Matayo 16

Eing'orunyeki Yesu Sapiipiyieti

(Mk 8.11-13; Lk 12.54-56)

1 # Mat 12.38; Lk 11.16 Nepuonu Ilfarisayo o Sadukayo enetii aatem eyieu neitodol olmonekie ooing'uaa shumata. 2Newaliki ajoki, “Ore te nteipa nijojo, ‘Mesha ade taata amu kenyokie shumata.’ 3Nijojo tadekenya, ‘Keidis ade taata amu kenyokie shumata netunukua.’ Indimidimi intae aatumusu ilmonek le shumata kake mindimidimi aaibalie ilmonek le kuna katitin. 4#Mat 12.39; Lk 11.29 Eing'oru kulo tung'ana torrok lena kata olmonekie kake meishori likae leme olapa le Yona.” Nelo aing'uaa ninche.

Enkaisiijoi oo Lfarisayo o Sadukayo

(Mk 8.14-21)

5Ore pee epuo ilooiteng'eni lido kekun, nerikino eitu eya mukateni. 6#Lk 12.1 Nejoki Yesu ninche, “Entorrip ate te nkisuijo oo Lfarisayo o Sadukayo.”

7Nejokino maate, “Enkaraki neitu kiyau mukateni.”

8Neyiolou Yesu ilo rorei nejo, “Oi intae ilooti enkirukoto, ainyoo pee ijokinono maate mukateni miaatata? 9#Mat 14.17-21 Keitu ejing'aa intae? Aimidamumu mukateni imiet naainosa iltung'ana nkalifuni imiet, kaja nkikapuni ninturrurrutuo? 10#Mat 15.34-38 Aashu mukateni naapishana naainosa inkalifuni ong'uan oo ltung'ana, kaja nkikapuni ninturrurrutuo? 11Ainyoo pee mejing'aa intae nchere mme mukateni aimaka? Kake entorrip ate te nkisuijo oo Lfarisayo o Sadukayo.”

12Nejing'aa te ina kata inchere, mme enkisuijo oo mukateni eimaka kake inenkiteng'enare oo Lfarisayo o Sadukayo.

Etolimuo Petero Yesu

(Mk 8.27-30; Lk 9.18-21)

13Ore pee elo Yesu enkalo e Kaisari e Filipi neikilikuan ilooiteng'eni lenyena ajoki, “Kejo iltung'ana ae ng'ae Enkerai e Tung'ani?”

14 # Mat 14.1-2; Mk 6.14-15; Lk 9.7-8 Nejoki, “Ejo kulikae Yohana Olaibatisani; nejo kulikae Eliya; nejo kulikae Yeremia, anaa obo loo loibonok le Nkai.”

15Nejoki, “Paa aijojo intae kara nanu ng'ae?”

16 # Yhn 6.68-69 Newaliki Simon Petero ajoki, “Ira Iyie Kristo, Enkerai e Nkai naishu.”

17Newaliki Yesu ajoki, “Imayiana Simon ara Yona, amu eitu kiboloki ena entoki naata osesen o sarge, kake Papa lai otii shumata. 18Naajoki nanu iyie, ira Petero naa te nchumata ena soit ashet enkanisa ai; nemegilu ae kata ltimito le nemeneng'a. 19#Mat 18.18; Yhn 20.23 Naa kaaisho iyie ilboleta le nkitoria e shumata ore eniyooki aen te nkop, neaku eidipaki aateen te shumata; ore enilak te nkop eidipaki aatalak te shumata.”

20Neitanap ilooiteng'eni lenyena pee meliki oltung'ani nchere ninye Kristo.

Eibalakinye Yesu ilooiteng'eni lenyena enkeeya o empiunoto enye

(Mk 8.31–9.1; Lk 9.22-27)

21Neiteru Yesu te ina kata aibalakinye looiteng'eni lenyena inchere meeta kata nemelo Yerusalem meisilisili too mbaa kumok ilpayiani o lapolosak kituaak, o laiteng'enak loo nkitanapat neari metua, neitopiuni te nkolong e uni.

22Nerik Petero enkilepata nekurraki ajoki, “Mikintapaasha Enkai, Lo Kitok, mikitalama nena.”

23Neibelekenyakino Petero ajoki, “Shomo oriong ai shetani, amu aikirror; amu mme imbaa e Nkai idamu kake noo ltung'ana.”

24 # Mat 10.38; Lk 14.27 Nejoki Yesu te ina kata ilooiteng'eni lenyena, “Ore pooki tung'ani oyieu naasuj inchoo eany kewan nenap osalaba lenye naasuj. 25#Mat 10.39; Lk 17.33; Yhn 12.25 Amu ore pooki tung'ani ojo aitajeu enkishui enye neiminie, ore pooki oiturraa enkishui enye te nkaraki nanu, neitoki atum. 26Amu kaa dupoto etum oltung'ani te netum enkop pooki, neiturraa enkishui enye? 27#Mat 25.31; Olke 62.12; Irm 2.6 Amu kelotu Enkerai e Tung'ani te nkitoo e Menye te nebo o lmalaika lenyena; nelaaki pooki tung'ani te ina kata aitorisioki inaataasa. 28Esipa ajoki intae, etii kulikae ooitashe te ne, lemeinyorrinyor keeya katukul metaba anaa nedol Enkerai e Tung'ani elotu te nkitoria enye.”

Currently Selected:

Matayo 16: MBS

Highlight

Copy