Markus 13

Agir-ndali mala masǝlǝata doɓanza andǝ tanni

(Matiu 24:1-14; Luka 21:5-19)

1Lang Yesu na aban puri ɓa Ndàmǝgule mala Ɓakuli ka, ɓeɓwa ata alaggana male ne wi ama, “Malǝm, sǝn sǝlǝcame andǝ gulo mala ɓah mǝnia! Sǝn ɓoarjam mala anggea tali mǝnana à ɓe nǝi ka!”

2Yesu ear ama, “Wu sǝn aɓah mǝgulke mǝnia ka re? À nǝ̀ yia arkia kat à nǝ̀ sukkia a nzali. Kǝ ɓe tali pà kàm mǝnana nǝ̀ nongŋo amur ɓi ka ɗang!”

3Nǝ nzǝmo, lang Yesu dumǝna amur Nkono Olif, mǝnana ɓangŋaban na gau nrea andǝ Ndàmǝgule mala Ɓakuli ka, Bitǝrus, andǝ Jemis, andǝ Yohana, sǝ Andǝru, à yiu abani nǝmurǝì sǝ à ɗi cau. 4À na ama, “Bangga sǝm, aya pwari sǝ amǝnia yì agir ka à nǝ̀ pa? Sǝ mana nda gir'lǝmndǝa ama amǝnia yia agir kat ka à malá à nǝ̀ lumsǝo?”

5Yesu nea wia ama:

Wu tsǝk kir wun ɓǝ̀ kǝɓwa ɓǝ̀ kǝa ɓosǝki wun ɗang. 6Aɓwana pas nǝ̀ yiu à nǝ̀ nggǝ bangŋa ama, “Mǝ nda Kǝrǝsti.” À nǝ̀ pakturo nǝ lullǝam à nǝ̀ ɓosǝki aɓwana pas.

7 Ɓǝ̀ wu ok ce a'lwa ko na'ongŋale amur cau mala a'lwa ka, ɓǝ̀ ɓalǝ wun ɓǝ̀ kǝa kasǝki ɗang. Amǝnia yì agir ka dumǝna púp à nǝ̀ pa, sǝ masǝlǝata ɓanza ka nda peatu, nǝ̀ yiu. 8Ɓe kun nǝ̀ lo nǝ lwa arǝ ɓe kun, sǝ nzalimurǝm nǝ̀ lo nǝ lwa arǝ ɓe nzalimurǝm. Dǝurǝo mala nzali nǝ̀ pa arǝ aban ɗàngɗáng aɓa ɓanza, sǝ nzala gbal ka nǝ̀ kpa. Sǝa ma, amǝnia ka tita gir'murmwana na peatu.

9 Wu do nǝ yal ɓamur rǝ wun! À nǝ̀ oasǝki mur wun aban amǝ ɓashi, à nǝ̀ kwak wun arǝ andakpapi. Sǝ acemǝnana wu nda ka amǝ kpatam ngga, à nǝ̀ kánǝ wun a ɓashi a ɓadǝmbǝa anggwamna andǝ amurǝma. Aɓa mǝno anggo ka wu nǝ̀ kumo wu nǝ̀ duk amǝ'nakunam abania. 10Sǝ Cau Amsǝban ngga, nda gir mana dumǝna púp à nǝ̀ hamnǝi atadǝmbe arǝ anzali kat ka.

11 Sǝ ɓǝa bwal wun, à warinǝ wun aɓa ɓashi ka, ɓǝ̀ ɓalǝ wun ɓǝ̀ kǝa akdǝmbǝa kasǝkya arǝ cau mǝnana wu nǝ̀ na ka ɗang. Kǝ cau mǝnana à nǝ̀ pa wun a ɓabum wun àkǝ̀ banì ka, nda wu nǝ̀ na ka. Acemǝnana wu nda wu nǝ̀ na ce ka ɗang, Bangŋo Mǝfele na. # 13:11 Ɓalli gbal aɓa: Mat 10:17-20; Luk 12:11,12.

