Markus 11

Aɓwana gingsǝ Yesu nǝ ɓwangsǝban a Urǝshalima

(Matiu 21:1-11; Luka 19:28-40; Yohana 12:12-19)

1Lang Yesu andǝ alaggana male mala à nǝ̀ bik Urǝshalima ka, à yì bwal ban ala Betafaji andǝ Betani, amur Nkono mala anggun Olif. Yesu tasǝ ɓari aɓalǝ alaggana male, 2nea wia ama, “Wu kyane a muna-la mǝnana a dǝm wun ngga. Wu nǝ̀ kuti kam ani ka, wu nǝ̀ kum mǝndambǝritso mǝnana kǝɓwa malaká eau a nzǝmi raka. Wu panzǝi wu yiu nǝi kani. 3Ɓǝ̀ kǝɓwa ɗi wun ama palang sǝ wu kǝ panzǝi le ka, wu ne wi ama, ‘Ɓwamǝgule ma'sǝm kǝ earce. Banì pà nǝ̀ sau ɗang nǝ̀ nyesǝi.’ ”

4Pǝlǝa alaggana mǝnia ɓari ka à wario à kya kum mǝndambǝritso à kùrni a kun ɓala a girǝi njargula. 5À nda ban panzǝe ka, aɓea aɓwana mǝnana à ndakam aban came ka, à ɗiban ama, “Mana wu pakkiyia, wu nda ban panzǝ mǝndambǝritso mǝna?” 6Pǝlǝa à nyesǝia wia cau kǝla mǝnana Yesu nea wia ka. Pǝlǝa à nyinggia wia mǝndambǝritso, à um nǝi.

7Lang à yina nǝ mǝndambǝritso aban Yesu ka, à makki adaura malea a nzǝmi, pǝlǝa Yesu eauwe do amuri.

8Aɓwana pas ata ɓwabunda sarǝki adaura malea a tanjargula, sǝ aɓea ɓwana ka, malea ka ambu ka nggun na à kasǝkya, à sarǝkia a tanjargula ka.

9Aɓwana mǝnana a ɓadǝm Yesu andǝ aɓwana mǝnana a nzǝmi aban ká ka, à loasǝ gia ama,

“Wu ɓwangsǝ Ɓakuli!

Tsǝkbu ɓǝ do amur ɓwa

mana kǝ yiu aɓa

lullǝ Mǝtalabangŋo ka!#11:9 Ɓalli gbal aɓa: Ang 118:25,26.

10Ɓǝ̀ tsǝkbu do amur domurǝm

mana kǝ yiu,

mala kà-sǝm Dauda ka!

Ɓwangsǝban aban Ɓakuli

kano a kuli!”

11Anggo sǝ Yesu kutio aɓa Urǝshalima, pǝlǝa wario aɓa Ndàmǝgule mala Ɓakuli. Loasǝ mǝsǝì sǝn koman ngga, sǝ acemǝnana pwari kutina ka, pǝlǝ kusǝì puro, o a Betani andǝ alaggana male mana lum nong-ɓari ka.

Yesu sú nggun vwari

(Matiu 21:18-22)

12Ban fa ka, à nying Betani à nyare a Urǝshalima. Yesu ka ok nzala. 13Lang nǝ̀ sǝn nggun vwari a ɓadǝmbǝi nǝ ambui ka, kyangye aban ká abani ama yakǝla nǝ̀ kum ɓǝle kam. Yiu ka yi kum kǝgir ɗang, kǝ mbui na nǝmurǝì, acemǝnana kunɓǝla mala vwari malaká karǝ ɗang. 14Pǝlǝa Yesu ne nggunî ama, “Kǝ ɓwa pà nǝ̀ li ɓǝleo ɗǝm ɗang!” Alaggana male ok mǝnia yì cau ne ka.

Yesu pǝr aɓwana aɓa Ndàmǝgule

(Matiu 21:12-17; Luka 19:45-48; Yohana 2:18-22)

15Anzǝm mana Yesu andǝ alaggana male yi bwalǝna Urǝshalima ka, pǝlǝa kutio aɓa Ndàmǝgule mala Ɓakuli, kara tita pǝr aɓwana mǝnana à kǝ kurkuro andǝ makki agirkuro aɓa Ndàmǝgule ka. Ramnggi ta atebǝl mala amǝ nggaɗi boalo andǝ abenci mala amǝ makki akutumurǝm. 16Sǝ eare ɓǝ̀ kǝɓwa kuti nǝ girkuro aɓa Ndàmǝgule mala Ɓakuli ɗang. 17Pǝlǝa tita kania wia gir. Nea wia ama, “À gilǝ mbo a Malǝmce ama, ‘Ɓala mem ngga, à nǝ̀ tunǝi ama ɓala hiwi ace aɓwana arǝ anzali kat,’ sǝ wu ngga, wu nyesǝi pǝlǝ npu mala amǝ'ɓǝmbǝriban!”#11:17 Ɓalli gbal aɓa: Isha 56:7; Ir 7:11.

