Yoane 13

Yesu akeraya ebisando byʼabiga buwe

1Nĩkwa embere wʼEbiro Bikulu byʼErikiruka, Yesu mwaminya kwʼendambĩ yiwe yamabĩhĩka eyʼerĩlũa omo kihugo kino, nʼeriya eyiri Ĩse. Abya iniabirianza abuwe ababya omo kihugo, kandi mwanzabo erĩhĩka oko ndũlĩ.

2Neryo babere bakalya omwʼĩgologolo, Satanĩ yabya ĩyabĩrĩhĩra omo mutima wa Yũda Ĩskarĩota mugala wa Sĩmonĩ erihotera Yesu. 3Kandi Yesu abya asĩ kwʼĨse abĩrĩhĩra emyatsi yosĩ yʼomo hamũlĩ yiwe. Kandi abya asĩ kwʼalũa ewa Nyamuhanga iniakasyaya ewa Nyamuhanga. 4Neryo Yesu mwahangana aho balira. Neryo mwambula olundi lukimba, neryo mwĩmya ekĩsangũlĩryo, neryo mwayihangakyo. 5Neryo Yesu mũta amagetsi okwʼĩtũba, neryo mwatsũka erĩnabya ebisando byʼabiga, nʼerisangulabyo omo kĩsangũlĩryo ekyo abya ayĩhangĩre. 6Neryo mwahĩka uku Sĩmonĩ Petero. Naye mwamubwira ati, Mukama, ũkanabaya ebisando byage kwehĩ? 7Yesu mwamũsũbĩrya ati, Ekyo ngakola sĩwasĩkyo lino, nĩkwa wasyaminyakyo enyũma. 8Petero mwamubwira ati, Siwendĩsyanabya ebisando byage na kera. Yesu mwamũsũbĩrya ati, Namatendĩnabya ebisando byawe, isuli nʼobusangi haguma nage. 9Sĩmonĩ Petero mwamubwira ati, Mukama, sũnabaye ebisando byage, ĩbyobyene! Nĩkwa ũnabaye ebyala byage nʼomutwe wage nibya! 10Yesu mwamubwira ati, Oyo wabirinaba erĩre, nĩkwa atolere erinaba oko bisando biwe bisa. Nenyũ mwerĩre, nĩkwa butsira ĩnywe bosĩ. 11Kusangwa Yesu abya asĩ oyukandisyamuhotera. Kyaleka ĩnĩabũga ati, Sĩmwerĩre ĩnywe bosĩ.

12Neryo abere abĩnabya ebisando byabo, neryo mwaswĩkala oko mesa. Neryo mwabũlyabo ati, Mwanamaminya ekyo ngabibakolera kwehĩ? 13Mukanyahula mo Mũkangĩrĩrya nʼomukama, mũkabũga ndeke, kusangwa ĩngye ko nyine nyitya, 14ngye indi Mukama nʼOmũkangĩrĩrya, neryo nabĩrĩbanabya oko bisando byenyũ. Nenyũ mutolere ĩmwanabanĩa oko bisando byenyũ. 15Kusangwa nabiribaha ekĩmĩnyĩsyo, imwakola ngoko nabiribakolera. 16Kwenene, kwenene ngabũga nenyũ, omugombe sialengĩre omukama wuwe, nʼomukwenda sialengĩre oyuliamutuma. 17Mwamaminya emyatsi eyĩ, muli nʼobutseme mwamakolayo.

18Sindibahula ĩnywe bosĩ. Nyĩnasĩ abo nayisoga. Nĩkwa ni busana nʼerĩberererya Amasako, awakabũga ati, Oyukalya akalyo kage, abĩrĩnyĩlolya kʼomugongo. 19Ngababwira lino, ebĩ bite byahĩka, neryo ekiro byasyahĩka, imwatoka erĩkĩrĩrya ĩngye kwʼindi ye. 20Kwenene, kwenene ngababwira, oyũkakokaya omundu oyo ngatuma, iniakanyĩkokaya; nʼoyũkanyĩkokaya, akakokaya oyo wanyituma.

