Emĩbĩrĩ 19

Paũlo eEfeso

1Neryo omugulu Apolo abya eKorĩnto, Paũlo mwalaba omo kihugo kyʼendata, mwahĩka eEfeso. Neryo mweyayo abandi biga. 2Neryo mwabũlyabo ati, Ekiro mwĩkĩrĩraya, momwangirira Omũlĩmũ Abũyĩrĩre kwehĩ? Nabo mobamubwira bati, Iyihi, sĩtwetowa ko hali Omũlĩmũ Abũyĩrĩre. 3Neryo Paũlo mwabũlya ati, Mwabatĩsĩbawa omo lwahi kwehĩ? Nabo mobabũga bati, Omo lũbatĩso lwa Yoane. 4Neryo Paũlo mwabũga ati Olũbatĩso lwa Yoane lwabya busana nʼabandu ababindula emitima yabo erireka ebibi byabo. Yoane iniakabwira abandu ati bĩkĩrĩraye oyo wasyasa enyũma wuwe, iye ni Yesu. 5Nĩkwa babere babĩowa ekĩ, mobabatĩsĩbwa omo lĩna lyʼomukama Yesu. 6Neryo Paũlo abere ahĩra kubo kwʼebyala biwe, Omũlĩmũ Abũyĩrĩre mwahĩka kubo, mobatsũka erĩbũga omo mĩbũge, nʼeriminyerera. 7Neryo babya nga bandu ĩkũmĩ nʼababiri.

8Kandi Paũlo mwaya omo nyũmba yʼerĩhĩndanamo, mwabũga nʼabandu nʼeritendiubaha omo mikera ĩsatu, ĩnĩakakanĩraya nʼeribindula abandu omo mwatsi wʼobwami bwa Nyamuhanga. 9Nĩkwa abandi mobakala mobagana erĩowa, ĩbakabũga nabi embere wʼendeko busana nʼEnzira yʼomukama. Neryo Paũlo mwalũa kubo, mwatwala abiga, ĩnĩakakanaya obuli kiro omo kalasi ka Tĩrano. 10Neryo mwakola atya omo myaka ĩbĩrĩ, kyaleka bandu bosĩ ababya bĩkere eAsĩa, Abayũda nʼAbagĩrĩkĩ, ĩbowa ekĩnywa kyʼomukama.

Abagala ba Sikewa

11Nyamuhanga mwakola ebitiko-tiko bĩkalĩre omo byala bya Paũlo. 12Kandi ebitambara nʼesyongimba ebyalũa oko mubiri wa Paũlo mobyatwalwa oko bakonĩ, nʼesyondwala mosyalũa kubo, nʼebĩrĩmũ bibi mobyalũamo. 13Nĩkwa abandi bakũmũ bʼAbayũda, abalendera ehandi nʼehandi, mobalenga eriahula erĩna lyʼomukama Yesu ukwʼabo babya kwʼebĩrĩmũ bibi, bati, Ngakusema omo lĩna lya Yesu oyo Paũlo akatũlaganaya. 14Neryo abakola batya babya bagala balinda ba Sikewa omũhererĩ mukulu wʼAbayũda. 15Neryo ekĩrĩmũ kibi ekyo mokyasũbĩryabo kiti, Nyĩnasĩ Yesu, kandi nyĩnasĩ Paũlo, nĩkwa ĩnywe muli bahi kwehĩ? 16Neryo omundu oyo wabya kwʼekĩrĩmũ kibi mwagulukirabo, mwakĩndabo ababiri bosĩ, mwalabyabo akagala, neryo mobatibita bakalũa omo nyũmba eyo ibali ndũmbũ ĩbakwĩre bironda. 17Kandi Abayũda bosĩ nʼAbagĩrĩkĩ abĩkere eEfeso mobaminya omwatsi oyũ. Abosĩ mobakwa obuba, nʼerĩna lyʼomukama Yesu molyahamĩbwa. 18Kandi abangi ba kubo abĩkĩrĩraya mobasa nʼerĩkangya nʼerĩhũlũkya emĩbĩrĩ yabo. 19Nʼabangi bʼoko bakũmũ mobaleta ebitabu byabo, mobahĩsĩryabyo omo meso wʼabandu bosĩ, neryo mobaganza obũgũlĩ bwʼebitabu ebyo mobabana esyofranka elfu makũmĩ atanu (50,000). 20Litya ekĩnywa kyʼomukama mokyakanyirira kutsibu nʼerĩsĩngana.

Omwaga akahuluka eEfeso

21Neryo enyũma wʼemyatsi eyĩ, Paũlo mwayĩsũnza omo mutima wuwe eriyalaba eMakedonĩa, nʼomo kihugo kyʼAbagĩrĩkĩ, nʼeriya eYerũsalema, ati, Namabĩhĩka eyo, kandi litolere ĩnayalebya eRoma. 22Neryo mwatuma abawatĩkya buwe babiri, Tĩmoteo, na Erasto, eMakedonĩa, nĩkwa iye mwasĩgala eAsĩa ebindi biro.

