1 Abanya Korĩnto 16
16
Ekĩbo busana nʼabalĩkyetu Abakristo
1Neryo busana nʼomwatsi wʼerĩwatĩkya balĩkyetu abandu ba Nyamuhanga. Mukole ngoko nategeka esyokanĩsa syʼeGalatĩa. 2Oko buli kiro kyʼeyenga, obuli mundu abike ekihande kyʼendũndĩ akabana, butsira erĩlabya ekĩbo ekiro nasyahĩka. 3Neryo omugulu nasyahĩka, nasyatuma abandu abo mũkasĩma nʼebarua busana nʼeriheka olũsũnzo lwenyũ eYerũsalema. 4Kandi lyamabya lyowene busana nage eriyayo, ibagenda haguma nage.
Erĩtondekanĩa lya Paũlo
5Nasyabya nabilaba eMakedonĩa nasyabahĩkako, kusangwa ngalabira eMakedonĩa. 6Kandi mbino nasyĩkala nenyũ ndambĩ, kutse erisiba nenyũ oko mugulu wʼeritsuku, imwatoka erĩnyĩtsĩndĩkĩsya omo nzira eyo nasyaya. 7Kusangwa sĩnyanzĩre eribalolako nʼeritwangana buyira. Nyiri nʼamaha wʼerisiba nenyũ ebiro binene, Omukama amanza. 8Nĩkwa nasyabya eno eEfeso erĩhĩka oko Pentekote. 9Kandi hano hali omwanya wʼerikola omũbĩrĩ munene, nomo hane esyonzĩgũ nyingi.
10Neryo Tĩmoteo asyabya ahĩka, mũlebaye mũmũkokaye ndeke siabane ekyʼerĩmũbahya. Kusangwa akakola haguma nage omũbĩrĩ wʼOmukama. 11Sihabye omundu oyukamupona. Nĩkwa mumutsindike omo buholo, atoke erĩhĩka aho nyiri, kusangwa ngamulindirira haguma nʼabandi balĩkyetu.
12Nĩkwa busana nʼomũlĩkyetu Apolo, monamuhatikana nyiti, abahĩkeko haguma nʼabandi balĩkyetu; nĩkwa siabya anzĩre eriyayo lino, nĩkwa asyahĩka ekiro asyabana omugulu owene.
Erihana lyʼendũlĩ nʼerĩkerya
13Mũyĩtegaye, mũsĩke omwʼĩkĩrĩrya, mukole ngʼabalume, mubye nʼamaka. 14Mukole emyatsi yosĩ omo lwanzo.
15Balĩkyetu, mũnasĩ, ekĩtũnga kya Setefano, ngoko babya Abakristo bʼerĩmbere omo kihugo kyʼeAkaya, kandi mũnasĩ ngoko babya bakayiha oko mũbĩrĩ wʼerĩwatĩkya abandu ba Nyamuhanga. Neryo ngabalemba-lemba nyiti, 16Mowe abandu ngʼaba, kandi mowe obuli mundu oyukakola nʼerĩwatĩkya haguma nabo. 17Kandi ngatsema busana nʼerĩhĩka lya Setefano na Fortũnato, na Akaĩko; kusangwa bamabya omo mwanya wenyũ wʼerĩnyĩwatĩkya. 18Babĩrĩsĩkya omutima wage nʼowenyũ nibya. Neryo mubye mũkasĩma abandu ngʼaba.
19Amakanĩsa awali eAsĩa bakababũkaya. Kandi Akwĩla na Pĩrĩsĩla nʼekanĩsa eyĩkahĩndana omo nyũmba yabo bakababũkaya ndeke, omwisi wʼOmukama, 20Nʼabalĩkyetu bosĩ eno bakababũkaya.
Mũkeranaye nʼeriwanako erĩbũyĩrĩre.
21Ĩngye Paũlo ngasaka, omo byala byage erĩbabũkya.
22Omundu amatindanza Omukama, abye mutakirwa. Maranatha, liti, Omukama ase!
23Olukogo lwʼOmukama Yesu lubye haguma nenyũ.
24Kandi olwanzo lwage lubye nʼĩnywe bosĩ omwisi wa Kristo Yesu. Amina.
Currently Selected:
1 Abanya Korĩnto 16: KB80
Highlight
Share
Copy
Want to have your highlights saved across all your devices? Sign up or sign in
Bible in Kinandi © Bible Society of the Democratic Republic of Congo, and Bible Society of Uganda, 1980.
