1 Abanya Korĩnto 13

Olwanzo

1Namabũga omo mĩbũge yʼabandu nʼeyʼabamalaĩka, nĩkwa isingwite olwanzo, nabiribya ngʼomukenge owakalahira kutse ngʼekengele eyĩkabũgĩrana. 2Kandi nomo nangabya nʼolũsũnzo lwʼerĩtũla omwatsi, kandi nyasĩ erĩkũmbo lyosĩ, nʼeriminya lyosĩ, kandi nomo nangabya nʼerĩkĩrĩrya lyosĩ erikatoka erĩlũsya ebitwa, nĩkwa isingwite olwanzo, inyiri busa. 3Nomo nangabya ngahĩtya ebyosĩ ebyo nyiwite kandi namaha omubiri wage erĩhĩsĩbwa, nĩkwa isingwite olwanzo, sibyenyigasirakĩ.

4Olwanzo lukayibombeka, kandi luli nʼobwenge; olwanzo silulibya nʼobũha; siluliyihalamba, siluliyiheka. 5Olwanzo sihulibula erĩsĩkya; siluliyirondera endũndĩ ĩlolwene-lwene; kandi silulihitana litya-litya; silulitsungirira ekibi. 6Olwanzo silulitsemera ebitatunganene, nĩkwa lukatsemera ebyʼekwenene. 7Olwanzo siluliluha, omo myatsi yosĩ lũkĩkĩrĩraya, lukabya nʼamaha, lũkayĩyĩnaya.

8Olwanzo lukakota; nĩkwa olũsũnzo lwʼeriminyerera omwatsi lwasyalũsĩbwaho, kandi erĩbũga emĩsĩndo-mĩsĩndo yʼebĩnywa lyasyũmbya; hali olũsũnzo lwʼeriminya, nĩkwa lwasyalũsĩbwaho. 9Kusangwa twasĩ bike, kandi tũkatũlago buke. 10Nĩkwa omugulu emyatsi yosĩ yasyahĩkana, ebike byasyalũsĩbwaho.

11Omugulu nabya mwana, nabya ngabũga ngʼomwana, monaganĩrya ngʼomwana, monasoha omwatsi ngʼomwana. Nĩkwa omugulu namabikula, monaleka emyatsi yʼobwana. 12Kusangwa lino tukalangira bike ngʼomo kiyo, nĩkwa ekiro ekyo, twasyalangira obũsũ oko bũsũ; lino nyasĩ bike, nĩkwa ekiro ekyo nasyaminya ndeke ngoko Nyamuhanga anyasĩ ndeke.

13Neryo lino emyatsi ĩsatu ineho, erĩkĩrĩrya, nʼamaha, nʼolwanzo; nĩkwa olwanzo lũlengĩre eyindi myatsi eyĩ.

Currently Selected:

1 Abanya Korĩnto 13: KB80

Highlight

Copy