Maliko 11

Yesu aingila Yelusalemu.

1-10.

1Wakibula hehi na Yelusalemu mwe muzi wa Betifage na wa Betaniya he mulima wa miziyaγembe, azatuma wahina wakwe waili, 2azawati: Hitai mwe kaja kazizi haja sheja! Kangi aho mkiingila mtaona ṅwana mpunda ashungiγweye, ashizatiye apandwe ni muntu. Mdoholei, mumlete! 3Ati muntu amiγamba: Nini mkiγoshola ivyoho?, mumγambe: Zumbe aagiziγwa ndiyo, ne atafikaituma na kunu. 4Wazahita, wazaona ṅwana mpunda ashungiγweye nkilii, ni hehi na silai, wazamdohola. 5Wantu kuṅwe waγolokewo haja wazawaγamba: Muγosholai mkidohola mpundangwa? 6Waja wazawalandula, sa viyaho Yesu awalaγilizevyo, ne wahowaleka. 7Wazaiiγala yuja ṅwampunda kwa Yesu, wazamtandika shuke zawe, wazamkweza Yesu. 8Wantu wangi wazatandika shuke zawe silai, watuhu wazashenga masala, wazayatandika silai. 9Waja walongolewo, hata waja wetongela wazakema: Hoziyana! Atogolwe mweiza mwe zina ja Zumbe! 10Utogolwe uzumbe wa tate yweshu Dawidi wetilawila! Hoziyana ulanga! 11Azaingila Yelusalemu mwe vikilongwa, azaolela vyoshe vye muja. Kwa kuti kuishwele, azamlawa, azahita Betaniya na waja kumi na waili.

Mkuyu walanwa.

12-24.

12Keloi jakwe wakilawa Betaniya, azaiva sala. 13Kuja azaona mkuyu na hale wena mahungo, azaubasha, ati aonela vya ja mumo; miya akiubulila nkaonele, ni mahungo du, hambu mishi, nkuyu zihoizwila, nkaizati ibule. 14Azaulana angwe: Kale na kale muntu akashetaja tunda jako! Wahina wakwe wazaviiva.

Yesu aṅaza vikilongwa.

15Wazabula Yelusalemu. Akiingila vikiloi, azaandiila kuγulusha waja weγuzanya na wetaγizanya muja vikiloi, azafununkula meza za waja wetaγa mahela, hata viti vya waja welaγa visuwa manga, nkakundize muntu, 16akiingiza ntanu muja mwe vikilongwa, 17azawafuza akiwati: Kuigondiγwe: Nyumba yangu iitangwe nyumba ya vikila kwe mbali zoshe! Miya inywi mzaiγalusha mpanga ya wampoko. 18Wavikizi wakulu na watabaluwangwa wazaviiva, ne wahomlondela lukomele. Hambu wazamwogoha, kuti wantu woshe wazashentushiγwa ni mihinyize yakwe. 19Kukishwa wazalawa kuja, wazahita kwe muzi tanga. 20Makelo wakizinka sila du wazaona, uja mkuyu uikalaγale mpaka kwe mazindo. 21Petelo azafukila ija mbuli azamuti: Mfuzi, olela: Mkuyu, ulanilewo, uzakalaγala! 22Yesu azawalandula angwe: Mtozeshei Mulungu! 23Kweli namiti: Ndiye alaγilize unu mulima: Inuka, ukine mwe bahali!, ati ashekalakasha mwe moyo wakwe, ati atozesha du, kuti viya avyolonga nevibontoke, ne vitamubontokela. 24Ne vyeleka, nikimiti: Vyoshe, ndivyo mulombeze na kuvika, mkitozesha, kuti mtaviinkwa, ne vitamibontokela. 25Kangi mkiγoloka na kuvika ushilizanyai mbuli, ati muna masa na wenyu, kangwe ishe ywenyu mwe uko mwe lwingu yohe amiushilize muvyobana! 26Miya ati inywi mwasheushilizanya, hata ishe ywenyu mwe uko mwe lwingu nkeamiushilize muvyobana.

Nkondo ya ubatizi wa Yohana.

27-38

27Wazahita vituhu Yelusalemu. Akizunguluka mwe vikilongwa, wavikizi wakulu na watabaluwangwa na watawa wazamwizila angwe: 28Ivi uviγoshola kwa ufuṅwa ani? Akunkileye unu ufuṅwa wa kuγoshola ivyoho ni ndai? 29Yesu azawati: Nami nimiuze mbuli ṅwenga, mwiniγambile! Ne ndivyo nami nimiγambile, ati niviγoshola kwa nguvu ani. 30Ubatizi wa Yohana uanduke mwe lwingu hambu kwa wantu? Niγambilai! 31Wazafanyanya mwe myoyo yawe kuγamba: Ati tamuti: Mwe lwingu, atatiti: Nini mkishemtozesha? 32Miya tiγambe: Kwa wantu! Miya wazaogoha wantu, hambu woshe wazafanyanya kuti: Yohana ni mteγanyingwa kweli. 33Wazamlandula Yesu angwe: Nkatitaila. Yesu yohena azawalandula akiwati: Lushe nami simiγambila, ati niviγoshola kwa nguvu ani.

Currently Selected:

Maliko 11: KISHNT05

Highlight

Copy