Luka 13
13
Pǝlǝ nzǝmo arǝ cauɓikea ko wu kiɗiki
1A pwari mǝno ka, aɓea ɓwana nakam àkǝ̀ banì, à ne Yesu cau mala amǝ Galili mǝnana à ndarǝ gir'nkila aban Ɓakuli sǝ Bilatus tsǝa à wal-luia ka. 2Pǝlǝa Yesu nea wia ama:
Wu kǝ sǝni kǝla amǝnia yì amǝ Galili à walia ka à nda ka amǝnana à kuti acili amǝ Galili nǝ cauɓikea ka le? 3Awo! Ən nggǝ na wun, ɓǝ̀ wu nying pakki acauɓikea, wu nyare aban Ɓakuli raka, wu nǝ̀ wú kat gbal. 4Ko aɓwana mǝnana lum-bwamndǝ-tongno-nong-tārú mǝnana ndakuli mǝdāre kpa a muria à wú a Silowam ngga, wu kǝ sǝni kǝla à kutiban nǝ cauɓikea a Urǝshalima kat le? 5Awo! Ən nggǝ na wun, ɓǝ̀ wu nying pakki acauɓikea wu nyare aban Ɓakuli raka, wu nǝ̀ wú kat gbal.
Kanicau arǝ vwari mana kǝ ɓǝl raka
6Pǝlǝa Yesu nea wia mǝnia yì kanicau ka ama:
Ɓe ɓwa na nǝ nggun vwari a ɓaban male. Waria alta ɓǝle sǝ ko kya kum ɗang. 7Sǝ ne ɓwa mǝnana kǝ yal ɓaban ngga ama, “Pǝlǝa tārú yalung mǝ ndarǝ nyarki kani ace alta ɓǝla vwari mǝnia ka, sǝ ko ǝn kum ɗang. Kasǝi turi! Ace mana sǝ nǝ̀ nggǝ kiɗiki nzali ɓà?”
8 Sǝ mǝyal ɓaban ne wi ama, “Mǝtala-ɓala, ɗeki ɓǝ̀ pǝlǝa mǝnia ka ɓǝ̀ malâ, mǝ nǝ kwarki nzali mǝnana a tǝte ka, sǝ mǝ nǝ soapi wi ciunda. 9Ɓǝ̀ pusǝ ɓǝle aɓa pǝlǝa mǝnana kǝ yiu ka, yàwá! Ɓǝ̀ ɓǝl ɗǝm raka, sǝ wu kasǝi.”
Yesu twalban rǝkwana a pwari Sabbat
10A pwari usǝlǝo mala amǝ Yahudi ka, Yesu na aban kani aɓwana gir aɓa ɓe ndakpapi. 11Ɓe mɓwama nakam kukwar gbakǝri pǝlǝa lum-bwamndǝ-tongno-nong-tārú. Kàrrì kàngkàng, gandǝ sarǝ rǝì ɗang ko bǝti. 12Lang Yesu nǝ̀ sǝni ka, pǝlǝa tunǝi ama ɓǝ̀ yiu a dǝmbǝa, sǝ ne wi ama, “Mɓwama, à panzǝno a bu mǝnia yì kwano mo ka.” 13Pǝlǝa tsǝk abui a rǝì, anggo ka, kara sarǝ pǝrapǝra, kǝ ɓwangsǝki Ɓakuli.
14Sǝ ɓwamǝgule ndakpapi ka bumi lullo, acemǝnana Yesu twalban rǝkwana a pwari usǝlǝo ka. Ne aɓwana mana à ram ngga ama, “Anongŋo nakam tongno-nong-mwashat ace turo. Wu yiu ɓǝa twala wun ban arǝkwana ma'wun aɓalǝ amǝno yì apwari ka, wu kǝa yiu a pwari usǝlǝo ɗang.”#13:14 Ɓalli gbal aɓa: Pur 20:9,10; Nggur 5:13,14.
15Mǝtalabangŋo pǝlǝi wi ama, “Wun amǝ'kunɓarina! Ko yan aɓalǝ wun ngga kǝ panzǝ jamnda ko mǝndambǝritso male a domwan kǝ um nǝi a pe wi mur a pwari usǝlǝo re? 16Sǝ ado ka, mǝnia yì mɓwama, Mǝkà Ibǝrayim, mǝnana Shetan kùrrì pǝlǝa lum-bwamndǝ-tongno-nong-tārú ka, à pà nǝ̀ panzǝi a pwari usǝlǝo re?”
17Lang bangŋǝna anggo ka, kara kǝsǝkya pakki aɓimǝbura. Sǝ aɓwana ka banɓoaria wia nǝ agir-ndǝlǝki mǝnana pea ka.
Kanicau arǝ mǝsǝ musta andǝ yis
(Matiu 13:31-33; Markus 4:30-32)
18Pǝlǝa Yesu ɗiban ama, “Domurǝm mala Ɓakuli ka nda kǝla mana? Mǝ nǝ kani arǝ mana? 19Nda kǝla mǝsǝ musta mǝnana ndya mǝní bǝti, mǝnana ɓeɓwa twali kya ɓeali a ɓaban male ka. Gulo kya pǝlǝa nggun sǝ amuna-nyal mana a kuli ka à yì bwal ndà arǝ abuí.”
