Matiu 7
7
Kǝa pakki aɓwana ɓashi ɗang
(Luka 6:37-38,41-42)
1 Wu kǝa pakki aɓwana ɓashi ɗang, ace mǝnana Ɓakuli ɓǝ̀ kǝa pakka wun ɓashi raka. 2Kǝla mǝnana wu kǝ ɓashia aɓwana ka, anggo sǝ Ɓakuli nǝ̀ ɓashia wun; sǝ kǝla mǝnana wu kǝ pang nǝ aɓwana ka, anggo sǝ Ɓakuli nǝ̀ pang nǝ wun.#7:2 Ɓalli gbal aɓa: Mar 4:24.
3 Ace mana sǝ a kǝ sǝn kǝkar mǝnana a mǝsǝ ɓeo ka, sǝ a sǝn gbǝlanggun mǝnana aɓa mo yì mǝsǝu ka ɗang? 4Ɓǝ̀ a na raka, lang sǝ a nǝ ne ɓeo ama came mǝ pusǝ kǝkar a mǝsǝo, sǝ we ka nggea gbǝlanggun na gaurǝ a mǝsǝo ka? 5We mǝ'kunɓarina, pusǝ gbǝlanggun mǝnana a mǝsǝo ka peatu, sǝ a wu nǝ sǝnban pepe mǝnana a nǝ pusǝî ɓeo kǝkar mana a mǝsǝì ka.
6 Gir mǝnana à tarrì ace Ɓakuli ka wu kǝa pe anvwa ɗang. Ɓǝ̀ wu pa anggo ka, à nǝ̀ kàrra à nǝ̀ nǝmnggi wun. Wu kǝa turi atǝmbǝrǝm-ɓala agir mǝɓoarne ma'wun ɗang. Ɓǝ̀ wu pa anggo ka, à nǝ̀ parkia a ɓakusǝia.
Yesu kanigir amur zǝmbǝa aban Ɓakuli
(Luka 11:9-13)
7 Wu zǝmbǝa aban Ɓakuli, nǝ̀ pa wun; wu alte a bu Ɓakuli, wu nǝ̀ kumo; wu wali Ɓakuli kunkurǝm, nǝ̀ mǝnba wun. 8Ɓwa mǝnana kat zǝm ngga à nǝ̀ pe wi; ɓwa mǝnana alte ka nǝ̀ kumo; sǝ ɓwa mǝnana wal kunkurǝm ngga, à nǝ̀ mǝnmbi wi.
9 Yana ata wun mǝnana ɓǝ̀ muni zǝmbǝi nɗǝmo ka, nǝ̀ pe wi tali? 10Ko ɓǝ̀ zǝmbǝi nji ka, nǝ̀ pe wi n'yau ka? 11Kat andǝ ɓealɓikea ma'wun ngga wu sǝlǝ pe amuna ma'wun aɓoro mǝɓoarne, sǝ nǝ Tár wun mǝnana a kuli ka? Ndanǝ ɓabum mana ɓoaro kutibanì ka nǝ̀ pe aɓwana mǝnana à zǝmbǝi wi ka, agir mǝɓoarne! 12Aɓa gir kat ka, pakki aɓwana agir mǝnana a earkiyice ama ɓǝa pakko ka. Mǝnia ka nda ɓa Nggurcau mala Musa andǝ kanigir mala amǝ'ɓangna mala Ɓakuli.#7:12 Ɓalli gbal aɓa: Luk 6:31.
Kunɓala ká Kuli andǝ kunɓala ká Lu-bǝsa
(Luka 13:24)
13 Wu kuti nǝ kunɓala mǝɓweari, acemǝnana kunɓala ká lu-bǝsa ka mǝtangŋe na, sǝ tanjari ka kwan ɗang. Aɓwana pas sǝ à kǝ kuti a njari. 14Sǝ kunɓala ká yilǝmu ka mǝɓweari na, sǝ tanjari ka mǝkwane na. Aɓwana mǝnana à kǝ kumi ka, à lakki ɗang.
