Mateyo 4

Yesu aγezwa kuti ni Mesiya.

1-11.

1Vikibinda Yesu azaiγalwa ni mpehongwa na nyika, akaγezwe ni ṅwenye leba. 2Akifunga mfungo mishi milongo mine na vilo milongo mine kubindiliza azaluṅwa ni sala. 3Ne mtakuγeza ahomwizila angwe: Ati u ṅwana Mulungu, longa, aya mawe yaγaluke nkande! 4Miya yuja azalandula angwe: Kuigondiγwe: Siyo nkande ike yemleka muntu aikale ugima, miya ni kila mbuli yelawa mwe kanwa cha Mulungu. 5Vikibinda yuja ṅwenye leba azamγuwa, azamwiγala mwe muzi mṅazi, azamγolosha mwe vikilongwa ulanga he heta, 6azamuti: Ati u ṅwana Mulungu, lumbila na shi! Hambu kuigondiγwe: Atakulaγiliziza walau wakwe, wakuambate na mikono, kangwe mulundi wako usheukwile he iwe! 7Yesu azamuti: Vituhu kuigondiγwe: Ushezamγeza Zumbe, Mulungu ywako! 8Vituhu yuja ṅwenye leba azamγuwa, azamwiγala mwe mulima mule muno, azamwonyesha uzumbe woshe wa kunu shi na uzuli wakwe, 9azamuti: Ivi vyoshe nitavikunka, ati wanikinila na kunivika. 10Ne Yesu ahomlonga: Uka aha, Satani! Hambu kuigondiγwe: Umvike Zumbe, Mulungu ywako, na kumtumikila yuja ike! 11Ne ṅwenye leba ahomleka; akiolela, walau wazamwizila, wazamγoshwela ndima.

Yesu azaikala Kapelinaumu na kubilikila.

12Yesu akiiva, kuti Yohana azagelwa mwe chumba, azahita Galileya. 13Azauka kuja Nazaleti, azahita, azaikala Kapelinaumu, ni muzi we hehi na bahali mwe shi ya Sebuluni na ya Nafutali, 14kangwe kubontoke ija mbuli ilongiγweyo ni mteγanyi Yesaya akiγamba: 15Mwe shi ya Sebuluni na ya Nafutali ye hehi na bahali sheja ja Yolodani, yeitangwa Galileya ya wamzimu, 16uko wantu weikala mwe lwiza waona langaila kulu, weikala mwe kizuli cha kifa langaila jawalawila.

17Haja ne Yesu aandiileho kubilikila akiγamba: Hitulai ntongonyezi zenyu! Hambu uzumbe wa lwingu u hehi.

Aitanga wahina wa bosi.

18Akianga nkandankanda he bahali ya Galileya azaona wanduγu waili, Simoni mweitangwa Petelo na nduγuye Andeleya, wagela lwavu mwe bahali, hambu ni walowi. 19Awati: Nitonge lai, nimiγalushe walowa wantu! 20Waja wazafikaasha nyavu zawe, wazamtongela. 21Akihita na mazu hadodo azaona wanduγu waili watuhu, Yakobo, ṅwana Zebedeyo, na nduγuye Yohana, wa mwe chombo haṅwe na ishe ywawe Zebedeyo, wachunta nyavu zawe. Ne ahowaitanga. 22Waja wazafikaasha chombo chawe, hata ishe ywawe, wazamtongela.

Nguma ya Yesu ilivyo.

23Azaanga mwe shi ngima ya Galileya akifuza mwe vikilo na kubilikila ulau wedi wa uzumbengwa na kuhonya mahisho na manyonge yoshe yena wantu. 24Nguma yakwe izaγendesha, izagisa hata shi ngima ya Siliya. Wazamwiγaila Yesu woshe wehuma, wetoziγwa ni mahisho na manyonge mangi, wehuma mpepo, wena luzwili, hata wena pengene, azawahonya woshe. 25Wantu wangi wazamtongela, weanduka Galileya na mwe iyo mizi kumi na Yelusalemu na Yudeya na mwe shi ye sheja ja Yolodani.

Currently Selected:

Mateyo 4: KISHNT05

Highlight

Copy