Luka 16
16
Umwimilisi yesimuhuvilwa
1Yesu avalonje avanyigendo vakwe, “Epwali umunu uyumwi umunono yeeina umwimilisi vakwe. Umwimilisi uyo emusongele kulumwene ukuta aitagalisa ifinu fyakwe. 2Ndawe amukemelige nu kumutigila: ‘Ng'ani sa kinyandawuli isi sendipulika kwa veve valile ifya uwimilisi wako? Pakuva suva kangi wi mwimilisi’ 3Umwimilisi yula swe itigila munumbula yakwe: ‘Ngitage ndawuli? Pakuva umuvina vangu yeakunyesekesa uwimilisi; ukulima sinywana, ukusuka ngwiwona inyoni. 4Ndilukagula lwe miga, sambi penyesile muwimilisi, vang'emele mukaye sawo.’ 5Ndawe avakemelige yumwi yumwi vala avanyamikole va umuvina vakwe, akumulongela uva kutala: ‘Wina mukole muki kulu muvina vangu?’ 6Neke atigile: ‘Mapipa ligana ga mafuta ga wuto.’ Swe akumutigila: ‘Wangufye utegule ichandikilo teng'emale wandike machumi gahanu.’ 7Uyungi: ‘Nave wina mukole gwa kiki?’ Ndawe amulongelige itigila: ‘Magunila ligana ga ingano.’ Swe akumulongela: ‘Wangufye utegule ichandikilo wandike machumi gimunana.’
8“Ndawe umuvina yula amusumilige umwimilisi yula yesimuhuvilwa, uwimila palula lweapigite kwa luhala. Pakuva avana va mung'i mumbegalo yawo vaviva vina luhala ukulutila avana va ulung'ali.”
9Nani nguvalongela, “Mwisakilage avanyawiyendi venyu uwimila ifinu fya mung'i, sambi pefisisile vavanukile muwikalo wa mbepali. 10Yeyeavesaga muhuvilwa mufinu fidodo ava muhuvilwa mufinu ifikomi, yeyeavesaga simuhuvilwa mufinu ifidodo sisa ava muhuvilwa mufinu ifikomi. 11Wone lino nyenye muve simwihuvilwa mufinu ifibi ifya mung'i, ye nani yeavavisikisa ifinu ifya nachene? 12Wone nyenye simwivahuvilwa mu finu ifya umunu yungi, ye nani yeavavisikisa ifinu ifyenyu yinyenye?
13“Sikwali umukami yeahwana ukupigila avavina vavili, pakuva yeamuvipigila uyu nu kumwenda uyu, apangi amufuuwa uyu nu kumubedala uyu. Simuhwana ukumupila Nguluvi na uwunono.”
Indongwa sa Yesu
(Matayo 11:12-13; 5:31-32; Maliko 10:11-12)
14Swe Avafalisayo aviwendaga amagobole vapulike iso mbesili neke vamubedale Yesu. 15Swe akuvalongela, “Nyenye ye nyenye yemwakisakila uwugolofu pamiho ga vanu, neke Nguluvi avasele munumbula senyu, pakuva ulutambule pa avanu luvifyo pa Nguluvi.
16“Indagilo na uwandike wa avavisi fyepofili mbaka ulusika lwa Yohane. Uluhuma ipo Ulukani Ulunofu lwa uwutwa wa Nguluvi lwidalikwa, na yeyeakwingila akwingila kwa ludali. 17Neke lupefu hilo ililanga na ing'i ukulutila, neke silupefu ukuyaga nambi wandike wudodo wa Indagilo.
18“Yeyeamulekaga uvakwe na ukutegula umung'inetu uyungi, uyo iva mugoni nave yakumutegula umung'inetu yealesilwe nave iva mugoni.”
Umunono na Lasalo
19Neke Yesu atigile, “Epwali umunu uyumwi umunono, yeafwalige imyenda iminyakilesi, na imyenda ja uwutwa na ukulya ifinono mbepali. 20Na umumikaa uyumwi ilitawa lyakwe Lasalo, avikigwe pakinyamulyango pakwe, yee ina fikong'o umuvili mbeguli, 21nave adobokige apelwe uwuwuluwulu wewagwisige pawulilo wa umunono, na imbwa saasige sikumunava ifikong'o fyakwe!
22“Neke umumikaa yula afwe, ndawe vamutegulige vanyivaha va Nguluvi mbaka pa Abulahamu. Nave umunono swe ifwa nu kutagwa. 23Ino kuvafwe peiteseka ave ilava amuwene Abulahamu, kwa pataali na Lasalo valipamwi. 24Swe, ivemba weitigila: ‘Dada ve Abulahamu, undegepele, umutume Lasalo asabike ichala chakwe mululenga sambi adegefye ululimi lwangu, pakuva nditeseka mumoto ugu.’ 25Abulahamu neke amutigile: ‘Mwanangu, wiwukage ukutigila veve wanuchee ifinu ifinofu fyako pa wumi wako, nayi Lasalo eina luteseko ndahihyo. Na lino umwene ali ipa isikimikwa na veve wipuma. 26Pamwi na iso, pagati nagati pa hwehwe na nyenye pina likombo ilihelesa, sambi vevisaka ukusa kwa nyeye uluhuma kono valemwe, na avisaka ukuhuma ukwenyu vaase kwa hwehwe valemwe.’ 27Yula yee munono neke atigile, ‘Apo kuku ngukusuka umutume abite kukaye ya dada vangu, 28pakuva ndina vanakwetu vahanu, sambi avapavile valonga vaase nawo apono ipa paluteseko.’ 29Neke Abulahamu atigile: ‘Vinawo Musa na avavisi; vavapulikage vawo.’ 30Neke patigile: ‘Ndala, dada Abulahamu, peahele umunu yahumile kono kuvafwe vapela.’ 31Neke amutigile: ‘pesivavapuliki Musa na avavisi, sisavapulika nambi umunu asilibwike uluhuma kuvafwe, sivafuuwa nangi.’”
Currently Selected:
Luka 16: HeNT2004
Highlight
Share
Copy
Want to have your highlights saved across all your devices? Sign up or sign in
Kihehe New Testament © Bible Society of Tanzania, 2004.
