Mak 16

Yesu kikyiŋi lɩɩ lewu tɔ

(Matiwu 28:1-8; Luka 24:1-12; Gyɔn 20:1-10)

1Kakɛ fʋʋtɛsa akɛ kamaa tɔ mʋ, Mɛɛrɩ Magidalen yɛ Mɛɛrɩ Gyemisi mu‐nyi yɛ Solome ba bɩya atɔ liifensa mʋ nɩɩ ba sɔɔ mʋ, kɛ ba taa naa sʋswa Yesu kebuni mʋ. 2Lɩɩkaakɛ, nawɔkyɩ kakɛ gyankpaasa akɛ nyenyenfuu, kyɔwɛ maa dan lɩɩ mʋ, nɩɩ ba kʋsʋ bee kpee Yesu kakyan mʋ asɛ. 3Ba maa naa bee kpee ɔkpa tɔ mʋ, nɩɩ ba taasɛ abaa yɛ, “Anɩmʋ ii biti ɔ naa gbiliti kubuu mʋ lɩɩ kakyan mʋ kɔnɔ sa anɛ?” Kpalɩ fɛɛ kubuu mʋ kɩ kyɔ gaa. 4Ba maa kɩɩ mʋ, ba wu fɛɛ kubuu mʋ kɩ tɛɛ wʋla gbiliti kɩ dɛ. 5Nɩɩ ba loo kakyan mʋ tɔ, nɩɩ ba wu kɩyaafɔlɛ kʋ maa bun atɔ fufuli ɔ tɛ kakyan mʋ tɔ gyisa sʋ, nɩɩ bamʋ nkɔlɔ ɩ ŋmaa bamʋ.

6Nɩɩ kɩyaafɔlɛ mʋ yɛ, “Fan man yɛgɛ fanɛ nkɔlɔ ɩ ŋmaa fanɛ. N nyi yɛ Yesu mʋ nɩɩ ɔ lɩɩ Nasareti, mʋ nɩɩ ba da mʋ oyu laasa sʋ mʋ nɩɩ fen biti. Ɔ man bʋ nfɩɩ. O kyiŋi lɩɩ lewu tɔ. Fan kɩɩ, nfɩɩ nɩɩ ba daa taa mʋ yɩla. 7Ɩmʋ sʋ fan natɛ naa tɔwɛ mʋ abɩɩlapʋ mʋ yɛ Pita yɛ, Yesu gyankpaa fanɛ ee kpee Galile. Tʋtɔ nɩɩ fen biti fan wu mʋ fɛɛ kanan mʋ nɩɩ ɔ wʋla tɔwɛ fanɛ mʋ.”

8Nɩɩ ba sɩlɛ lɩɩ kakyan mʋ tɔ lɩɩ fɛɛ kufuu kɩ kɩtaa bamʋ, nɩɩ bɛɛ kyɩkyaa. Ba man tɔwɛ ɔkʋ sɛhn kpalɩ fɛɛ kufuu kɩ maa sʋ bamʋ sʋ.

Yesu Lɛɛ mʋ N‐yɩɩ Kaapʋ mʋ Obuupu

(Matiwu 28:9-10; Gyɔn 20:11-18)

9Yesu maa kʋsʋ lɩɩ lewu tɔ kakɛ fʋʋtɛsa akɛ lɩɩkaakɛ nyenyenfuu mʋ, ɔ daa kɩlɛɛ mʋ n‐yɩɩ nɩn kaapʋ Mɛɛrɩ Magidalen mʋ nɩɩ ɔ gya nbwɩɩ libi asunɔ lɩɩ mʋ tɔ mʋ. 10Nɩɩ o kpee naa tɔwɛ mʋ bɩrɩsa ana mʋ nɩɩ ba bɔɔta tɔ ba tɛ bɛɛ sawʋ mʋ. 11Ba maa nu lɩɩ Magidalen asɛ yɛ Yesu tɛ nkpa tɔ nɩɩ o wu mʋ mʋ, ba man kɔɔlɛ mʋ gyii.