Aɓwana andǝ aturo malea
(Luka 6:43-44; 13:25-27)
15 Wu tsǝk kir wun arǝ amǝ'ɓangna mǝ'nyirì. Pak ka à kǝ ɓosǝki rǝia kǝla anzur, sǝ mǝsǝrǝia ka anvwa bondo mǝlulle na. 16Wu nǝ̀ surǝia arǝ aturo malea. Zwe pa nǝ̀ pusǝ ɓǝla anap ɗang. Sǝ imdi pa nǝ̀ ɓǝl vwari ɗang. 17Anggo gbal ko ya nggun mǝɓoarne ka kǝ pusǝ ɓǝle mǝɓoarne, sǝ nggun mǝɓane ka kǝ pusǝ ɓǝle mǝɓane. 18Nggun mǝɓoarne pa nǝ̀ pusǝ ɓǝle mǝɓane ɗang, sǝ nggun mǝɓane pa nǝ̀ pusǝ ɓǝle mǝɓoarne ɗang. 19Nggun mǝnana kat pusǝ ɓǝle mǝɓoarne raka à nǝ̀ kasǝi à nǝ̀ turi a bǝsa.#7:19 Ɓalli gbal aɓa: Mar 3:10; Luk 3:9. 20Anggo ka wu nǝ̀ surǝ amǝ'ɓangna mǝ'nyirì arǝ aturo malea.#7:20 Ɓalli gbal aɓa: Mat 12:33.
21 Aɓwana na kat mǝnana à kǝ tunǝam ama, “Mǝtalabangŋo, Mǝtalabangŋo” ka, sǝ à nǝ̀ kutio a Domurǝm mala kuli ka ɗang, she ɓwa mǝnana kǝ pak gir mana Tárram mana a kuli ka earkiyice ka. 22A masǝlǝata apwari ka aɓwana pas nǝ̀ yiu à nǝ̀ nam ama, “Mǝtalabangŋo, Mǝtalabangŋo, nǝ lullǝo sǝ sǝm hamnǝ cau re, sǝ nǝ lullǝo sǝ sǝm pusǝki akukwar, sǝm pakki agir-ndǝlǝki pas re?” 23Pǝlǝa mǝ nǝ banggia wia ama, “Ən surǝ wun pale ɗang. Wu upi banam, wun amǝ'ɓealɓikea!”#7:23 Ɓalli gbal aɓa: Ang 6:8.
Kwakita kusǝɓa mala Mǝsǝle andǝ mala Gǝmɓwa
(Luka 6:47-49)
24 Ace mani ka, ɓwa mana kat kǝ ok amǝnia yì acau mem sǝ kǝ kpatea kǝ pea ka, à nǝ̀ kànì arǝ ɓwa mǝsǝle mǝnana ɓak ɓala male amur tali ka. 25Mbulo nya, mur lo akiban, gung-mbulo ɓua wal arǝ mǝnia yì ɓala ka. Sǝ ɓalae kpa ɗang, acemǝnana kusǝɓa ka à kwakite amur tali. 26Sǝ ɓwa mana kat kǝ ok amǝnia yì acau mem sǝ kǝ kpatea raka à nǝ̀ kànì arǝ gǝmɓwa mǝnana ɓak ɓala male amur sala ka. 27Mbulo nya, mur lo akiban, gung-mbulo ɓua wal arǝ mǝnia yì ɓala ka. Sǝ ɓalae kpa, nggea kpa mǝcande!
28Lang Yesu malǝna naki amǝnia yì acau ka, aɓwabunda pak ndali arǝ kanigir male, 29acemǝnana kanigir male ka ndanǝ rǝcandǝa. Pa kǝla mala amǝkani Nggurcau malea ɗang.#7:29 Ɓalli gbal aɓa: Mar 1:22; Luk 4:32.
Currently Selected:
Matiu 7: mbu
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. and © The Nigeria Bible Translation Trust 2016
