Enzũko 11
11
Obũhĩmbe bwʼenyũmba nyiri-hyiri yʼeBabelĩ
1Ekihugo kyosĩ mokyabya na mũbũge muguma nʼerisobola liguma. 2Neryo mokyabya omugulu bagenda eluhande lwʼeyo eryuba likasira mobabana erirungu omo kihugo kyʼeSĩnarĩ neryo mobĩkalaho. 3Neryo mobabwirana bati, Mwase, tubumbe amatafalĩ, tũhĩsayego ndeke. Neryo mobabya nʼamatafalĩ omo mwanya wʼamabwe, nʼeribumba omo mwanya wʼeswakara. 4Neryo bati, Mwase, tũyĩhĩmbĩre omũyĩ, nʼenyũmba nyirinyiri, omutwe wayo ahĩke elubula, neryo tuyiyirire erĩna tukasyapanza-panzirwa oko bugali bwʼekihugo kyosĩ. 5Neryo Omwami Mukulu mwandagala erĩrebya omũyĩ oyo nʼenyũmba nyiri, eyo abandu bahĩmba. 6Neryo Omwami Mukulu mwabũga ati, Lebaya, ni kihanda kiguma, nʼabosĩ bawite mũbũge muguma nʼekĩ kyo bakatsũka erikola. Neryo lino sihali kindu kikandĩsyakakĩryabo erikola ebyo banzĩre. 7Mwase, twandagale, tuhindule omũbũge wabo, ibatatoka erĩowana mũbũge. 8Neryo Omwami Mukulu mwapanzabo erĩlũaho erigenda oko bugali bwʼekihugo kyosĩ. Neryo mobaleka erĩhĩmba omũyĩ oyo. 9Kyaleka omũyĩ oyo iniahulwa mo Babelĩ, kusangwa Omwami Mukulu mwahinduliraho omũbũge wʼekihugo kyosĩ. Nʼerĩlũaho Omwami Mukulu mwapanzirabo oko bugali bwʼekihugo kyosĩ.
Esyondengo sya Semũ erĩhĩka uku Abramu
10Esĩ sye syondengo sya Semũ. Semũ abya wʼemyaka erĩgana, neryo mwabuta Arĩpakĩsadĩ, emyaka ĩbĩrĩ enyũma wʼerigunga. 11Neryo Semũ mwabyaho enyũma wʼeributa Arĩpakĩsadĩ emyaka magana atanu, neryo mwabuta abandi bagala nʼabali.
12Neryo Arĩpakĩsadĩ mwabyaho emyaka makũmĩ asatu nʼeyĩtanu, neryo mwabuta Sela. 13Neryo Arĩpakĩsadĩ mwabyaho emyaka magana ani nʼeyĩsatu abibuta Sela; neryo mwabuta bagala nʼabali.
14Sela mwabyaho emyaka makũmĩ asatu, neryo mwabuta Eberĩ. 15Neryo Sela mwabyaho emyaka magana ani nʼeyĩsatu, abibuta Eberĩ, neryo mwabuta abandi bagala nʼabali.
16Eberĩ mwabyaho emyaka makũmĩ asatu nʼĩnĩ, neryo mwabuta Pelegĩ. 17Neryo Eberĩ mwabyaho emyaka magana ani nʼamakũmĩ asatu, abibuta Pelegĩ, mwabuta abagala nʼabali.
18Pelegĩ mwabyaho emyaka makũmĩ asatu, neryo mwabuta Reũ. 19Neryo Pelegĩ, mwabyaho emyaka magana abiri nʼomwenda abibuta Reũ, mwabuta abagala nʼabali.
20Neryo Reũ mwabyaho emyaka makũmĩ asatu nʼeyĩbĩrĩ, neryo mwabuta Serũgũ. 21Neryo Reũ mwabyaho emyaka magana abiri nʼeyirinda, abibuta Serũgũ, mwabuta abagala nʼabali.
22Neryo Serũgũ mwabyaho emyaka makũmĩ asatu, neryo mwabuta Nahorĩ. 23Neryo Serũgũ mwabyaho emyaka magana abiri, abibuta Nahorĩ, mwabuta abagala nʼabali.
24Neryo Nahorĩ mwabyaho emyaka makũmĩ abiri nʼomwenda neryo mwabuta Tera. 25Neryo Nahorĩ mwabyaho emyaka erĩgana liguma nʼerĩkũmĩ nʼomwenda, abibuta Tera, neryo mwabuta abagala nʼabali.
26Neryo Tera mwabyaho emyaka makũmĩ alinda, neryo mwabuta Abramu, Nahorĩ, na Haranĩ.
27Esĩ ni ndengo sya Tera. Tera mwabuta Abramu, Nahorĩ na Haranĩ. Neryo Haranĩ mwabuta Lotĩ. 28Neryo Haranĩ mwahola embere sya tata wuwe Tera omo kihugo abutirawamo eŨrĩ yʼeKaldea. 29Neryo Abramu na Nahorĩ mobahĩkya abakalĩ erĩna lyʼomũkalĩ wa Abramu lyabya Saraĩ. Erĩna lyʼomũkalĩ wa Nahorĩ lyabya Mĩlka, mwali wa Haranĩ. Nĩkwa Haranĩ abya ĩse wa Mĩlka, na Ĩsĩka. 30Neryo Saraĩ abya mugumba, siabya na mwana. 31Neryo Tera mwĩmya Abramu mugala wuwe, na Lotĩ omwitsikulu wuwe mugala wa Haranĩ, na Saraĩ mwalĩana wuwe, omũkalĩ wa Abramu mugala wuwe. Neryo mobahuluka haguma nabo erĩlũa eŨrĩ wʼAbanya Kaldea eriya omo kihugo kyʼeKanana. Neryo mobahĩka eHaranĩ, neryo mobĩkalaho. 32Neryo ebiro bya Tera byabya emyaka magana abiri nʼeyĩtanu. Neryo Tera mwaholera eHaranĩ.
Currently Selected:
Enzũko 11: KB80
Highlight
Share
Copy
Want to have your highlights saved across all your devices? Sign up or sign in
Bible in Kinandi © Bible Society of the Democratic Republic of Congo, and Bible Society of Uganda, 1980.
