Yoane 8

Omũkalĩ oyo weyĩbawa omwʼiteta

[ 1Neryo obuli mundu mwasuba ewuwe. Nĩkwa Yesu mwaya oko kitwa kyʼeMĩzeĩtũnĩ. 2Neryo omo ngyakyangyakya Yesu mwatsinduka omo Hekalũ. Neryo endeko yosĩ moyamũhĩkako, neryo Yesu mwĩkala mwakangĩrĩryabo. 3Nĩkwa abasakĩ nʼAbafarĩsayo mobamuletera omũkalĩ oyo weyĩbawa omo luteto. Neryo mobamũhĩra omo katĩkatĩ kabo. 4Mobabwira Yesu bati, Mũkangĩrĩrya, omũkalĩ oyũ aliatsimbawa akateta. 5Nĩkwa omo Migambo yetu, Musa mwatuhana ati omũkalĩ ngʼoyũ ĩtawe omo mabwe, nawe ũkabũgakĩ kwehĩ? 6Babũga ebĩ busana nʼerimulengako batoke erimuhandikirira. Nĩkwa Yesu mũnama, mwasaka oko kitaka omo munwe wuwe. 7Nĩkwa babere bakamuhatikana erĩmũbũlya, Yesu mũnamũkala, mwabũga nabo ati, Oyute nʼebibi omo katĩkatĩ kenyũ atsũke erimugusa kwʼerĩbwe. 8Kandi mũnama, mwasaka oko kitaka. 9Nabo omugulu bowa ekyo, mobatsũka erihuluka mo muguma muguma, erĩtsũka oko mukulu wa kubo, neryo Yesu mwasĩgalaho ĩyowene nʼomũkalĩ omo katĩkatĩ aho. 10Neryo Yesu mũnamũkala, mwabũga nʼomũkalĩ ati, Mũkalĩ, balihi kwehĩ? Sĩhalwe omundu nʼomuguma oyũkakũhĩra kwʼomusango kwehĩ? 11Naye mwabũga ati, Mukama, sihali nʼomuguma. Neryo Yesu mwabũga ati, Nage sĩndĩkũhĩra kwʼomusango. Ugende, erĩtsũka lino Susyekola kibi kandi.]

Yesu ekyakakala kyʼekihugo

12Kandi Yesu mwaswabũga nabo ati, Ingye indi kyakakala kyʼekihugo. Oyukanyikwama siendisyalendera omo mwĩrĩmya, nĩkwa asyabya nʼekyakakala kyʼengebe. 13Abafarĩsayo mobamubwira bati, Ũkatũla omwatsi wawe wowene; erĩyĩtũla goko lyawe si ryʼekwenene. 14Yesu mwasũbĩryabo ati, Nomo nangatũla omwatsi busana nage, erĩtũlago lyage ni kwenene, kusangwa nyĩnasĩ eyo nalũa, nʼeyo ngaya. Nĩkwa ĩnywe sĩmwasĩ eyo nalũa, kutse eyo ngaya. 15Ĩnywe mukatswera oko mũsĩndo wʼomubiri, Ingye Sinditswera mundu nʼomuguma. 16Nĩkwa nomo nangatswera, eritswera lyage ni kwenene, kusangwa Sindi ĩngyowene, nĩkwa indi na Tata oyo wanyituma. 17Nibya bĩsakĩre omo Migambo yenyũ biti, Erĩtũlago lyʼabandu babiri ni kwenene. 18Ĩngye indi oyũkatũla omwatsi wage, na Tata oyo wanyituma akatũla omwatsi wage. 19Neryo mobamũbũlya bati, Ko Tata wawe ali hahi kwehĩ? Yesu mwasũbĩryabo ati, Sĩmũnyasĩ, kandi sĩmwasĩ Tata wage. Kumbe mũnyasĩ, nga mwangaminya Tata wage nibya.

20Yesu mwabũga ebĩnywa ebĩ omo Hekalũ omo kyumba aho babya bakabika esyofranka syʼekĩbo. Kandi sihabya mundu wamuhamba, kusangwa endambĩ yiwe ĩsĩrĩyahĩka.