Yesu akaminyerera erihoterwa liwe

(Mt 26.20-25; Mk 14.17-21; Lk 22.21-23)

21Neryo Yesu abere abĩbũga ebĩ, mwasũsũmana omo mutima mwatũlago ati, Kwenene, kwenene ngababwira nyiti, Omuguma wʼũkwʼĩnywe asyanyihotera. 22Abiga mobasamalirana ĩsĩbasĩ ngʼakahulandi. 23Omuguma gʼoko biga oyo Yesu abya anzĩre mwabya akegemera oko kĩkũba kya Yesu. 24Neryo Sĩmonĩ Petero mwamũkoherya ati, Utubwire ngʼakahulandi. 25Naye, kusangwa abya akegemera oko kĩkũba kya Yesu, mwamũbũlya ati, Mukama, nindi kwehĩ? 26Yesu mwamũsũbĩrya ati, Yoyo ngandĩkolerya ekitole kyʼomo kibindi nʼerimuhakyo. Neryo Yesu mwakolerya ekitole kyʼomo kibindi mwahakyo Yũda, omugala wa Ĩskarĩota. 27Neryo Yũda abere abĩmya ekitole ekyo, Satanĩ mwingira omwisi wuwe. Yesu mwamubwira ati, Ekyo ukandikola, ukolekyo lũba. 28Nĩkwa sihabya mundu oko mesa oyo waminya nga ni mwatsi wahi aleka Yesu iniamubwira atya. 29Abandi baganĩraya bati kusangwa Yũda abya nʼengunza yʼesyofranka, Yesu mwamubwira ati, agule ebindu ebitutolere busana nʼeBiro Bikulu; kutse ahe ekindu oko bera. 30Neryo Yũda abere abĩĩmya ekitole ekyo, mwahuluka lũba. Kandi ibwamabihumbera.

Eritegeka lihya-lihya

31Neryo omugulu Yũda ahuluka, Yesu mwabũga ati, Lino Omugala wʼOmundu amabana olukengerwa, kandi Nyamuhanga amabana olukengerwa omwisi wuwe. 32Neryo Nyamuhanga amabana olukengerwa omwisi wuwe, Nyamuhanga ĩyowene asyabanira Omugala wʼOmundu yʼolukengerwa. Kandi asyamubanira olukengerwa neryo-neryo. 33Abana balere, indi haguma nenyũ katambĩ kake. Mwasyanyisonda-sonda, neryo ngoko nabwira Abayũda, nenyũ ngababwira nyiti, Eyo ngaya Simwangatoka erĩhĩkayo. 34Ngabaha ekihano kihyakihya nyiti, Mwanzane. Ngoko nabiribanza, nenyũ mwanzane mutya. 35Neryo mwamabya nʼolwanzo, omuguma busana nʼogundi, abandu bosĩ basyaminya ko muli biga bage,

Yesu akaminyerera eriyigana lya Petero

(Mt 26.31-35; Mk 14.27-31; Lk 22.31-34)

36Sĩmonĩ Petero mwabũlya Yesu ati, Mukama, ukayahi kwehĩ? Yesu mwamũsũbĩrya ati, Eyo ngaya siwangatoka erinyikwama lino; nĩkwa wasyanyikwama bolo. 37Petero mwamũbũlya ati, Mukama, busana nakĩ sinangatoka erikukwama lino-lino kwehĩ? Nasyasiga engebe yage busana nawe. 38Yesu mwamũsũbĩrya ati, Wasyasiga engebe yawe busana nage kwehĩ? Kwenene, kwenene ngabũga nawe, engoko-lume siyendibika utewanyigana ngendo ĩsatu.

Currently Selected:

Yoane 13: KB80

Highlight

Copy