Markus 15

À yinǝ Yesu a ɓadǝm Bilatus

(Matiu 27:1-2,11-19; Luka 23:1-5; Yohana 18:20-38)

1Nǝ dǝmbari ɗiɗyal ka, agbani pǝris andǝ akapana, andǝ amalǝm Nggurcau mala Musa, andǝ amǝɓashi kat, à yì ear amur cau mwashat. À ta bu Yesu, à um nǝi aban Bilatus.

2Bilatus ɗi Yesu ama, “A nda murǝm mala amǝ Yahudi le?”

Yesu eari wi ama, “E, kǝ ndo a ne ka.”

3Agbani pǝris yiu nǝ acau ɗàngɗáng amuri. 4Pǝlǝa Bilatus nyare ɗi ama, “A pa wu nǝ na kuno re? Mana a wu nǝ na amur mǝnia yì acau ɗàngɗáng à kǝ nea a muro ka!” 5Yesu nyare loasǝ kuni ɗǝm ɗang. Gir nî pe Bilatus ndali.

À kasǝi Yesu ɓashi lú

(Matiu 27:15-27; Luka 23:13-25; Yohana 18:39–19:16)

6A koya Lamsan Yalimuru ka, Bilatus kǝ panzǝ pursǝna mwashat mǝnana aɓwana zǝmbǝa ace ka. 7Ɓe pursǝna nakam lullǝi ama Barabbas, à kùrrì acemǝnana yì andǝ aɓea amǝ'candǝmuru ka, à wal lú a pwari zunggǝli mala la. 8Ɓwabunda kutio aban Bilatus, à yì zǝmbǝi wi ama, ɓǝ̀ pak gir mǝnana pakkiyia wia ka.

9Bilatus ɗiban ama, “Wu earce mǝ panzǝa wun Murǝm mala amǝ Yahudi le?” 10Yì ka, sǝlǝna ama, ace mwararǝu sǝ agbani pǝris yiu nǝ Yesu abani.

11Sǝ agbani pǝris soakita ɓwapǝndǝa ama ɓǝa ne Bilatus ɓǝ̀ panzǝ Barabbas a kun Yesu.

12Bilatus pǝlǝa ɗia ama, “Sǝ mana ado mǝ pakki man yì ɓwa wu tunǝki ama murǝm mala amǝ Yahudi ka?”

13A lo gǝu ama, “Gballì a nggun-gangndi!” 14Bilatus ɗia ama, “Ace mana? Ya cauɓikea na pak le?”

À nyare à loasǝ gia kǝrkǝr ama, “Gballì a nggun-gangndi!” 15Sǝ acemǝnana Bilatus earce ama nǝ̀ pwasǝ bumia ka, pǝlǝa panzǝia wia Barabbas. Tsǝa à kwak Yesu, pǝlǝa pea asoje mala amǝ Roma ɓǝa kya gballì a nggun-gangndi.

Asoje oal Yesu

(Matiu 27:27-31; Yohana 19:2-3)

16Asoje um nǝ Yesu a palta a ban-mǝgule mala nggwamna, pǝlǝa à yì rambǝ acili asoje kat. 17À makki wi daura murǝm a rǝì, à marǝ mbulan nǝ zwe, à oasǝi wi a ɓamuri. 18Pǝlǝa à tita tunǝki ama, “Ɓǝ̀ rǝo pwalo, murǝm mala amǝ Yahudi!” 19À walki a ɓamuri nǝ gara. À tapi ntara, à kūndǝo amur ankunia kǝla à nda ban pe wi gulo.

20Anzǝm mǝnana à pangŋǝni wi amǝnia yia agir oalban ngga, à swár daura murǝm mana à oasǝi wi ka, pǝlǝa à turi wi amale yì adaura. Sǝ à pusǝì aban ká gballe.

À gballì Yesu

(Matiu 27:32-44; Luka 23:26-43; Yohana 19:17-27)

21Ɓe ɓwa Sayirin na ban kutio, lullǝi ama Shiman, tar a Alizanda andǝ Rufus,#15:21 Ɓalli gbal aɓa: Rom 16:13. pur nǝ muna-la aban yiu a nggeala. Asoje ci púp ɓǝ̀ twal nggun-gangndi mala Yesu.

22À warinǝ Yesu aban mǝnana à tunǝki ama Golgota, ɓālǝi ama, “Ban mǝnana nda kǝla nkpoula Ɓamuru” ka. 23À pe wi mùr-anap mana à zurǝì andǝ mǝr#15:23 mǝr ka myang rǝ ɓe nggun na à kǝ pangŋǝna ɓuri wal rǝkwanggia nǝi. ka ama ɓǝ̀ nu, sǝ ginǝki.

24Pǝlǝa à gballì amur nggun-gangndi. À ko caca, à gaki agir-nggurǝu male.#15:24 Ɓalli gbal aɓa: Ang 22:18. 25A bu-pwari tongno-nong-ine mala dǝmbari sǝ à gballì. 26Cauɓikea mana à bangŋa ama pak ka, à gilǝì a kuli amuri arǝ nggun-gangndi ama: “MURƏM MALA AMƏ YAHUDI” 27-28À gballì a tarǝia andǝ amǝ'ɓǝmbǝriban ɓari, man a bui mǝli sǝ man a bui mǝnggare.#15:27-28 Aɓea malǝmce mǝnana à gilǝia nǝ bu ka à tsǝk mǝsǝì 28 ama, “Anggo ka lumsǝ cau ɓa Malǝmce mǝnana ama, ‘À oasǝi aɓalǝ amǝ'cauɓikea’ ka.” #15:27-28 Ɓalli gbal aɓa: Isha 53:12.

