Iasat 13

Etegeluaki Barnaba o Saulo neirriwari

1Neetae apa te sirit e Antiokia, te sirit natii ine, iloibonok le Nkai o laiteng'enak Barnaba Simeon oji Olorok, o Lukio le Kirene, o Manaen oyati#13.1 oyati oltung'ani apa oibung'aki aaya aaitung'uaa iltung'ana lenye lo lmarei lo laiguanani Herode o Saulo. 2Ore eserem ninche nesaita Olaitoriani neitupukoo ate, nejo Enkiyang'et Sinyati “Entegelakaki Barnaba o Saulo te nkaraki esiaai naipotoko.” 3Neaku ore pee eidip empukoroto neomon, neiteleiki ninche lelo nkaik, neirriwaa meshomo.

Paulo o Barnaba tiatua Kupro

4Neisho ninche, eirriwayie Enkiyang'et Sinyati, nedoyio aapuo Seleukia; nejing empeut te ine aapuo Kupro. 5Ore etii Salamis, nelikioo ororei le Nkai te nkaji oo Lyahudi e ntumo; nerikito Yohana eretito ninche. 6Ore pee epolos ilo odung'oro pooki aabaiki Pafo, netum olkuyantiki, oloiboni le lejare, Olyahudi, oji Bar-Yesu; 7neboitare ilo olbalusui oji Sergio Paulo, oltung'ani ng'en. Neipot ilo tung'ani Barnaba o Saulo meshomo enkang enye, eyieu nening ororei le Nkai. 8Kake etirishie Elimas, (amu nejia eji ewalunoto e nkarna enye), ilo taa kuyantiki ejo pee eng'adie ilo balusui enkirukoto. 9Kake ore Saulo, oji Paulo, eiganya Enkiyang'et Sinyati, neing'ode ninye, 10nejoki, “Aish ele obore olosek o enkarrueisho pooki, ai mipal ake mikordil nkoitoi supati o Laitoriani? 11Ng'ura! Kitabaikia enkaina o Laitoriani. Naa imodoku, nimidol enkolong o metulusoi enkata.” Nedoiki nabo kata ninye enkirupurup o enaimin; nemana eing'oru olorik aibung enkaina. 12Ore ilo balusui, pee edol ina nataasaki, neiruk, eing'asie te nkaraki enkiteng'enare o Laitoriani.

