŋ, ki tun Banabas a wun saan Antiok. 23Wa din saa baar leŋ yoonba ki la Yennu nba turib sommir biaŋinba, ki u la parpeenn bonchiann, ki din chee bi para, ki kpaan bi kur kpaanii a bi daa nyikit Yisa weiu. 24Banabas din tee niŋanɔe, ki mantik gbee nan Yennu Seyeeŋ nan yada, ki nigbouŋ bonchiann din teen ti Yomdaanɔ Yisa yada ki teen u weira.

25Ŋanne ki Banabas din saan Tasus, a wun saa got Sɔɔl po. 26Wa saa lau yoonba ki u jen nanɔ Antiok, ki bi din jii binn munn ki taan nan Yisaweira, ki want niib bonchiann Yennu maan. Li din tee Antioko ki bi din sint ki pur Yisaweira a “Kristo teeb.”

27Li yoo dinne ki Yennu sɔkiniinba siab din nyii Jerusalem ki sik Antiok. 28Bi yenɔ sann din yi Agabus, ki Yennu Seyeeŋ nie ki u din fiir ki set ki bunt buntir, ki yet a kon bonchiann tan sa baa tingbouŋ na kur po; ki kon maŋ din set tan baa yoo nba ki Klɔdius din tee kpanbara yudaanɔ na. 29Yoo nba ki Yisaweira din gbat a kon yaa lin baa na, ki bi din dukin dudukit a bi sa tur sommir; ki wunba fit nyann biaŋinba lek, wun tur Yisaweira nba be Judea na. 30Ki bi din teen nna, ki tun Banabas nan Sɔɔl nan likirii na, a bin saa tur Yisaweira saakab Judea tiŋ ni.

Currently Selected:

Toona 11: BIM

Highlight

Copy