Luka 6

Vakwiwusa ulwa Ikimunyi icha Isabato

(Matayo 12:1-8; Maliko 2:23-28)

1Ikimunyi ikimwi cha isabato, Yesu na vanyigendo vakwe valutilige mumigunda ija ingano, neke avanyigendo vakwe vadenyage amahoo ga ingano nu kufigiha mumawoko gawo na ukulya. 2Neke avafalisayo avamwi vatigile, “Ndawuli mwipiga ulukani lwesilulagile ukupigwa mukimunyi cha isabato?” 3Swe Yesu akuvapitula, “Mbi simulimba wealagisile Daudi na avayagwe peali na inzala? Umwene na vala veali nawo. 4Lwe inje mukaye ya Nguluvi, neke egule imikate jejemivike pa Nguluvi, neke alye na ukuvapela avayagwe. Jejemikane na indagilo ukuta sikwali yahwanite ukulya pesi vavatambisi hela.” 5Neke avalongele, “Umwana va Umunu ye Mutwa va isabato.”

Umunu umunyaliwoko ilinyalitela

(Matayo 12:9-14; Maliko 3:1-6)

6Chave kangi ikimunyi ikingi cha isabato, Yesu inje musinagogi akwigisa, mumo e mwali umunu ye iliwoko lyakwe lya kundyo lye linyalitela. 7Avigisi va indagilo na avafalisayo vagahige sambi vamudadise, wone aponia umutamwa uyo mu kimunyi cha isabato vave na ulukani lwa ukumusongelela Yesu ukuta mwananzi. 8Neke Yesu agakagule amahosa gawo, swe akumutigila yula umunyaliwoko ilinyalitela, “Wuke wime ipa.” 9Neke Yesu avatigile, “Nene nguvawusa nyenye lulagile mu ikimunyi cha isabato ukupiga inofu nu kupiga imbi, ukuponia uwumi na ukuwulaga?” 10Peyeavalavye mbevali swe akumutigila umunu yula, “Golole iliwoko lyako.” Swe igita ndahihyo, neke iliwoko lyakwe liponage. 11Swe mbevali vivipa, vakwing'ulanza lwe vamupigila Yesu.

Yesu ihagula avigendo ichumi na vavili

(Matayo 10:1-4; Maliko 3:13-19)

12Mufilo ifyo Yesu ahele kukidunda kukwifunya, neke ifunyage ikilo mbekili kwa Nguluvi. 13Kwavelige kwicha, avakemelye avanyigendo vakwe, neke uluhuma mwa iwo ahagule vanyichumi na vavili, nu kuvatambula vigendo: 14Simoni, (ye amupelye ilitawa ilya Petulo), na Andeleya umwanakwawo, Yakobo na Yohane, na Filipo, na Batolomayo, 15na Matayo, na Tomasi, Yakobo umwana va Alifayo na Simoni (yevamukemelige Selote), 16na Yuda umwanakwawo va Yakobo, na Yuda Isikalyote yula yeamupitwike Yesu.

Yesu akwigisa na ukuponia

(Matayo 4:23-25)

17Ave isulunuka nawo uluhuma kukidunda swe akwima apono apatendemafu, pamwi na ililugu lya vanyigendo vakwe na amalugu ga avanu veve vahumite mu Yudaya mbeyili na mu Yelusalemu na mu mwani isa mu Tilo na mu Sidoni. Avali vaasile kukumupulikisa na ukuponesewa ifitamwa fyawo. 18Na vala mbevali avatokige na amasoka nawo vaponite. 19Na ililugu mbelili lyasakige ukumupamisa, pakuva uludali lwahumige mulumwene na ukuvaponia avanu mbevali.

Uwufunyilile na ululeko

(Matayo 5:1-12)

20Ndawe Yesu avalavilige avanyigendo vakwe, neke atigile:

“Mwivafunyilile mwevamikaa,

pakuva Uwutwa wa Nguluvi wenyu.

21Mwivafunyilile nyenye ye mwina inzala lino,

pakuva samwiguta.

Mwivafunyilile nyenye yemwivemba lino,

pakuva samuheka.

22Mwivafunyilile nyenye wone avanu vavavipile, vavabagule, vavalige na ukulibedalila ng'ani ilitawa lyenyu wita kinu chaafu, ukwimila Umwana va Umunu. 23Nyenye ikimunyi icho samuhekelelage nu kukima, pakuva, uluhombo lwenyu saluva lukomi kuchanya. Pakuva avadadawo vavapije ndahihyo avavisi.

24Neke mwinaluleko nyenye nye vanono,

pakuva nyenye yemwanuche ulusikimiko lwenyu.

25Mwinaluleko nyenye yemwigwita lino,

pakuva samudagana.

Mwinaluleko nyenye yemwiheka lino,

pakuva samuhuguvala na ukuvemba.

26Mwinaluleko nyenye, pemwisumilwa na avanu mbevali,

pakuva avadadawo vavapije ndahihyo avavisi va uwudesi.