12 Mǝ'eambǝu nǝ̀ pà mǝ'eambǝi ɓǝa wal-luí. Tarrû nǝ̀ pà muni. Amuna nǝ̀ lo arǝ atárria andǝ anggea à nǝ̀ tsǝa ɓǝa wal-luia mak. 13Ɓwapǝndǝa kat nǝ̀ ɓinǝmǝsǝ wun acemǝnana wu ndaka amǝ kpatam ngga, sǝ ɓwa mana shak minǝì kàngkàng, aɓa guli a rǝam aban ká a masǝlǝate ka, ɓwe nǝ̀ auwa.#13:13 Ɓalli gbal aɓa: Mat 10:22.

Nggea tanni mǝgule

(Matiu 24:15-18; Luka 21:20-24)

14 A pwari mǝno ka ɓǝ̀ wu sǝna “yì gir mɓeami mǝnana nǝ̀ yinǝ pǝndǝkea mala Ndàperi, sǝ nǝ̀ tsǝa aɓwana nǝ̀ ginǝki kutio kam,” # 13:14 Ɓalli gbal aɓa: Dan 9:27; 11:31; 12:11. yi kutina camǝna aban mǝfele, ban mana ɓoaro ɓǝ̀ came abanì raka, mǝ ɓalgir ka ɓǝ̀ sǝlǝa! Aɓwana mana à ndanǝ do a nzali Yahudi ka, ɓǝa ɓangŋa ɓǝa o amur ankono. 15Ɓwa mǝnana amur kurǝm male ka, ɓǝ̀ sulǝ ka, ɓǝ̀ kǝa na ama nǝ̀ kuti a ɓala nǝ̀ twal kǝgir sǝ nǝ̀ ɓang ɗang. 16Ɓwa mǝnana nda a ɓabondo ka, ɓǝ̀ kǝa nyare ama nǝ̀ twal nggea-daura male ɗang.#13:16 Ɓalli gbal aɓa: Luk 17:31. 17Caukwanban na, aɓalǝ anonggeo mǝno, nǝ amamǝna mana nǝ amuna a bumia andǝ amǝnana nǝ amuna a kun kiura ka! 18Wu pak hiwi ama amǝnia yia agir ka ɓǝa kǝa pak nǝ kun mbulo ɗang. 19Acemǝnana amǝno yia anongge ka, a mala tanni na kǝrkǝr mǝnana ulangyi pà kàm àkǝ̀ baku raka, twalo a shareta ɓanza mǝnana Ɓakuli pusǝna ɓanza ka, yi bwal ado mǝno ka, sǝ à pà nǝ̀ kum ulangyi gbal a dǝmbǝa ɗang. 20Ɓǝ̀ Mǝtalabangŋo kasǝ ma acilia nonggeo mǝno raka, kǝɓwa pà kàm nǝ̀ au ɗang. Sǝ ace aɓwana male mana tarkia nǝ nggearǝì ka, amsǝna acili anongge.

21 Aɓalǝ amǝno yia apwari ka, ɓǝ̀ ɓwa bangga wun ama, “Wu sǝni, Kǝrǝsti nia ka!” Ko, “Wu sǝni, ndako ka!” Wu kǝa ear ɗang. 22Acemǝnana akǝrǝsti mǝ'nyirì andǝ amǝ'ɓangna mǝ'nyirì à nǝ̀ purkio, à nǝ̀ pakki agir-lǝmndǝa andǝ agir-ndǝlǝki ɗàngɗáng, ace ɓosǝki aɓwana mǝnana Ɓakuli tarkia ka, ɓǝa à nǝ̀ gandǝi ka. 23Ace mani ka, wu tsǝkir wun, ǝn angŋa dǝmbǝa ǝn bangŋǝna wun kaniama ɓǝa pa.

Nyare yiu mala Muna mala Ɓwa

(Matiu 24:29-35; Luka 21:25-38)

24 Aɓalǝ amǝno yia anonggeo anzǝm nggea tanni ka,

À nǝ̀ kongsǝ pwari aɓa pǝndǝa.

Sǝ zongŋo ka pà nǝ̀ ta ɗang. # 13:24 Ɓalli gbal aɓa: Isha 13:10; Ezǝk 32:7; Jol 2:10,31; 3:15; Sǝn 6:12.

25 Anlero nǝ̀ pur a kuli

à nǝ̀ sukkio.

