Maliko 6

ũYesu wishiitua kuNazaleti

(Mt 13:53-58; Lk 4:16-30)

1Nulega kuasio, nuenda kunsiao, nĩamanigua aakue naamutiata. 2Pĩna alĩ lutondo lwa wikyali, nuandia kwimania mũshũnagogi. Iingĩ, pĩna naiigia naakũmia, naiũga, upũnilie mpĩĩ izi? Kangĩ masala kĩ naalĩ mupeegue uyu? Nĩmakula kĩna aya ma mĩkono yakue mitendeka mbii? 3Sika wayune umuseesi, umuana wa kĩMalia, munũna wa kĩYakobo nũYose nũYuda nuSimoni? Nĩagũlĩ aakue akutilĩne pana nsĩĩtu? Naamukilua. 4ũYesu nuaĩĩla, munakĩdagu sikukuulagiaa kikyulio isiitũla munsĩĩ yaakue nukuluuli luakue, numunumba yaakue. 5Kuasio sika nusũũma kwitenda kikyula kalĩmuĩ, ĩpa aluĩĩkĩĩle ĩmĩkono yaakue udũũ mualuĩle akeei nuakamia. 6Nukulĩlua kuusiitishuĩĩla waao.

Kwitumua kumuao naikyumi naabĩlĩ

(Mt 10:5-15; Lk 9:1-6)

Nũipilima-pilimaa mũishaalĩ nukwimania. 7Nuĩĩta naikyumi naabĩlĩ, nuandia kukuatuma abĩlĩ abĩlĩ, nuapeela usũũmi mumasĩĩmuĩ. 8Nualagĩĩlia alekishola kampamba za munzĩla isiititũla ĩnkome dũũ, si mapũli, si mpĩnda, si mpeesa mumusipi; 9ĩpa ajiale ilaatu, aleke kĩkũmba ĩmĩnkũmbĩ ĩbĩlĩ. 10Nuaĩĩla, tũlũ pensi pĩna mũingĩla munumba, ĩĩmĩ muumo sunga mupũne kuasio. 11Nĩpaasio pĩna sika amusũgamĩĩlia katia kukumũigia, mulege paasio, lukũnũntĩ ulunkundĩ naluĩlĩ mumĩgulu yaani, wĩĩ ukuili kumiao. 12Naalongola, naatanantia ĩantu apele. 13Naaĩnga ĩmasĩĩmuĩ mingĩ muantu, naaapaka ĩmakũta ĩaluĩle, naaakamia.

Kwiulagua kwa kĩYohana Mubadĩĩzia

(Mt 14:1-12; Lk 9:7-9)

14Mutemi Helode nuziigia impola kunsooko ĩliina liakue alĩ lĩkũmuukile; nuũga, uYohana Mubadĩĩzia wiiukaa kwipũna muakiu, kunsooko ĩĩ makula mitenda mulĩmo munsĩ yaakue. 15ĩĨĩa naaũga, “Ingĩ Elia. ĩIĩa naaũga, ingĩ munakĩdagu, zĩ umuĩ wa anakĩdagu.” 16Ĩpa uHelode pĩna nũigia, nuũga, uyu wayu Yohana naalĩ numudumuĩle ityũe; wiiukile.

17Kuitĩ uHelode muene aluatumile antu numuguĩla uYohana, numutũnga kukĩtũngo kunsooko ya kĩHelodia, umusungu wa munũna waakue uPilipo; kunsooko alĩ wamutoolile. 18Kuitĩ uYohana alumuĩĩlĩĩle uHelode, mũiko kumuako kwitũla numusungu wa munũna waako. 19Ĩpa uHelodia nuĩĩka igyũndo kumuakue, nusiia kukumuulaga, sika nusũũma, 20kunsooko uHelode alumoopookile uYohana, alumumanile kĩna ingĩ muntu wa kulukuuluu namuelu, numukendegeela. Pĩna numũigia nukunguala dũu nunduyo alukumũigagiaa kuulumbi. 21Ĩpa ĩlioma naligyela pĩna ulutondo lwa kulelua kumuakue uHelode nalupika; nuazĩpĩlĩlia india ningĩ ĩakulu a kaa, ĩakulu a ulugu, nĩnaakũmuukile muGalĩlaya. 22uMunanso wa kĩHelodia nuina, numuloeelia uHelode nindĩo naalĩ yĩensi pandia. uMutemi numuĩĩla umunanso, nompa tũlũ nusiiile nĩkakukupeela. 23Numũilĩla ityunu, “Kiensi nukinompa nĩkakukupeela, sunga uutemi waane nĩkakukutiĩla pakatĩ.”

24Nupũna numuĩĩla unina, “Nompe yaani. Nuũga, ityue lya kĩYohana Mubadĩĩzia.” 25Ĩkamuĩ nũingĩla kuukaaũ pamutemi, nulompa nuũga, nasiia umpeele ino-iinoo mukĩsela ityũe lya kĩYohana Mubadĩĩzia. 26uMutemi, usungu nausululĩla, ĩpa kunsooko ya kũila ityunu, nĩaasio naikyalansile ninduyo, sika nuloogua kukumusiitĩlia. 27Ĩkamuĩ numutuma umukulu wa kĩtũngo, nulagĩĩlia ityũe liakue lĩleetue. Nulongola numudumula ityũe mukĩtũngo, 28nulĩleeta ityũe liakue mukisela, numupeela umunanso, numunanso numupeela unina waakue. 29ĩAmanigua pĩna naaziigia, naaaza naausola umuĩlĩ waakue, naamuĩĩka mukĩbĩĩla.

