2 Abanya Korĩnto 7
7
1Neryo ĩnywe banze betu, kusangwa tuwite esyondagane esĩ, tũyĩtegaye oko bĩtĩsĩrĩre byosĩ ebyʼomubiri nʼebyʼekĩrĩmũ, kandi tusonde eribya ababũyĩrĩre ndeke, nʼerirendera omo lubahwa lwa Nyamuhanga.
Obutseme bwa Paũlo
2Muyire omwanya busana netu omo mitima yenyũ; sitwetakola omundu yo nabi, sitwetatsandya mundu, sitwetateba mundu. 3Sindibabwira busana nʼerĩbasĩnga, kusangwa monabũga erĩmbere nyiti muli banze bʼemitima yetu, kutse busana nʼerihola haguma, kutse busana nʼeribyaho haguma. 4Ĩnywe ngayiketera kutsibu, kandi ngayihalamba kutsibu busana nenyũ; nabĩrĩkĩranĩbwa ndeke, ngayĩsyandira ndeke omo malĩge wetu gosĩ.
5Kusangwa twabere twahĩka eMakedonĩa motutabana Obuholo. Kusangwa motwabana amalĩge ehosĩ; abandu babya bakalwa netu, nʼemitima yetu yabya nʼeriubaha. 6Nĩkwa Nyamuhanga oyũkakĩranaya abakabula omutima gʼomo nda, mwatũkĩranĩa eritutumira Tĩto. 7Kandi si busana nʼerĩhĩka lya Tĩto lisa, nĩkwa engulu aleta moyasũbya emitima yetu yʼomo nda, kusangwa mwatubwira omwatsi wenyũ ngoko mwamũkĩranaya, kandi ngoko muli nʼolukando busana nage, nʼeririra lyenyũ, nʼomuhwa wenyũ busana nage. Kyo kyaleka lino inatsema ndeke. 8Kusangwa nomo barua yage yanabĩta obũlĩge, sinyitsomene busana nʼerisakayo, nĩkwa omugulu nalangira obũlĩge ebarua yage yabaletera, nanganatsomene. 9Nĩkwa lino ngatsema butsira busana nʼerĩbĩta obũlĩge nĩkwa kusangwa obũlĩge obo mobwaleka imwabindula omutima. Kandi Nyamuhanga mwakola omo bũlĩge obo, neryo motutabakola nabi. 10Kusangwa obũlĩge obo Nyamuhanga akalĩga busana netu bukaleta eribindula omutima, nʼeribana erilama eritawite eriswatsomana. Nĩkwa obũlĩge bwʼekihugo bukaleta oluholo. 11Neryo talebaya ngoko Nyamuhanga mwakola omo bũlĩge bwenyũ erireka ĩmwakwa omũhwa, kandi imwayihanganira. Mwaleka imwahitana, ĩmwakwa obuba, imwabya nʼolukando busana nage, imwayitsinga, imwasuyira ebibi! Omo byosĩ mwabĩrĩyĩkangya ko mute ko musango omo mwatsi oyũ.
12Kandi nomo nanabasakira ebarua eyo si busana nʼoyo wakola ekibi, kutse oyo wakolawa nabi. Nĩkwa nasakayo imwatoka eriminya omũhwa wenyũ busana netu embere sya Nyamuhanga. 13Omwatsi oyo alekĩre ĩtwayĩhamya.
Kandi omwʼĩkĩranĩbwa lyetu Tĩto mwaleka ĩtwayĩsyandira busana nʼobutseme, kusangwa omutima wuwe mwasuba omo nda busana nʼĩmywe bosĩ. 14Kusangwa monabũga emyatsi yosĩ omo kwenene, litya eriyihalamba lyetu busana nenyũ embere sya Tĩto, lyabiriminyikala ko liri kwenene. 15Neryo olwanzo luwe busana nenyũ lukakanyirira, omugulu akibuka ngoko ĩnywe bosĩ mwabya nʼomutima wʼerĩowa, kandi ngoko mwamũkokaya omo lubahwa nʼerititimana. 16Ngatsema kusangwa ngatoka omo myatsi yosĩ eriyiketera nywe.
Currently Selected:
2 Abanya Korĩnto 7: KB80
Highlight
Share
Copy
Want to have your highlights saved across all your devices? Sign up or sign in
Bible in Kinandi © Bible Society of the Democratic Republic of Congo, and Bible Society of Uganda, 1980.