Yesu lɛɛ mʋ n‐yɩɩ kaapʋ abɩɩlapʋ anyɔ kʋ

(Luka 24:13-35)

12Ɩnɩmʋ kamaa mʋ, Yesu taa ɔkpa pʋpwɛ kʋ sʋ lɛɛ mʋ n‐yɩɩ kaapʋ bamʋ tɔ asa anyɔ akʋ mʋ nɩɩ ba naa bee kpee bamʋ kadɛ tɔ. 13Nɩɩ ba bwii ba tɔwɛ abanban mʋ, amaa ba man kɔɔlɛ bamʋ gyii.

Yesu lɛɛ mʋ n‐yɩɩ kaapʋ abɩɩlapʋ kudu ɔkʋ mʋ

(Matiwu 28:16-20; Luka 24:36-49; Gyɔn 20:19-23; Asunpu 1:6-8)

14Ɩnɩmʋ kpini kamaa mʋ, Yesu lɛɛ mʋ n‐yɩɩ kaapʋ mʋ abɩɩlapʋ kudu ɔkʋ mʋ, yɛgɛ ba tɛ bee gyii. Yesu pwɩɩ bamʋ lɩɩ fɛɛ bamʋ nkɔlɔ ɩ maa bʋlʋn gaa, nɩɩ ba man kɔɔlɛ bamʋ nɩɩ ba wu mʋ maa tɛ nkpa tɔ mʋ gyii. 15Nɩɩ Yesu tɔwɛ bamʋ yɛ, “Fan kpee dulinyaa tɔ katɩn kʋmaa naa tɔwɛ asɩn danbɩrasa mʋ sa daadimaadi. 16Ɔkʋmaa mʋ nɩɩ ɔ kɔɔlɛ gyii, nɩɩ ba gyee mʋ Ɩbwaarɛ kekyugyee mʋ, ee biti ɔ nyɛ kamɔlɩgɛ. Amaa ɔkʋmaa mʋ nɩɩ ɔ man kɔɔlɛ gyii mʋ, bee biti ba bun mʋ lewu kʋpwɛ. 17Bamʋ nɩɩ ba kɔɔlɛ gyii mʋ falɛ ɩsɩnkaala ii biti i buu bamʋ. Lɩɩ mɛ kɩtɩɩ tɔ sʋ mʋ, bee biti ba gya nbwɩɩ libi, kɛ ba tɔwɛ ntɔwɛ pʋpwɛ. 18Fɛɛ nɩɩ ba kan kɩtaa anansɛ tɔ abɛɛ ba kan nuu kʋbwɛ gbaa mʋ, ɩ mɛɛ yɛ ɩ waa bamʋ sɛhn. Bee biti ba taa bamʋ abaa gyaga alɔpʋ sʋ kɛ ba nyɛ alanfɩya.”

Ɩbwaarɛ taa mʋ kpee sʋsʋ

(Luka 24:50; Asunpu 1:9-11)

19Ɔnyɩrɩpɛ Yesu maa tɔwɛ bamʋ asɛ lʋwɛ mʋ, nɩɩ Ɩbwaarɛ taa mʋ kpee sʋsʋ naa kyɩna mʋ gyisa sʋ. 20Nɩɩ Yesu abɩɩlapʋ ba kpee katɩn kʋmaa naa tɔwɛ asɩn danbɩrasa mʋ, yɛgɛ Ɔnyɩrɩpɛ Yesu ɔlʋn tii bamʋ sʋ, nɩɩ ba waa adangana, nɩɩ ɩ kaapʋ fɛɛ bamʋ asɩn danbɩrasa katɔwɛ mʋ ɩ gyɛ kesintin.

Currently Selected:

Mak 16: naw

Highlight

Copy