Agir mǝgulke mǝnana a kuli ka, # 13:25 Agir mǝgulke mǝnana a kuli ka : A nza mana a pwaryan ngga aɓwana twali ama anlero mana a kuli ka à ndanǝ abangŋo mana à kǝ lǝmndǝ rǝcandǝa amur agir mana à kǝ kumban a ɓanza ka.

à nǝ̀ dǝurǝkya. # 13:25 Ɓalli gbal aɓa: Isha 34:4; Sǝn 6:13; Jol 2:10.

26 A nzǝm mǝno ka sǝ ɓwapǝndǝa nǝ̀ sǝn Muna mala Ɓwa aban yiu aɓalǝ apǝrɓang nǝ rǝcandǝa mǝgule andǝ ɓoarɓwa. # 13:26 Ɓalli gbal aɓa: Dan 7:13; Sǝn 1:7. 27Sǝ nǝ̀ tasǝ amǝturonjar male ɓǝa yi ramnggi aɓwana male mǝnana tarkia ka aɓa ɓanza kat; nǝ takuli, nǝ njarnzali, nǝ njartamur, sǝ nǝ njarnza, arǝ aban kat, aban ká a nzong kun ɓanza andǝ kuli.

Kanicau arǝ nggun vwari

(Matiu 24:32-35; Luka 21:29-33)

28 Wu kànì gir arǝ nggun vwari. Ɓǝ̀ ambui tinata pǝlǝ pwale sǝ à nǝ̀ nggǝ to lolloapì ambui ka, wu sǝlǝ ama mbulo malanǝ sulǝo. 29Ana gbal ɓǝ̀ wu sǝn amǝnia yia agir à nǝ̀ nggǝ pakki ka, wu sǝlǝ ama yiu mem gbashina, nda a nggearǝ kunɓala. 30Ən nggǝ bangga wun ɓafo, nza man ngga, pà nǝ̀ kuti ɗang, she ɓǝ̀ amǝnia yia agir pangŋǝna ka. 31Nzali andǝ kuli ka tea nǝ̀ malâ, sǝ cau mem ngga te pà nǝ̀ mal ɗang.

Wu dum nǝ gilǝkirǝu

(Matiu 24:36-44; Luka 21:26-34)

32 Kǝ ɓwa surǝ pwari ko bu-pwari mǝnana agir mǝnia nǝ̀ ngga pang nǝi ka ɗang. Amǝturonjar mǝnana a kuli gbal ka, à surǝì ɗang. Nggearǝ mim Muna mala Ɓakuli ka, ǝn surǝì ɗang. Kǝ Tárram nǝmurǝì nda mana sǝlǝ ka. # 13:32 Ɓalli gbal aɓa: Mat 24:36 . 33Wu do aɓa gilǝrǝu, wu dum nǝ mǝsǝ wun; acemǝnana wu surǝ pwari mǝnana bu-pwari mǝno nǝ̀ yiu nǝi ka ɗang. 34Yiu mala Muna mala Ɓwa ka à nǝ̀ kànì arǝ ɓwa mǝnana lo nǝ̀ o a bǝri ka. Nǝ̀ ɗeki ɓala ka, nying turo a bu aguro male, koyan ngga nǝ turo mǝnana nǝ̀ nggǝ pak ka. Sǝ ne mǝyal kunɓala ɓǝ̀ kundǝmur nyare male.#13:34 Ɓalli gbal aɓa: Luk 12:36-38. 35Ace mani ka, wu do aɓa gilǝrǝu, acemǝnana wu surǝ pwari mǝnana Mǝtala ɓala nǝ̀ nyar nǝi ka ɗang. Ko nǝ pwarikpana, ko nǝ ɓadu, ko nǝ ɓua mala nggu, ko nǝ dǝmbari. 36Sǝ ɓǝ̀ yiu nǝ gya yasǝlǝban ngga, ɓǝ̀ kǝa kum wun a ntulo ɗang. 37Mǝ ndarǝ na wun cau mana ǝn nggǝ ne koyana le ka, wu dum nǝ mǝsǝ wun aɓa gilǝrǝu!

Currently Selected:

Markus 13: mbu

Highlight

Copy