20Nyare ɗiban ama, “Arǝ mana sǝ mǝ nǝ kani Domurǝm mala Ɓakuli? 21Nda kǝla yis mǝnana ɓe mɓwama twal bǝti, sùrǝì andǝ muku alkama tasau tārú, pǝlǝa loakio aki ɓālǝi kat ka.”
Kunkurǝm mǝɓweari
(Matiu 7:13-14,21-23)
22Yesu kutio arǝ ala andǝ amuna-là aban kani aɓwana gir, dǝshi muri aban ká Urǝshalima. 23Pǝlǝa ɓeɓwa ɗi ama, “Mǝtalabangŋo, aɓwana bǝti na à nǝ̀ amsǝia ka le?”
Yesu nea wia ama:
24 Wu ɓariki wu kutio a kunkurǝm mǝnana ɓwear ka, ǝn nggǝ na wun, acemǝnana aɓwana pas à nǝ̀ ɓariki ama à nǝ̀ kutio, sǝ à pà nǝ̀ gandǝi ɗang. 25Sǝ ɓǝ̀ mǝtala-ɓala longŋǝna sǝ girǝna kunɓala ka, wu nǝ̀ cam nǝ nza sǝ wu nǝ̀ nggǝ walki kunɓala aban zǝmbǝa ama, “Ɓwamǝgule, mǝnba sǝm kunɓala!”
Sǝ yì ka, nǝ̀ eare ama, “Ən surǝ wun ɗang, sǝ ǝn surǝ ban mǝnana wu pur kam ngga ɗang!”
26 Sǝ wu nǝ̀ na ama, “Sǝm li, sǝ sǝm nu, sǝnǝa wun, sǝ a kanì aɓwana gir arǝ anreɓala ma'sǝm.”
27 Sǝ nǝ̀ eara wun ama, “Ən surǝ wun ɗang, sǝ ǝn surǝ ban mǝnana wu pur kam ngga ɗang. Wu upi banam, wun amǝ'ɓealɓikea!” # 13:27 Ɓalli gbal aɓa:
Ang 6:8
.
28 # 13:28 Ɓalli gbal aɓa:
Mat 22:13; 25:30. Akàm wu nǝ̀ nggǝ ɓua nǝ nǝmnggi munabu wun, ɓǝ̀ wu sǝna Ibǝrayim, andǝ Ishaku andǝ Yakupu andǝ amǝ'ɓangna mala Ɓakuli kat aɓa Domurǝm mala Ɓakuli, sǝ wun ngga à ɗekina wun nǝ nza ka. 29Ɓwapǝndǝa nǝ̀ pur nǝ njartakuli, nǝ njarnzali, nǝ njarnza andǝ njarkunmur, à nǝ̀ yia do aban lili a Domurǝm mala Ɓakuli.#13:29 Ɓalli gbal aɓa: Mat 8:11,12. 30A pwari mǝno ka, aɓea aɓwana mǝnana à kǝ gusǝlǝ cea ado ka à nǝ̀ kyauwikia, sǝ aɓea aɓwana mǝnana à kǝ kyauwikia ado ka à nǝ̀ gusǝlia.#13:30 Ɓalli gbal aɓa: Mat 19:30; 20:16; Mar 10:31.
Yesu pak bumkiɗikea amur Urǝshalima
(Matiu 23:37-39)
31Anggo ka aɓea amǝ Farisi yiu aban Yesu à yì ne wi ama, “Nying ban mǝnia ka, o a ɓe ban ɗàng. Hirǝdus kǝ earce wal-luio.”
32Pǝlǝa Yesu nea wia ama:
Wu kyane wu kya ne mǝno yì mǝ'nyamshaminu ka ama, “Mǝ nǝ pusǝ akukwar, mǝ nǝ twali aɓwana ban rǝkwana yalung andǝ li, sǝ a tāruia nongŋo ka, mǝ nǝ masǝlǝta turo mem. 33Kat andǝ amani ka, mǝ nda amur gya yalung andǝ li sǝ liawo. Mǝsǝcau ka à nǝ̀ wal-lú kǝ mǝɓangna mala Ɓakuli sǝ pà aɓa Urǝshalima ɗang re!”
34 Wun amǝ Urǝshalima! Wun amǝ Urǝshalima! Wun mǝnana wu kǝ wal-lú amǝ'ɓangna mala Ɓakuli ka. Aɓwana mǝnana à turia aban wun ngga wu kǝ ɓukkia nǝ atali, ɓǝa wu. Kusǝ shen Mǝ nda ban earce ram wun aban mǝ'mwashati, kǝla mǝnana nggu kǝ ramnggi amuni aɓa mkpamtari ka, sǝ wu ear ɗang. 35Wu sǝni, Ndàmǝgule ma'wun ngga, Ɓakuli ginǝkina wuni, nongŋǝna a tarǝì. Ən nggǝ na wun, pà wu nǝ̀ nyare wu nǝ̀ sǝnam ɗǝm ɗang. She pwari mǝnana wu nǝ̀ bangŋa ama, “Ɓwangsǝban mala Ɓakuli na amur ɓwa mǝnana kǝ yiu aɓa lullǝ Mǝtalabangŋo ka!”#13:35 Ɓalli gbal aɓa: Ang 118:26.
Currently Selected:
Luka 13: mbu
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. and © The Nigeria Bible Translation Trust 2016