23Neryo oko mugulu oyo, omwaga munene mwahuluka eEfeso busana nʼeNzira yʼomukama. 24Kusangwa omũhesĩ muguma wʼebĩtsĩpa, erĩna liwe iyo Demetrĩo, oyo wabya akahesa emisaka yʼekĩtsĩpa ya Artemĩ yʼerisabiramo. Obũhesĩ obũ bwabya bukaletera abanyima-nyima bʼendũndĩ nene. 25Neryo Demetrĩo mwabirikira abanyima-nyima aba bo haguma, nʼabanyimanyima bʼeyindi mĩbĩrĩ ati, Balume, mũnasĩ omũyĩsa wetu owakabanika omo mũbĩrĩ oyũ. 26Kandi mukalangira nʼerĩowa ebyo Paũlo oyũ akakola, butsira hano eEfeso hasa, nĩkwa hakũhĩ nʼehosĩ eAsĩa. Kandi abiribindula bandu bangi nʼerĩlolyabo ehandi, ati, esyonyamuhanga esĩkakokotĩbawa nʼabandu si nyamuhanga nʼahake. 27Neryo omũbĩrĩ wetu oyũ ali omo bwĩko eriahulwa mo mũbĩrĩ mubi, kandi ehekalũ ya nyamuhanga mukulu wʼobũkalĩ yo Artemĩ iyaganzwa nga buyira, na Artemĩ oyũ akaramĩbawa nʼeAsĩa hosĩ, na muna-kihugo, ĩnĩalũsĩbwa oko bukulu buwe.

28Neryo omugulu endeko yowa omwatsi oyũ, mobahitana kutsibu, neryo mobabũgĩra iguma-guma bati, Artemĩ wʼAbanya Efeso ni mukulu! 29Nʼomũyĩ gosĩ mũsũla mwʼolukanda, neryo mobatibita haguma omwʼebitsange, bakakura Gayo na Arĩstarĩko, abandu bʼeMakedonĩa ababya bakalendera na Paũlo. 30Kandi Paũlo mwasonda eriingira omo ndeko, nĩkwa abiga mobatalĩga akayayo. 31Kandi abandi bʼeAsĩa, abĩra ba Paũlo, mobamutumirako bakamugo nga-gonga bati siaye omwʼebitsange. 32Neryo abandi mobabirikira omwatsi muguma, nʼabandi ogundi mwatsi, kusangwa endeko yabya litya-litya, nʼabangi ĩsĩbasĩ ekyo bakahĩndanĩra. 33Kandi abandi bʼendeko mobaganĩrya bati ni Alesandũro, kusangwa Abayũda mobamũhanganĩa embere syʼabandu. Alesandũro mwakoherya omo byala ati akabũga nʼendeko. 34Nĩkwa omugulu baminya kwʼali Mũyũda, abosĩ mobabũgĩra iguma-guma omo saa ĩbĩrĩ bati, Artemĩ wʼAbanya Efeso ni mukulu!

35Neryo omũhandĩkĩ wʼomũyĩ mwabonderya endeko eribya bũkũtũ ati, Abalume bʼeEfeso! Ko ni mundu wahi oyũtasĩ ngoko mũyĩ wʼeEfeso nĩ mũteya wʼehekalũ ya Artemĩ mukulu, kandi nĩ mũteya wʼolusumba olwatoga lũkalũa elubula, kwehĩ? 36Neryo kusangwa sihali mundu oyo wangagana emyatsi eyĩ, ĩnywe mutolere imwabondera, isimwakola omwatsi go lũba-lũba. 37Ĩnywe mwabirireta bandu aba bo hano ĩsĩbetahũnga esyohekalũ, kutse sĩ batsũmĩ ba nyamuhanga wetu wʼobũkalĩ. 38Neryo Demetrĩo nʼabanyima-nyima abakakola haguma naye, bamabya bawite olubanza nʼomundu, hali enyũmba yʼesyombanza, nʼabʼehamũlĩ baneyo, neryo bahandikirirane omo syombanza syabo. 39Nĩkwa mwamanza ogundi mwatsi, asyasoherwa omwʼĩbũgĩro eritolere. 40Kusangwa tuli omo bwĩko bwʼerihandikirirwa lyʼeriyisamambula omo mwatsi wa mũnabwĩre, kusangwa sihali ekikaleka olukanda olũ ilwabyaho, kandi situwite ekyʼerĩbũga busana nʼomwaga oyũ. 41Neryo omũhandĩkĩ oyũ abere abĩbũga atya mwakũlũkya erĩhĩndana eryo.

Currently Selected:

Emĩbĩrĩ 19: KB80

Highlight

Copy