Kwishooka kumuao naikyumi naabĩlĩ

(Mt 14:13-21; Lk 9:10-17; Yn 6:1-14)

30Nĩatumua naĩlundĩĩla pakĩYesu naamuganuĩla tũlũ zensi naalĩ azitendile nukukuzimania. 31Nuaĩĩla, nzuĩ mwing'ene kĩna kutilĩ kaantu, musũũpie iniino. Kunsooko alĩ akoolĩ antu iingĩ naalĩ iiiza nukwienda, nalĩula kalioma lya kulĩa.

32Naalongola mwipyango ing'ene kĩna alĩ tilĩ kaantu. 33Antu naaaona alonguĩle, iingĩ naaamana, naamanka kuasio kwipũna ikaa tũlũ naapika mbele. 34Pĩna nulega mwipyango nuona mulundo mukulu, nuaonela kĩsuusu kuitĩ alĩ zĩ nkolo nangila kamudĩĩmi, nuandia kukuamania ningĩ.

ũYesu ukualĩĩsia antu 5000

35Matũngo mingĩ pĩna namakĩla, ĩamanigua aakue naamuagaana, naaũga, “Munu mbuga ntilĩ, ĩpaino wiilaa. 36Alage alongole kumĩgunda nukũishaalĩ naipilimĩkĩlĩĩlie, ĩgulĩlie ĩkya kulĩa.” 37Nushookeelia, nuaĩĩla, apeelĩ uniinie kya kulĩa. naamuĩĩla, kulongolene kwigyula ĩmapũli ma shilinge magana mabĩlĩ, kuapeele alĩe. 38Nuaĩĩla, mutĩĩte mapũli manga. Longolĩ mulaae. Pĩna naamana, naaũga, “Mataano nishiĩ zibĩlĩ.” 39Nualagĩĩliaa aikyalansie ensi malindĩ-malindĩ, pamasanzĩ namatotũ. 40Naikyalansa nkĩlĩlĩ-nkĩlĩlĩ, ĩpĩĩa gyana, ĩpĩĩa makumi mataano. 41Pĩna numasola ĩmapũli namataano, ninshiĩ nazibĩlĩ, nulangamĩla kwigyulu, numakembeta numaega ĩmapũli nuatiĩnkania ensi. 42Naalĩa ensi naikyuta, 43Naasola ĩmaminangulua, naijulia ityooto kyumi naibĩlĩ, nĩma nsiĩ gaa. 44Nĩnaalĩ amalĩĩle ĩmapũli alĩ agoosia maagana ma nzogũ matano.

ũYesu wigenda mukiania ya nanza

(Mt 14:22-33; Yn 6:15-21)

45Ĩkamuĩ nuakangasĩĩlia ĩamanigua aakue ingĩle mwipyango, atongele kwityumbĩ kuBetisaida, pĩna uyo alukuulaga umulundo. 46Pĩna nualaga, nuenda kunkonko kwilompa.

47Pĩna niĩ mpĩndĩ, ipyango ali kĩlĩ liĩlĩ pakatĩ ya nanza, nduyo alĩ wing'ene pikiki. 48Nuaona akĩsinka kukulĩgendia ipyango kunsooko ĩnzega alĩpũnile kuntongela. Naitũla gyĩngu nwĩaagaana nwigenda munanza nuĩ zĩ ukuakĩla. 49Pĩna naamuona wigenda munanza naasĩĩga kĩna mwĩntũnga, naakuuta 50kunsooko tũlũ alĩ amuoonie, naakankanala. Ĩkamuĩ nwĩtambuĩla nĩndĩo, nuaĩĩla, kamiĩ nkolo, ingĩ neene, lekioopokĩ! 51Nunankĩla mwipyango muna alĩ ĩĩlĩ; ĩnzega nĩtuula; naakulĩlua kwikĩlĩkĩĩla munkolo zaao, 52Kuitĩ sika alĩ alĩngile impola za mapũli, ĩpa inkolo zaao nazikapũka.

Ukamigua naalĩ utendekile kuGenesaleti

(Mt 14:34-36)

53Pĩna naapũũta, naapika kunsĩĩ ya Genesaleti, naĩĩma paapo. 54Pĩna naapũna mwipyango, ĩkamuĩ ĩantu naamulĩnga, 55naamanka naasapatĩla munsĩĩ niasio yensi. Naandia kukuakenka naaluĩle muulĩlĩ, paasio pĩna alĩ iigilie pĩna alĩ wĩĩlĩ. 56Tũlũ pensi pĩna alĩ wingĩĩle mũishaalĩ numukaa numumĩgunda, naaaĩĩka ĩaluĩle pigyulĩlo, naamupeepia alĩpaatie sunga ishogolo lya ntiila yaakue udũũ; ĩaasio naalĩ amupaatilie naakamia.

Currently Selected:

Maliko 6: KNT09

Highlight

Copy