Avafilipi 2

Uwilevesi na Uwuvina wa Kilisito

1Ngali uwunani wenyu mwa Kilisito wakuvapela uludali? Ngali uwende wakwe ukuvasikimika? Ngali mwinawo uwulilumwi na Umuhe Umwelu nu kwiwonela ulusungu na ukwihuguvalila yinyenye kwa yinyenye? 2Sweno, mukwilanisage uluhekelelo lwangu pemwiva na amahosa gamwi, uwende wumwi, mutima gumwi na kuhosa lumwi. 3Mulapiga kinu ukwimila imitima ja uwutavangu, nambi kwa ulwidudumbo lwa malanga, muvelage na uwilevesi yinyenye kwa yinyenye, yeyeavesaga amulavage umuyagwe ukuta amulutye uwunu. 4Palava na umunu yeakwisakila ukwambula kwakwe hela iyena, pesi ukuta asakilage ukwambula na kwa avayagwe. 5Muvelage na imimile gigila jealinajo Kilisito Yesu.

6Umwene kukilamuko ali mbepali Nguluvi,

neke sahosisi ukuta kula ukuva aling'ene na Nguluvi

kive kinu cha kulimbila kwa ludali.

7Pesi kwa ukuwenda kwakwe yumwene,

Afilesile ifyo mbefili, akwitegulila

ulwa uwunyawingi neke ave ihwana na avanu,

neke awonekage wita munu.

8Ilevise na ukuva na ichoga mbaka peifwa,

kangi mbaka peifwa mu musalaba.

9Na ukwimila lulo Nguluvi amukang'we pachanya hilo ululumbo lukomi hilo,

nu kumupela ululumbo ulukomi,

swe akumupela litawa ilikomi ukulutila amatawa mbegali.

10Na ukwimila ululumbo lwa ilitawa lya Yesu,

ifigawa mbefili kuchanya, mung'i na kuvafwe fimufugamile umwene,

11na umunu yeyeavesaga idikile ukuta

Yesu Kilisito ye Mutwa mundolo sa Nguluvi Dada.

Ulung'ali mung'i

12Vanyalukolo vangu, pende pamwi nanyenye mwavelige na ichoga mbepali na kulino pendili pataali nanyenye, muvelage ni choga ndahihila. Mupigage ifipigo we mwina muhwehwe nu kukuvila ukwimila uwupoki wenyu, 13pakuva Nguluvi yeipigaga mbepali mugati mwanyenye, na ukuvapela uludali ukukwisa sila isitegana na mwealahosekise umwene.

14Mupigage chekivesaga kitang'ula nambi lubesa, 15sambi muve avanu avesiwe, vagaya lubi lwakulongwa, wita avana vagolofu va Nguluvi vevakwikala mung'i iyi imbi ya uwuyasi. Samumalavadika pagatinagati pavene wita ing'eng'esi wesasing'alika kwilanga, 16wemukwinatila hilo ulukani lwe luvapoka. Na ipo pepene pe nane sa mba na lwa ukwivahila mu kimunyi kila cha Kilisito, ipo pesaluwoneka pawelu ukuta uwupifu wangu na ikipigo changu sisafiyaga chaka nangi.

17Nambi nawulwe ukwimila avangi pamwinga ulufuuwo lwenyu ululi nambika kwa Nguluvi, Sweno, ndihekelela hilo na ukuvahanza nayi nyenye mbemuli muluhekelelo lulo. 18Lwindahihyo, nayinyenye luvavaje ukuhekelela na ukunyanza nayinene muluhekelelo lwenyu.

Timoti na Epafolodito

19Wone Umutwa Yesu awende ndina luhuvi ukuta nywana ukumutuma Timoti aase ukwenyu lusika lulu, sambi ng'angaswe umutima pemulike ing'ani senyu. 20Nene ndimugaya munu yungi yeindawe umwene yeakuvagudila nyenye kwa mutima. 21Neke avangi mbevali vigudila sisawo vileka ukugudila ing'ani sa Yesu Kilisito. 22Nayinyenye mukulukagula ulwa uwukangafu wa Timoti, umwene na nene wita Umwana na Udade, tukapigite ikipigo pamwi nave ukwimila Ulukani Ulunofu, 23sweno, ndihosa ukumutuma ukwenyu, pe mba ndilukagwe lwelupigika kwa nene pambele. 24Na yinene, ndihuvye mulu Mutwa ukuta nane nywanite ukusa ukwenyu si musika.

25Mbwene lunofu ndimutume ukwenyu umunyalukolo vetu Epafolodito, ye muyangu mukipigo na mwigalu kangi ye e mutume venyu ananzile nene mwa fyendegulwime. 26Ahele idoboka hilo ukuvawona nyenye mbemuli na akahuguvee hilo pakuva mukapulike ukuta ake mutamwa. 27Nachene ake mutamwa imbungo yike ngomi ya fwa. Neke Nguluvi amuwonie ulusungu, na siukuta iyena hela, pesi ukuta nayinene kangi sambi ndemwe ukuhuguvala pakomi ukwimila lulo. 28Sweno, nene ndisugunala hilo ukumutuma aase ukwenyu, sambi pemumuwene muhekelele kangi na uwuhuguvafu wangu wusile. 29Mu mumwanukila muluhekelelo ulukomi, nda munyalukolo mulu Mutwa. Luvavaje ukuva na ichoga kwa avanu avindawe umwene, 30pakuva umwene, ali itawe uwumi wakwe mwa mbesili na supwe padodo afwe ukwimila ikipigo cha Kilisito, sambi alete uwutanzi wenyu we nyenye mwalemilwe ukuwuleta.

Currently Selected:

Avafilipi 2: HeNT2004

Highlight

Copy