Maliko 16

Ukusilibuka kwa Yesu

(Matayo 28:1-8; Luka 24:1-12; Yohane 20:1-10)

1Isabato yavelige yilutila Maliya Magadalena na Maliya uyuve va Yakobo, na Salome vagusile amafuta aginung'ilila wunofu sambi vabite vakagubake umufimba gwa Yesu. 2Vilaafile wemilawu, ikimunyi cha pa Jumapili, vahele kuchanga, ilisuva mwelihohomoka. 3Neke vavange ukwilonganza vavene, “Ye nani yeabidusa iliganga pala pa mulyango gwa ichanga?” 4Na vavelige vilava wunofu, valiwene iliganga libidukise palubali. (pakuva iliganga lye likomi kangi lisito) 5Swe vakwingila mugati muchanga vakumuwona umunyakilambo ateng'eme kwiwoko ilya kundyo, afwite umwenda umwelu, neke vasasavale.

6Nave avatigee, “Mulasasavala. Mukumusaka Yesu Umunasaleti yevakamutumbike. Asilibwike asupali ipa. Mulavage peakemuvike. 7Lino mubitage, mukavalongele avanyigendo vakwe, nayi Petulo ukutigila, ilongola ukubita ku Galilaya. Uko kwe musakumuwona, ndawe lwealavalonje.”

8Swe vihuma pivala, vikimbila uluhuma pachanga pakuva vevibatike na umuhwehwe kono we vikuvila. Sivamulonji nave munu lukani, pakuva wogopige.

Yesu akwilagila kwa Maliya Magadalena

(Matayo 28:9-10; Yohane 20:11-18)

[ 9Nave Yesu pe isilibuka, ikimunyi cha pa Jumapili, we pemilawu ilaje kwa Maliya Magadalena, yula yealamuhumise amasoka gimufung'ati. 10Umung'inetu uyo ahele kukuvalongela avayagwe mbevali, nawo vepevavemba na ukuyeyela. 11Nawo vavelige vipulika ulwa mumi, na yi Maliya Magadalena amuwene, sivafuuvitwi.

Yesu akwilagila ku vanyigendo avavili

(Luka 24:13-35)

12Na peyelulutye ulo, Yesu ilaje ku avanu avavili, we ina lwihwano lungi. Nawo vabitige kumigunda. 13Avanu iwo nawo vahele vakavalongele vala avangi. Navawo sivafuuvitwi.

Yesu akuvatuma avanyigendo

(Matayo 28:16-20; Luka 24:36-49; Yohane 20:19-23; Ifipigo 1:6-8)

14Pambele Yesu ilaje kwa vala vanyigendo vanyichumi na yumwi pevalisige. Neke avakenyele ukwimila uwutalamu wawo na uwusito wa inumbula sawo pakufuuwa ing'ani isa mbevali vevavalongelige ukutigila asilibwike uluhuma kuvafwe. 15Swe akuvalongela, “Mubitage konivala mbekuli, mukadalikage Ulukani Ulunofu kwa mbevali. 16Yula yeyeavesaga ifuuwa na ukubatisiwa saapokwa, neke yesiifuuwa saahigwa. 17Na ifilagilo ifi figendasa na avifuuwa: mwitawa lyangu vahumya amasoka, valonga indongele ingenzi. 18Vibata inzoka, na vanywe mugoda mukali siwuvagita kinu nda. Vavavikila avatamwa amawoko gawo nawo vapona.”

Yesu ibita kuchanya

(Luka 24:50-53; Ifipigo 1:9-11)

19Neke Umutwa avelige yalongine nawo, swe itegulwa kuchanya, na ukuteng'emala kwiwoko ilya kundyo kwa Nguluvi. 20Nawo vala avanyigendo vahesile, nawo vahele vakidalika mbekuli. Na Nguluvi apigige ifipigo pamwinga nawo, na ukusikangasa Ulukani ikola ifilagilo fyevagendasige nalo.]

Currently Selected:

Maliko 16: HeNT2004

Highlight

Copy