Simwangatoka eriya eyo ngaya

21Kandi Yesu mwabũga nabo ati, Ngagenda, nenyũ mwasyanyisonda-sondya, kandi mwasyahola omo bibi byenyũ. Simwangatoka erĩhĩka eyo ngaya. 22Kyaleka Abayũda ĩbabũga bati, Asyayĩta kwehĩ? Kusangwa akabũga ati, Simwangatoka erĩhĩka eyo ngaya. 23Kandi abya akabwirabo ati, Ĩnywe muli bʼeyĩkwa, ĩngye indi wʼendata; ĩnywe muli bʼekihugo kino, ĩngye Sindi wʼekihugo kino. 24Kikaleka inababwira nyiti, Mwasyahola omo bibi byenyũ. Kusangwa mwamatendĩkĩrĩrya ko nyiri ye, mwasyahola omo bibi byenyũ. 25Neryo mobabũlya Yesu bati, Uwendi kwehĩ? Yesu mwabwirabo ati, Kye nʼekyo nabiribabwira erĩtsũka erĩmbere. 26Ngwite myatsi mingi yʼeribabwira nʼeritswera busana nenyũ. Nĩkwa oyo wanyituma ni kwenene, kandi ngabwira ekihugo emyatsi eyo ngowa ewuwe.

27Nabo mobataminya kwʼabya akabwirabo busana nʼĩse. 28Neryo Yesu mwabwirabo ati, Omugulu mwasyasumba Omugala wʼOmundu, neryo mwasyaminya ĩngye kwʼindi ye. Kandi sindikola kindu omwʼihana lyage ĩngyowene, nĩkwa ngabũga emyatsi eyĩ ngoko Tata anyĩkangĩrĩraya. 29Nʼoyo wanyituma ali haguma nage. Sialitanyĩsĩga ĩngyowene, kusangwa ngakola ebiro byosĩ emyatsi eyĩkamũtsemesaya. 30Neryo Yesu abere akabũga emyatsi eyĩ, abangi mobamwĩkĩrĩrya.

Abandu bʼobwĩranda nʼabakobe

31Neryo Yesu mwabwira Abayũda abamwĩkĩrĩraya ati, Mwamabya mukakwama ebĩnywa byage, imuli biga bage kwenene. 32Kandi mwasyaminya ekwenene, nʼomwatsi wʼekwenene asyabaha obwĩranda. 33Nabo mobamũsũbĩrya bati, Tuli bana ba Abrahamũ, sitwetabya omo bukobe bwʼomundu nʼomuguma. Ko ũkabũga uti kwehĩ? uti, Mwasyabya nʼobwĩranda. 34Yesu mwasũbĩryabo ati, Kwenene, kwenene ngabũga nenyũ nyiti, Obuli mundu oyukakola ebibi, ni mukobe wʼebibi. 35Omukobe sĩalĩkala omo nyũmba ebiro byosĩ, nĩkwa omwana akĩkala ebiro byosĩ kera na kera. 36Neryo Mugala amabaha obwĩranda, mwasyabya nʼobwĩranda kũndũ. 37Nyĩnasĩ ko muli bana ba Abrahamũ. Nĩkwa mukasonda erĩnyĩta, kusangwa ekĩnywa kyage sikiwite omwanya omo mitima yenyũ. 38Ngabũga emyatsi eyo nabirilangira embere sya Tata wage. Nenyũ mukakola emyatsi eyo tata wenyũ ababwira.

