Emĩbĩrĩ 3

Ekirema kĩkalamĩbawa

1Nĩkwa Petero na Yoane babya bakaya omo Hekalũ oko saa mwenda, oko saa yʼerisaba. 2Neryo oko lũkyo lwʼeHekalũ olukahulawa mo Lubuya habya amundu oyo wabutawa inina kirema. Obuli kiro babya bakahekera omundu oyo yʼoko lũkyo olo busana nʼerĩsabĩrĩrya ebindu oko bandu ababya bakingira omo Hekalũ. 3Neryo abere alangira Petero na Yoane bakasonda eriingira omo Hekalũ, mwasababo ati bamuhe. 4Neryo Petero na Yoane mobamuhanda kwʼameso, neryo Petero mwamubwira ati, Ũlũlebaye! 5Naye mwayĩtegereryabo, ĩnĩakaganĩraya ati asyabana kubo kwʼekindu. 6Nĩkwa Petero mwamubwira ati, Singwite esyʼebĩtsĩpa nʼesyamagetsi, nĩkwa ekyo ngwite ngandikuhakyo. Omo lĩna lya Yesu Kristo wʼeNazaretĩ, uyigendere! 7Neryo mwamuwata oko byala biwe byʼamali, mwamũhanganĩa. Neryo-neryo ebisando biwe nʼehĩkongũlo hiwe mobyabana amaka. 8Neryo mwatwa ekyika, nʼeriimana ndeke, mwatsũka eriyigendera. Kandi mwingira omo Hekalũ haguma nabo, akayigendera, nʼerĩtwa ebika, nʼeripipa Nyamuhanga. 9Nʼabandu bosĩ mobamulolako iniakayigendera nʼeripipa Nyamuhanga. 10Neryo mobamuminyerera kwʼali yo mundu wabya akĩkala oko Lũkyo Lubuya lwʼeHekalũ akasabĩrĩrya ebindu. Neryo mobũsũla nʼerisweka nʼerigasama busana nʼemyatsi eyamũhĩkako.

Erĩtũlago lya Petero omo Hekalũ

11Neryo omundu oyo mwamakirira uku Petero na Yoane. Nʼabandu bosĩ mobasweka kutsibu, mobatibitirabo omo baraza eyikahulawa mo ya Solomono. 12Nĩkwa Petero abere alangira omwatsi oyo, mwabwira bandu abo ati, Ĩnywe balume ba Ĩsraelĩ, mukaswekera omwatsi oyo busana nakĩ, kutse mukatusamalirakĩ kwehĩ? Mũkaganĩraya muti ni busana nʼobũtokĩ bwetu kutse obũbũyĩrĩre bwetu tukaleka omundu oyũ iniayigendera kwehĩ? 13Nyamuhanga wa Abrahamũ, na Ĩsaka, na Yakobo, Nyamuhanga wʼabotata wetu, abiriha olukengerwa oko Mugombe wuwe Yesu. Nĩkwa ĩnywe momwamuhotera oko batabalĩ, kandi momwamugana embere sya Pilato omugulu asonda erimubohola. 14Nĩkwa ĩnywe momwagana Oyũbũyĩrĩre nʼoyutunganene, momwasaba Pilato abahe omwĩtĩ wʼabandu. 15Kandi momwĩta Omwenye engebe, oyo Nyamuhanga alũbũkaya oko baholĩ. Netu tuli balangĩrĩ bʼebyo. 16Nĩkwa busana nʼerĩkĩrĩrya omo lĩna lya Yesu, erĩkĩrĩrya uku Yesu lyo lyamaha omundu oyũ yʼamaka, oyo mukalangira, ĩmũnamwasĩ nibya. Erĩkĩrĩrya Yesu lyo lyamalamya omundu oyũ embere wenyũ ĩnywe bosĩ.

17Neryo lino, balĩkyetu, nyĩnasĩ ebyo, ĩnywe nʼabasondolĩ benyũ mwakola uku Yesu, momwakolabyo omo butaminya. 18Nĩkwa Nyamuhanga mwakanganĩa kera omo buno bwʼabamĩnyererĩ bosĩ ati, Kristo wuwe asyagalwa; neryo mwaberereryago atya. 19Neryo ĩnywe mubindule emitima yenyũ mulolaye eyiri Nyamuhanga, ebibi byenyũ bisangulawe, 20neryo emigulu yʼerĩyĩsyandira iyatoka erĩhĩka ĩkalũa embere syʼOmukama, kandi atoke eritutumira Yesu, oyuli Kristo oyo ayisoga busana nenyũ. 21Naye atolere erĩkokĩbwa elubula erĩhĩka oko mugulu wʼerisuba lyʼemyatsi yosĩ eyo Nyamuhanga ahula kera omo buno bwʼabamĩnyererĩ buwe ababũyĩrĩre. 22Kusangwa Musa mwabũga ati, Omwami Mukulu Nyamuhanga asyabatumira omũmĩnyererĩ, ngoko anyituma. Asyabya muguma gʼoko bandu benyũ. Nenyũ mwasyamowa omo myatsi yosĩ asyababwira. 23Neryo obuli mundu oyũtendĩsyowa omũmĩnyererĩ oyo, asyaherĩbwa erĩlũa omo katĩkatĩ kʼabandu. 24Kandi nibya, abamĩnyererĩ haguma nʼabosĩ ababũga erĩtsũka uku Samwelĩ nʼabamukwama, abosĩ mobahula ebiro ebĩ. 25Kandi esyondagane sya Nyamuhanga omo bamĩnyererĩ nĩ syenyũ, nenyũ mukasangira erilagana eryo Nyamuhanga ayira nʼabotata-kulu wenyũ. Ngoko abwira Abrahamũ ati, Nasyatsumula abandu bosĩ bʼekihugo omo bana bawe. 26Neryo Nyamuhanga mwahanganĩa Omugombe wuwe, neryo mwatsũka erimutuma ũkwʼĩnywe eribatsumula nʼeribindula obuli mundu, mũlũe omo syonzira syenyũ nyibi.

Currently Selected:

Emĩbĩrĩ 3: KB80

Highlight

Copy