Etabaikitia Paulo o Barnaba Antiokia o Pisidia

13Nejing Paulo o encholiek enye empeut te Pafos, nepuonu Perga te Pamfilia; nelo Yohana aing'uaa ninche te ine nerrinyo Yerusalem. 14Kake etudumunye ninche te Perga, nepolos aapuonu Antiokia e Pisidia, nepuo enkaji e ntumo te nkolong e sabato, netoni. 15Ore eidipaki aaisoma nkitanapat e Musa o loibonok le Nkai, ore ilaitoriak le ina aji e ntumo, nejoki, “Ilalashera, te niatata ororei oret olorere, eroro.” 16Neinyototo Paulo, neyuk te nkaina nejo, “Lo lewa loo Siraeli o intae ilooure Enkai, enining'o. 17#Ena 1.7, 12.51 Enkai e le orere le Siraeli nategelua iloo papa, neitaa olorere kitok eton emanya Misiri neilepie enkaina enye neriku aitung'uaa ine. 18#Enki 14.34; Enkig 1.31 Naa ore te rishata oo larin artam neng'iri empeepeen enye ti ong'ata. 19#Enkig 7.1; Yosh 14.1 Ore pee eidip atumuta loreren oopishana te nkop e Kanaan, neisho ninche enkop enye metujung'o, te rishata oo larin iip ong'uan o onom. 20#Ilari 2.16; 1 Sam 3.20 Ore etulusoitie nena neisho ninche larishak o metabaiki enkata e Samuel olapa oiboni le Nkai. 21#1 Sam 8.5, 10.21 Ore tesiadi neomonu ninche olaiguanani, neisho Enkai ninche Saulo ole Kishi, oltung'ani lo losho le Benchamen, te rishata oo larin artam. 22#1 Sam 13.14, 16.12; Olke 89.20 Ore pee eiwuang'ie ninye, neitasheyie Daudi metaa olaiguanani lenye, oloitaikia Enkai shakeni, nejo, ‘Anoto Daudi ole Yese, oltung'ani onyor oltau lai, oas nena pooki nayieu.’ 23Te ishoi e ilo tung'ani eitaikia Enkai Siraeli, Olaitajeunoni, Yesu anaa apa enaisiligie. 24#Mk 1.4; Lk 3.3 Netang'asa apa Yohana alikioo etiooyo elotunoto enye, enkibatisa naitoduaaya enkirridunoto natolikio ltung'ana pooki loo Siraeli. 25#Mat 3.11; Mk 1.7; Lk 3.16; Yhn 1.20,27 Naa ore eitabaya ninye Yohana inaaitanapaki, nejo, ‘Ijojo intae kara nanu ng'ae? Mara nanu ninye. A'a kake ng'ura, kelotu likae te siadi nanu, laa kaamakua te nalak inamuka enyena.’ 26“Lo alashera, kira e ntalipa e Abraham, o intae kulo ooure enkai, iyiook eirriwakaki irorei le na jeunoto. 27Tenkaraki lekua oomanya Yerusalem o laitoriak lenye, amu ninye eitu eyiolou, arashu eyiolou iltoiloishi loo loibonok le Nkai ooisomai anaa ake too nkolong'i e sabato, ninche ooitabaitie ena pee edung'oki ninye enkiguana e keeya. 28#Mat 27.22-23; Mk 15.13-14; Lk 23.21-23; Yhn 19.15 Naa ore hoo netalaita te ninye ai naitanang, etoomono Pilato meishoo ninye metari. 29#Mat 27.57-61; Mk 15.42-47; Lk 23.50-56; Yhn 19.38-42 Ore pee eitabaya nena pooki naasirakino ninye, neitadou ninye to lchani neirragie te nkurare. 30Kake eitopiwuo Enkai ninye aitung'uaa ilootuata: 31#Iat 1.3 netoduaaki too nkolong'i kumok lelo opa ooiriamunore ninye eing'uaa Galilaya alotu Yerusalem, naa ninche taata shakeni to lorere. 32Nikiyaki intae ilomon supati le nkisiligata naishoo apa Enkai iloo papa, 33#Olke 2.7 eneikona Enkai pee eitabaya ina te iyiook inkera enye, aitopiu Yesu anaa enaigero to Lkerempe le Nkai, le are nchere, ‘Ira iyie Enkerai ai, te le kekun aatoiwuo.’ 34#Isa 55.3Naa ore ina naitopiwuo aitung'uaa ilootuata, nemeitoki naa ai kata arrinyokino erruorroto, eiroro nejo, ‘Ekaaisho iyie ilo sinyati imayianat naadede e Daudi.’ 35#Olke 16.10 Amu etejo sii to Lkerempe le Nkai, ‘Nimincho iyie Ilo Sinyati lino edol erruorroto.’ 36Amu ore Daudi, eidipa too rishat enyena aitabai inaaitanapishe Enkai, neirura, neirragieki te nebo iloo menye, netum erruorroto. 37Kake ore ilo oitopiwuo Enkai eitu etum ninye erruorroto. 38Entayioloito naa aajo, ilalashera laainei, te le tung'ani elikini intae enkitayunoto oo ng'ok: 39naa te ninye eoruni ntiyot pooki ng'ae oiruk ninye, neikenakini esupatisho te Nkai nemetum too nkitanapat e Musa. 40Entodol naa ate, meinepu intae enapa nairoro iloibonok le Nkai aajo: 41#Haba 1.5 ‘Eng'ura intae, ilasurdaanyak, ning'asiasia nindaayaya; amu keeta enaas too nkolong'i inyi, o enkiaas nemeeta nchere iruko, te neliki intae likae.’ ”

42Ore eipung aapuo, nesai menyaaki aaigilie lelo omon te nkolong e sabato nasuju ina. 43Ore pee eidapasha entumo, nesuj Ilyahudi kumok o kulikae ooure Enkai Paulo o Barnaba: neirorie ninche lelo neitirrishaki metobiko te mpiris e Nkai.

44Ore te nkolong e sabato natusujua ina, peno eitu etumokino ine enkanasa nalulung'a aaning ororei le Nkai. 45Kake, ilo orere ake etoduaa Ilyahudi, neigany olom, neishankarru nena naatejo Paulo, nemor Enkai. 46Neiro Paulo o Barnaba aashirraki, nejo, “Keishiaakino naa intae eiteraki aaliki ororei le Nkai. Kake ore amu itanang'aitie, nitoduaa oopeny nchere meishiaakino intae enkishui nemeish, ng'ura, kipuo iyiook enetii Loreren. 47#Isa 42.6, 49.6 Amu ina doi eitanapa iyiook Olaitoriani, ajoki. ‘Aaitaa iyie ewang'an oo Loreren, peyie iyau iyie enjeunoto o metabaiki ineeiting'ie enkop.’ ” 48Ina ake etoning'o loreren, neng'ida oleng, neisho ilo rorei le Nkai enkisisa: ore lelo oogelakino enjeunoto neiruk. 49Neibulunyeki ororei lo Laitoriani ilo kirine pooki. 50Kake eshomo Lyahudi aaisur nkituaak naayanyiti, o lewa ooitore ina anasa, neing'oling'ol pee einyali Paulo o Barnaba, nearari metung'uai ilo Kirine lenye. 51#Mat 10.14; Mk 6.11; Lk 9.5, 10.11 Kake eipiripirokito ninche enterit oo nkejek enye, nepuonu Ikonio. 52Neiput ilooiteng'eni enchipai o Enkiyang'et Sinyati.

Currently Selected:

Iasat 13: MBS

Highlight

Copy