Avafilipi 1

1Yenene Pawulo na Timoti, avakami va Yesu kilisito, tukuvandikila nyenye mwevanu va Nguluvi ye muli uko ku Filipi yemukahangite na Kilisito Yesu pamwinga na nyenye avalongosi#1:1 Avalongosi: Vevala avimilisi apangi va Asikofu. na avatanzi#1:1 Avatanzi: Vevala avatangilisi apangi va Semasi. mu likanisa.

2Tukuvasukila uwuwuya ukuhuma kwa Nguluvi udadetu na ukuhuma kulu Mutwa Yesu Kilisito.

Ulwifunyo lwa Pawulo ukwimila Avafilipi

3Ngumulumba Nguluvi vangu pembesaga nguviwuka, 4na pembesaga nguvasukila mbemuli, ngwifunya muluhekelelo, 5ndiva na ikilumbo ukwimila uwulilumwi we mwinawo mu Lukani Ulunofu uluhuma ikimunyi icha ukutala ukufika neng'ino. 6Sweno, ngwihuvila ukuta Nguluvi yeavanzile ikipigo iki ikinofu mwanyenye, agina ukukivinia mbaka kikwilanikile mu kimunyi cha Kilisito Yesu. 7Ulo lwelulo lwelumbaje ndivahosekese, pakuva nguviwuka mbepali munumbula yangu. Kangi pakuva nyenye mbemuli mukahangite mu wunofu weamelye Nguluvi, wa ukululolela nu kulukangasa Ulukani Ulunofu, lino pendili mundinde na kangi pala pamwandi pende ndimutemapangu. 8Nguluvi ye molelesi ukuta ndilonga lwa nachene pendiginalisa ukuta, muwende wuwula wa Yesu Kilisito ndidoboka ukuvawona.

9Lwengwifunya lwe ulu; ndisuka uwende wenyu wuginage ukongelekela ukulutila pamwinga nu wuseela wa nachene na lweluvesaga luhala, 10sambi muhwane ukuhagula ulukani ulunoje hilo. Ipo pepene pemuva mwesiwe simwilongwa fivi mulukani lweluvesaga lula pa ikimunyi kila cha Kilisito. 11Uwunani wenyu sawumema mbesili isa nachene na inofu, sila se Yesu Kilisito umwene avapela, ukwimila indolo na ululumbo lwa Nguluvi.

Ukunana kwe kumupigila Kilisito

12Vanyalukolo vangu, ndiwenda mulukagule ukuta mbesili sesikafikite sikananzile pakomi mukulutagalisa Ulukani Ulunofu. 13Ukuhumila siso, avalolesi mbevali va mwivaha pamwinga na avangi ipa vakulukagula ukuta ndimusope mundinde ukwimila Kilisito. 14Na kono ukusopwa mundinde kukambwise avanyalukolo wolofu vave na ulufuuwo kulu Mutwa, na vakave vapifu ukuludalika ulukani lwa Nguluvi vagaya muhwehwe. 15Nachene avamwi vawo vakumudalika Kilisito pakuva vina gila na kangi vanu vanyalwitakilo; neke avangi vakumudalika munumbula ngolofu. 16Iva vavipiga lulo ukwimila uwende, pakuva vakulukagula ukuta Nguluvi amelye nene ikipigo iki cha ukululolela Ulukani Ulunofu. 17Iwo avangi vakumudalika Kilisito kwa ukwitalanisa hela simukwimila munumbula ingolofu nda, vihosa ukuta pevapigite ndahihyo vasongela nene ngine ukuva muluteseko umu mundinde. 18Ulwene ulo sikinu nda! Nene ndihekelela wone avanu vakumudalika Kilisito mung'asi mbesili, wone luve muwunofu na apangi mung'asi imbi. Kangi nene ngina hilo ukuhekelela, 19pakuva ngulukagula ukuta ukwimila kwifunya kwenyu na muwutanzi wa Umuhe va Yesu Kilisito, nene ng'ombolwa. 20Chendidoboka na uluhuvi lwangu ukuta mwambesili nene sineema ukukwisa ikipigo changu, pesi ukuta mba na mutima mukangafu imisika mbegili na hilo ulusika ulu, sambi ukukola uwunani wangu mbewuli, mbe muwumi nambi mufwa, ndimuletele Kilisito ululumbo. 21Kulubali lwangu, ukunana ye Kilisito, na ukufwa kwileta ukwambula kukomi. 22neke, wone kwa ukunana nywana ukupiga ikipigo chekileta ukwambula ukukomi, sweno, singulukagula manyi, mbi nyagulage ululikwi! 23Lino ndilaving'ana na isi isivili isiling'ene mbesili. Ndidoboka ukuta nyege muwumi uwu ngikale pamwinga na Kilisito, ulukani ulu lwelwinoga hilo; 24neke ulukani lwelwinoga hilo kwa nyenye nene mbelage penana. 25Ngulukagula hilo ulukani ulu, ukuta nene mba penana pamwinga na nyenye mbemuli, sambi ndivatange mongelekele uluhekelelo, 26sweno, pembe na nyenye kangi, muva na kinu cha ukwivahila ukwimila nene mukuhanga na Kilisito Yesu.

27Sweno, ulukani ulukomi kwekuta imigendele jenyu ginatilage chetwisaka Ulukani Ulunofu lwa Kilisito, sambi wone nywane ukusa ukwenyu na apangi wone neeme sambi ndipulikile nambi padodo hela ukuta mwimile mukange mwidonya lukani lumwi mbeluli na ukuta mwihoma ligalu we mwilaganila kumwi mbemuli ukwimila ulufuuwo lwa Ulukani Ulunofu. 28Mutane ukogopa chechekivesaga icha vemukwitalanisa nawo. Iki kiva kilagilo ikilipelu ukwawo chekivadenya, pesi ulwa uwupoki wenyu uwihuma kwa Nguluvi. 29Pakuva nyenye mwivapele uwunofu mukumupigila Kilisito si ukukola hela ukumufuuwa pesi kangi ukukola ukuteseka ukwimila umwene. 30Lino muhwanite muhange na nene mukuhoma ligalu. Iligalu ili lyelila lyemwambwene nene ndihoma pala pamwandi, na kulino penyoma ndawe lwe mwipulikaga.

Currently Selected:

Avafilipi 1: HeNT2004

Highlight

Copy