18Agbani pǝris andǝ amalǝm Nggurcau mala Musa ok mǝnia yì cau ka. Pǝlǝa à tita alta njar mǝnana à nǝ̀ wal-lui nǝi ka. Sǝ yia ka, ɓangciu kǝ pakkia wia a rǝì, acemǝnana ɓwapǝndǝa kat ka ndali nǝ kanigir male.

19Lang pwari kpana ka, Yesu andǝ alaggana male puri ɓa nggeala.

Nggun vwari wuli

(Matiu 21:20-22)

20Ban fana nǝ dǝmbari à nǝ̀ nggǝ kuti nǝ ban nggun vwari mǝnana Yesu suí ka, kara à sǝni ka imǝna, yi bwal a nlerǝe. 21Ɓalǝ Bitǝrus kasǝa arǝ cau mǝnana Yesu banggi nggunî ka, pǝlǝa ne Yesu ama, “Malǝm, sǝni! Nggun vwari mǝnana a suí ka imǝna!”

22Yesu ear ama, “Wu pà ɓabum wun arǝ earnǝ Ɓakuli. 23Ən nggǝ bangga wun mǝsǝcau, koyana sǝ ne nkono man ama, ‘Lo o, kya kpa aɓa nggeamur’ sǝ ɓǝ̀ earnǝi a yilǝmi, sǝ ɓabumi tuti amur cau mǝnana bang ngga raka, cau mǝnana bang ngga nǝ̀ yia pa.#11:23 Ɓalli gbal aɓa: Mat 17:20; 1Kor 13:2. 24Ace mani ka ǝn nggǝ bangga wun, ɓǝ̀ mana wu zǝmbǝa aɓa hiwi ka, wu ear ama wu kumǝni. Anggo ka sǝ nǝ̀ duk ma'wun.

25 “Ɓǝ̀ wu came aban pak hiwi, sǝ wu ndanǝ kǝgir a bum wun arǝ kǝɓwa ka, wu twalbani, ace mǝnana Tar wun mǝnana a kuli ka ɓǝ̀ twala wun ban acauɓikea ma'wun. # 11:25 Ɓalli gbal aɓa: Mat 6:14,15. 26Sǝ ɓǝ̀ wu twalbani raka, anggo sǝ Tar wun mǝnana a kuli ka, pà nǝ̀ twala wun ban acauɓikea ma'wun ɗang.”

Ɗiban amur rǝcandǝa mala Yesu

(Matiu 21:23-29; Luka 20:1-8)

27Sǝ à nyare à yiu ɗǝm a Urǝshalima. Lang Yesu na aban gya aɓa Ndàmǝgule mala Ɓakuli ka, agbani pǝris andǝ amalǝm Nggurcau mala Musa, andǝ aɓwana-mǝgule yiu abani. 28À yì ɗi ama, “Nǝ́ ya rǝcandǝa nani sǝ a kǝ pakki amǝnia yì agir ka, sǝ yana mǝnana po rǝcandǝa mala pakkia ka?”

29Yesu eari wia ama, “Mǝ nǝ ɗi wun, ɗiban mwashat. Ɓǝ̀ wu bangŋǝnam gir mǝnana ǝn ɗi wun ngga, sǝ mǝ nǝ bangga wun rǝ ɓwa mǝnana pam mǝnia yì rǝcandǝa sǝ ǝn nggǝ pakki amǝnia yì agir ka. 30Wu banggam, batisǝma mala Yohana ka, pur nǝ kuli le ko nǝ ban ɓwapǝndǝa?”

31À pǝlǝki ce a rǝarǝia ama, “Ɓǝ̀ sǝm bangŋa ama, pur nǝ kuli ka, nǝ̀ ɗi sǝm mana tsǝa sǝ sǝm ginǝ earnǝ Yohana. 32Sǝ pa sǝm nǝ̀ na gbal ama pur nǝ ban ɓwapǝndǝa ɗang.” Ɓangciu pakkia wia arǝ bangŋa anggo, acemǝnana koyan ngga twali ama Yohana ka mǝɓangna mala Ɓakuli mǝɓafoe na. 33Pǝlǝa à nyesǝi Yesu cau ama, “Sǝm surǝì ɗang.”

Yesu nea wia ama, “Mim gbal ka pà mǝ nǝ na wun rǝ ɓwa mǝnana pam mǝnia yì rǝcandǝa ǝn nggǝ pakkina agir nǝi ka ɗang.”

Currently Selected:

Markus 11: mbu

Highlight

Copy