Luka 5

Yesu ikemela avanyigendo ava ukutala

(Matayo 4:18-22; Maliko 1:16-20)

1Ikimunyi ikimwi Yesu eimite pa mwani ya inyanza ya ku Genesaleti, na avanu wolofu vamupilime wevibanite, vipulikisa ulukani lwa Nguluvi. 2Afiwene ifipugu fivili palubali lwa inyanza, avanyamwenafyo vevevalofi vali vahumite vakofuga ifilovelo fyawo. 3Ave Yesu akwingila mukipugu ikimwi kila cheche cha Simoni, neke amusuke akihegelese pawutalo padodo ukuhuma panyanza. Swe iteng'emala mumo, ndawe avangige ukwigisa avanu we alimukipugu. 4Avelige isinda ukulonga amutige Simoni, “Sindike ikipugu kula kululenga ulutaali mutoose ifilovelo fyenyu sambi mulove isomba.” 5Neke Simoni amupitule, “Mulugu tugudite ikilo mbekili sitwambulii kinu, lino pakuva ye ulonzile noosa ifilovelo.” 6Vavelige vitoosa valofile isomba nzolofu wuhulo, na ifilovelo fyawo fyavanzile ukudemuka. 7Swe vakuvasinisa avayawo veve mukipugu ikingi vaase vavatange. Ndawe vaasige neke pevamemye isomba ifipugu mbefili wefivili, supwe nafyo fivange ukusuda mululenga. 8Simoni Petulo avelige akuluwona ulu, afugime pa magulu ga Yesu itigila, “Hege panene, pakuva nene ndi munyanzanangifu, Mutwa.” 9Umwene na avayagwe mbevali vahahite uwolofu uwa isomba sevevalofile. 10Na avayawo va Yakobo na Yohane avana va Sebedayo nawo vahahite ndahihyo. Neke Yesu amutigile Simoni, “Ulava na muhwehwe; uluhuma lino, uva wimulofi va avanu.” 11Swe vavelige vakwegamika ifipugu fyawo pamwani, swe vakufileka mbefili na ukuvanga ukumuninila Yesu.

Yesu akumwesa umunyawukoma

(Matayo 8:1-4; Maliko 1:40-45)

12Yesu peali muboma iyimwi aasile umunu umutamwa uwukoma umuvili mbeguli; avelige akumuwona Yesu agwe kinyalileme, kono we akumugongola, “Mutwa wone wiwenda, wihwana unzese.”

13Ndawe Yesu agololige iliwoko lyakwe akumupamisa itigila “Ndiwenda wele.” Swe ulusika lulo uwukoma wipona. 14Neke amulagise, “Ulamulongela munu, pesi ulwa lino bitage ukilagile kulumutambisi, ukatawule ifitawulwa ukwimila ukwesewa kwako ndawe alaje Musa wuve wolelesi kwavene ukuta yeuponite.”

15Pamwinga na ulo, ing'ani sakwe Yesu pepene pesaginite ukutagalila mbekuli, na amalugu ga vanu gakong'ine kukumupulikisa na ukuponesewa uwuhomefu wawo. 16Neke umwene anyelebuke abite kubalali ukwifunya.

Yesu akumuponia umunyalitela

(Matayo 9:1-8; Maliko 2:1-12)

17Ikimunyi ikimwi mufilo ifyo pe Yesu igisige, avafalisayo na avigisi va indagilo uluhuma mufijiji ifya mu Galilaya mu Yudaya na mu Yelusalemu vevateng'eme baho. Na uludali lwa Umutwa lwe lulipamwi na umwene mukuponia. 18Lavage, vaasile avanu vamutegwe umunu mulupasa yeali mutamwa ilitela. Vasakige vamwingise kugati vamuvike peepwali Yesu. 19Neke valemwe pakwingila, pakuva ililugu lya avanu lye likomi pepagaya kilega, swe vakwilila kwiking'a visalula padodo sambi vamwise mulupasa kidonya pa Yesu. 20Avelige akuluwona ulufuuwo lwawo, neke atigile, “Muyawe udegepilwe inzanangifu sako.”

21Neke avigisi va indagilo na avafalisayo vavange ukwiwusa vitigila, “Ye nani uyu yakumuliga Nguluvi? Ye nani yeahwanite ukudegepela inzanangifu pe si Nguluvi hela ye iyena?” 22Yesu avelige akusikagula seviwusige, neke avatigile, “Ndawuli mukwiwusa munumbula senyu? 23Ulupefu lulikwi ukutigila, ‘Inzanangifu sako udegepilwe’, na ukutigila, ‘Wuke wibitilage?’ 24Sambi mulukagule ukuta Umwana va Umunu ina ludali konivala ukudegepela inzanangifu.” Neke amutigile yula yeali mutamwa litela, “Ngukulongela veve, hege tegule ulupasa lwako wibitile kukaye.” 25Ulusika lulo swe akwima pamiho gawo, na ukutegula ulupasa swe ibitaga ukwawo, kono we akumulumba Nguluvi. 26Neke mbevali vibatike na ulusasavalo na ukumulumba Nguluvi, we vina muhwehwe vitigila, “Setusiwene neng'ino situlutye uluhala!”

Levi ikemelwa

(Matayo 9:9-13; Maliko 2:13-17)

27Neke pambele, Yesu ahumite swe akumuwona Umunu umukong'asa imbemenenge itambulwa Levi ateng'ime pakaye ya imbemenenge, swe akumutigila, “Ninile!” 28Swe akufileka mbefili, nu kumuninila. 29Swe Levi akumuwuyapila ikiwungo ikikomi mukaye yakwe. Avakemele na avakong'asa imbemenenge vayagwe na avangi vahange ukulya. 30Avafalisayo na avigisi vawo va indagilo, vavang'ulite avanyigendo vitigila: “Kumbi ndawuli nyenye mwilya na ukunywa pamwi na avakong'asa imbemenenge na avanyanzanangifu?” 31Neke Yesu avapitwe, “Avanya pa muvili panofu sivigulumagi mukofi, pesi avatamwa. 32Nene sindasili kukemela avagolofu nda, pesi avanyanzanangifu vapele.”

Ulwa ukwiyima ukulya

(Matayo 9:14-17; Maliko 2:18-22)

33Neke vamulongelage, “Avanyigendo va Yohane kolofu vayikwiyima ukulya nu kwifunya, na avanyigendo va avafalisayo nawo vavigita ndahihyo, neke avanyigendo vako vavilya na ukunywa.” 34Neke Yesu avatigile, “Mwiwona ndawuli luhwanite ukuvatanila avalaalike kuluwungo viyime ukulya munyaluwungo we pealibaho? 35Neke ifilo safyusa, pesa vamuhesise umunyaluwungo apawo ipo pepene pesaviyima ukulya ifilo fifyo.”

36Avalonje ululongwa, “Sikwali umunu yeaidemula ikipapiko mu mwenda umupya; neke akahonelese icho mwenda umulovela pakuva pagisile ndahihyo ava ademwe umwenda umupya na umulovela gusakalila ng'ani. 37Na kangi sikwali umunu yeaisopa idifayi imya mufihela ifilovela; na wone asope idifayi iyo imya yitudisa ifihela ifyo, nayi difayi yibohoka na ifihela fyanangika. 38Idifayi imya yayisopwa mufihela ifipya. 39Kangi sikwali yeanywe idifayi indovela yeadobokela imya pakuva aitigila indovela ye nono.”

Currently Selected:

Luka 5: HeNT2004

Highlight

Copy