29Aɓwana, amǝgya kutio kǝ sanggì, à kǝ piki muria, à kǝ na ama, “Kui! We ɓwa mǝnana a nǝ arki Ndàmǝgule mala Ɓakuli, sǝ a nǝ ɓe aɓa nongŋo tārú ka.#15:29 Ɓalli gbal aɓa: Ang 22:7; 109:25; Mar 14:58; Yoh 2:19. 30Sulǝî mur nggun-gangndi, amsǝ ɓamuro!”

31Ana gbal sǝ agbani pǝris andǝ amalǝm Nggurcau mala Musa, à kǝ nakia rǝia akun oalban arǝ Yesu ama, “Amsǝ aɓwana, sǝ gandǝ amsǝ ɓamuri ɗang! 32Ɓǝ̀ yì nda Kǝrǝsti, Murǝm mala amǝ Isǝrayila ka, ɓǝ̀ sulǝi mur nggun-gangndi adyan! Ɓǝ̀ sǝm sǝni, sǝ sǝm nǝ̀ paɓamur sǝm abani.” Aɓwana mǝnana à gballia andǝia ka, yia gbal ka à sanggì.

Lú mala Yesu

(Matiu 27:45-56; Luka 23:44-49; Yohana 19:28-30)

33Lang pwari zǝkina ka, pǝndǝa yi gir ban kat bwal bu-pwari tārú mala pwarikpǝra. 34Nǝ bu-pwari tārú mala pwarikpǝra ka, Yesu mǝn kuni bang ama, “Eloi, Eloi, lama sabatani?” Ɓālǝi ama, “Ɓakuli mem, Ɓakuli mem, palang sǝ a turam nzǝmo?”#15:34 Ɓalli gbal aɓa: Ang 22:1.

35Lang aɓea aɓwana mana à cam abanì, à oe ka, à na ama, “Wu oe, nda ban tunǝki Iliya.” 36Ɓe ɓwa ɓangŋa kya par soso aɓa mur-anap mǝhangŋe, sǝ ci a kun tondong, pǝlǝa lǝmndǝì Yesu ama ɓǝ̀ nu. Pǝlǝa ɓwe bangŋa ama, “Ɗeki, sǝm nǝ̀ sǝni, yakǝla Iliya nǝ̀ yiu nǝ̀ yia sulǝi.”#15:36 Ɓalli gbal aɓa: Ang 69:21. 37Yesu mak'zwalo bang-bang, pǝlǝa yilǝmi puro.

38Kara lagir mǝtangŋe mǝnana à kasǝna ban mǝfele nǝi, mana aɓa Ndàmǝgule mala Ɓakuli ka, san aɓalǝu ɓari, twal a kuli yi zur a nzali.#15:38 Ɓalli gbal aɓa: Pur 26:31-33.

39Ɓwamǝgule mala asoje mǝnana came pǝlǝ ɓamǝsǝi nǝ ban Yesu ka, lang ok ɓua mala Yesu, sǝ sǝn wu male ka, bangŋa ama, “Ɓafo, mǝnia yì ɓwa ka, Muna mala Ɓakuli na!”

40Aɓea amamǝna cam abanì zak, à kǝ sǝnban. Maryamu Ɓwa Magdala, Maryamu nggea Jemis mǝkyauwe andǝ Yisǝfu, sǝ Salomi à nda aɓalǝ amamǝne.#15:40 Ɓalli gbal aɓa: Luk 8:2,3. 41A Galili ka, amǝnia yia amamǝna ka, à nda à pakki Yesu gbasha ka. Aɓea amamǝna mǝnana à yiu a tarǝia a Urǝshalima ka à ndakam gbal.

Tsǝkban mala Yesu

(Matiu 27:57-61; Luka 23:50-56; Yohana 19:38-42)

42Agir mǝnia ka, à yì pa a pwari Jumma, mǝnana nda pwari gilǝrǝu ace pwari Sabbat, pwari usǝlǝo ka, nǝ pwarikpǝre. 43Yisǝfu ɓwa Arimatiya, mana nda aɓalǝ amǝkurcau mala amǝ Yahudi, sǝ yì nǝ ɓamuri ka, ndaban kundǝ yiu mala domurǝm mala Ɓakuli ka, wario nǝ mǝsǝkang-kangŋa aban Bilatus, kya zǝm lú Yesu.

44Lang Bilatus ongŋǝna ama Yesu wuna ka, gir nî pe wi ndali. Pǝlǝa tunǝ ɓwamǝgule mala asoje ɗi ko Yesu wuna. 45Lang ongŋǝna a kun ɓwamǝgule mala asoje ama Yesu wuna ka, pǝlǝa pe Yisǝfu lú Yesu.

46Yisǝfu pǝlǝa kúr anggurbyau tsǝkban, yiu yi sulǝ lú, marǝki nǝ anggurbyau, sǝ ci a ɓembe mǝnana à tǝmi a bum tali ka. Ramta tali girna kuni nǝi. 47Maryamu Ɓwa Magdala andǝ Maryamu nggea Yisǝfu sǝn ban mǝnana à ci kam ngga.

Currently Selected:

Markus 15: mbu

Highlight

Copy