39Mobamũsũbĩrya bati, Abrahamũ ni tata wetu. Yesu mwabwirabo ati, Kumbe muli bana ba Abrahamũ, nga mukakola emĩbĩrĩ Abrahamũ akola. 40Ĩngye nabiribabwira omwatsi wʼekwenene ogo Nyamuhanga ambwira. Nĩkwa mukasonda-sonda erĩnyĩta. Abrahamũ mwatakola atya! 41Ĩnywe mukakola emĩbĩrĩ tata wenyũ akakola. Nabo mobamubwira bati, Situli basa-na-nyĩnya, tuwite tata muguma, ye Nyamuhanga. 42Yesu mwabwirabo ati, Kumbe Nyamuhanga ni Tata wenyũ, nga mũnyanzĩre; kusangwa nahuluka ngalũa ewa Nyamuhanga, kusangwa mondasa nʼehamũlĩ yage, iye yo wanyituma. 43Busana nakĩ simuliminya ebyo ngabũga kwehĩ? Ni kusangwa simulitoka erĩowa ekĩnywa kyage. 44Ĩnywe muli bana ba tata wenyũ Satanĩ, kandi esyongumbu sya tata wenyũ syo mwanzĩre erikola. Iye nĩ mwĩtĩ. Siali mo mwatsi wʼekwenene, kusangwa sihali mwatsi wʼekwenene omo mutima wuwe. Omugulu akabũga amabehĩ, akabũga ebiwe ĩyowene, kusangwa nĩ mũbehĩ, kandi nĩ ĩse wʼamabehĩ. 45Nĩkwa ĩngye ngabũga omwatsi wʼekwenene, ekyo kikaleka ĩmũtanyĩkĩrĩrya. 46Nindi ũkwʼĩnywe akanzĩnga oko bibi kwehĩ? Namabũga omwatsi wʼekwenene, nĩkĩ kyo kikaleka ĩmũtanyĩkĩrĩrya kwehĩ? 47Omundu wa Nyamuhanga akowa ebĩnywa bya Nyamuhanga. Kusangwa Simuli ba Nyamuhanga, sĩmũlĩowabyo.

Yesu na Abrahamũ

48Abayũda mobasũbĩrya Yesu bati, Motũtabũga ndeke tuti, Uli Munya Samarĩa, kandi uli ko mbĩnga kwehĩ? 49Yesu mwasũbĩrya ati, Sindi ko mbĩnga, nĩkwa ngasĩkaya Tata wage, nenyũ mukanyihemula. 50Nĩkwa ĩngye sindisonda-sonda erĩsĩkĩbwa; hali muguma oyukasonda-sondalyo, naye akatswera. 51Kwenene, kwenene ngabũga nenyũ, omundu amabika ekĩnywa kyage, oluholo silwendisyamũhĩkako na kera. 52Abayũda mobamubwira bati, Lino tũnasĩ kʼuli ko mbĩnga. Abrahamũ mwahola, nʼabamĩnyererĩ mobahola nibya; nawe ũkabũga uti, Omundu amabika ekĩnywa kyage, oluholo sĩlwendĩsyamũhĩkako na kera. 53Tata wetu Abrahamũ mwahola, nawe uli mukulu kwilaba ye kwehĩ? Nʼabamĩnyererĩ nabo mobahola, nawe ukayiyira mondi kwehĩ? 54Yesu mwasũbĩrya ati, Namayipipa, eriyipipa lyage ini buyira. Oyukanyipipa ni Tata wage, nenyũ muti, Iye ni Nyamuhanga wetu. 55Kandi ĩnywe simwetamuminya, nĩkwa ĩngye nyĩmwasĩ. Namabũga nyiti, sĩnyĩmwasĩ, nasyabya mũbehĩ nga nywe. Nĩkwa nyĩnamwasĩ, kandi ngabika ekĩnywa kiwe. 56Tata wenyũ Abrahamũ mwatsema erilola oko kiro kyage, kandi mwalola kukyo, mwatsema. 57Neryo Abayũda mobamubwira bati, Suli wabya wʼemyaka makũmĩ atanu, walola uku Abrahamũ uti kwehĩ? 58Yesu mwabwirabo ati, Kwenene, kwenene ngababwira nyiti, Abrahamũ ate abutwa, INYINE. 59Neryo mobatola amabwe erimugusa goko; nĩkwa Yesu mwayĩbĩsa, mwalũa omo Hekalũ.

Currently Selected:

Yoane 8: KB80

Highlight

Copy