Ukuvenda avatavangu

(Matayo 5:38-48; 7:12a)

27“Neke nene nguvalongela nyenye yemwipulika, muvendage avatavangu venyu muvapigilage inofu vala avakuvapigila nyenye. 28Muvafunyililage vala avakuvakotola nyenye, muvasukilage avakuvaliga nyenye. 29Umunu yeakukutova pa ulusese ulungi, lekage akutove na luyalo, na yeipoka umwenda gwako mulekelage na yisopeka yako. 30Yeavesaga yeakukusuka veve kinu mupelage, na yeakukupoka ifyako, ulatigila akupilulile. 31Muvapigilage avanu ndawe lwemwiwenda nyenye ukupigilwa.

32“Wone muvende vala avakuvenda nyenye muva na kiki ikilutye? Pakuva na vanyanzanangifu vakuvenda vala avanyawiyendi vawo. 33Wone muvapigile inofu vala avakuvapigila inofu nyenye, muva na kiki ikilutye? Pakuva na vanyanzanangifu vavipiga siso. 34Wone muvapele ifya umukole avanu vala vemukwihuvila ukuta vavapilulila muva na kiki ikilutye? Pakuva na vanyanzanangifu vakuvapela ifya umukole avanyanzanangifu vayawo, sambi vapilulilwe ifilutye. 35Nyenye muvendage avatavangu venyu, nu kuvapigila inofu, mutawulage kitapilulilwa, na ikipelwa chenyu sakiva kikomi, samuva mwivana va Nguluvi yalikuchanya. Pakuva umwene muwuya kwa avagaya kilumbo na avanangifu. 36Muvelage mwivanyalusungu, ndawe Dadenyu lwe munyalusungu.

Ukuhiga avangi

(Matayo 7:1-5)

37“Mulavahiga avangi nanye sisamuhigwa, mulavasokama fibi avangi nanye sisamusokamwa fibi, muvadegepelage avangi nanye mudegepelwa. 38Muvapelage avangi fyevagulwime nanye samupelwa. Ena, mwanukila mumawoko genyu ikigelo ikimemite kidinile nu kuhingilisiwa nu kubohoka, pakuva ikigelo kikila chemwigelanikisa avangi kicho chesaavagelanikisa Nguluvi.”

39Neke avalongele ikiganiso: “Ndawuli umunu umubofu ahwanite amusogose umubofu umuyagwe? Sivagwila we vavili mwikombo? 40Umunyigendo sahwanite ukumulutila umwigisi vakwe, na pe ave akulwe wunofu ipo peahwana ukutegana na umwigisi vakwe. 41Ndawuli veve wilava ikibandi chekili muliho lya umuyago, neke ulemwe ukuluwona ulwangiko lweluli muliho lyako veve? 42Ino umulongela ndawuli umuyago ukuta, ‘Be! Leke nguhese ikibandi chekili muliho lyako.’ Kono wesiukuluwona ulwangiko lweluli muliho lyako veve? Wimubuganisi veve hese tandi ulwangiko lweluli muliho lyako ipo pepene pulava wunofu peuhwana uhese ikibandi chekili muliho lya umuyago.

Umubiki na amaveleko gakwe

(Matayo 7:17-20; 12:34b-35)

43“Pakuva Sikoguli umubiki umunofu gwegwagwiveleka amaveleko amabi, na kangi umubiki umubi gwegwagwiveleka amaveleko amanofu. 44Pakuva umubiki gugweguvesaga gwagwikagulika ukwimila amaveleko gakwe. Pakuva mumifwa sitwatwikova amaveleko aga umusombe, nave amaveleko aga imisabibu uluhuma mumibigili. 45Umunu umunofu uluhuma mukisande cha inumbula yakwe ayihumya ing'ani inofu, ndahihyo na yumunu umwanangifu, nave aihumya inzanangifu uluhuma mukisande cha munumbula yakwe, pakuva umunu ayilonga siso isimumemite munumbula yakwe.

Avasenzi avalipavili

(Matayo 7:24-27)

46“Ndawuli mukung'emela nene, ‘Mutwa, Mutwa’, na kono we simwipiga senguvalongela nene? 47Umunu yeyeavesaga akusa kwa nene nu kupulikisa ing'ani sangu nu kupiga, ndivalagila lwe ihwana: 48uyo ihwana na umunu yeisenga ikaye, mulutu uluyave hilo mbaka pasi apakangafu na peyusile ing'uka ululenga lwatofile; ikaye yila, neke yilemwe ukugwa pakuva yenzenge wunofu. 49Neke yula yeaipulika neke alemwe ukupiga ihwana na umunu yeasenzile ikaye muchanya muluhanga apagaya lutu. Ing'uka ya lulenga swe yitova sukumwi hela nu kugwa, nu kung'enyangika!”

Currently Selected:

Luka 6: HeNT2004

Highlight

Copy