Luka 21

Mvyele mkiwa.

1-4.

1Azainula mesho, azaolela, wazuli wavyoika matulo yawe mwe chiya kisanduku cha ntogolo. 2Azaona mvyele mkiwa afilweye ni mγoshi ywakwe, avyogela visenti vili. 3Ne aholonga: Kweli namiti: Uyu mvyelengwa mkiwa azagela vikulu kuzinka wosheni. Hambu awa wosheni wazausha mahela kuṅwe mwe mali yawe nyingi, wazayagela mwe ntogolo, 4wantu wazomunka Mulungu, miya uyu ṅwenye ni mkiwa vikulu, kangi nkande zakwe zoshe, azona nazo, azazigela.

Ntangilo ndizo zioneke kunu shi.

5-24.

5Kuṅwe wakilonga kuti: Vikilongwa jihambiγwe na mawe matana na luhambo lutuhu, azalonga: 6Ivi muvyoona, kuna mishi, ndiyo iize, ne ndiho hashelekwe iwe, jikiandakana na ṅwiyae vivyoho, jikishechakulwa. 7Wazamwuza angwe: Mfuzi, ni lini, ziya mbuli zikizabontoka? Kangi lwitangilo ni luhi, viya vikiunga kubontoka? 8Azawati: Oleleshai, mshezaazaγanyiγwa! Hambu wantu wangi watazalawila mwe zina jangu wakiγamba: Imi ndiye; vituhu wataγamba: Mishi izatimiza; miya mshewatongele! 9Miya ndiho nezemwivile, kuti kuna nkondo na kiva, msheingilwe ni woγa! Hambu viya shuti vinebontoka, miya hata vivyo bindilizo nkajizati jibule. 10Akibinda azawati: Mbali na mbali zitazainukilana, hata uzumbe utazainukila uzumbe ṅwiyae. 11Shi zitazadidima kabisa, kangi hantu haṅwe na haṅwe kutagwa sala na humpa; hata kwe lwingu kutaoneka vilozo vikulu vyegwiza woγa. 12Viya vyoshe vishizati vibule, watamigwila, wamiγulushe, waleke, mshungwe mwe mafyomelo, mgelwe mwe vyumba, mwiγalwe kwa wazumbe ṅa kwa watoza shi kwa mbuli ya zina jangu. 13Ivi nevimiγalukile uwona! Toγwai ni myoyo! 14Msheandiile kuja sungu kwa viya, ndivyo mkikanile navyo! 15Hambu imi neniminke milongele yena viyuγo, ndiyo waja woshe wemikeleza nkani washedahe kuikeleza nkani na kuilandula. 16Inywi nezemwinkilwe ni wavyazi na wakuluwe wenyu na wanduγuze wenyu na wanduγu wenyu na wambuya wenyu; wenyu kuṅwe watawakoma. 17Nezemshukiziγwe ni wantu woshe kwa mbuli ya zina jangu. 18Kangi luzwili luṅwe du mwe mitwi yenyu nkelubaniγwe. 19Mkizizimiza, ne ndivyo muhonye myoyo yenyu.

Yelusalemu utachakulwa.

20Ndiho nezemwone, Yelusalemu mkidenganyiziγwa ni ntimizi, aho mtataila kuti: Kuchakulwa kwakwe ku hehi. 21Mishi ija we mwe shi ya Yudeya wanyilike kwe milima! We muja kaya wamlawe! 22We tanga washeuye na muja! Hambu mishi ija ni mishi ya mlaho, vibontoke vyoshe vigondiγwevyo. 23Wena nda na weonkeza nezewaone ukiwa mishi ija; hambu kutaoneka nkondo nkulu mwe inu shi, mayangwa yakilawila inu mbali; 24watakoṅwa ni shime zekolesha, watuhu watatahiγwa na kwa wamzimu woshe, Yelusalemu mtajatiγwa ni wamzimu, mpaka ndiho mishi ya wamzimu itimize.

Yesu ndivyo auye.

25-28.

25Kutazaoneka ntangilo he zuwa na he ṅwezi na he ntondwe; kunu shi wantu watavivilwa wakishetaila, ndivyo vibontoke, hambu hata bahali itavumila na kuvuwanika. 26Wantu watafanana, viya watefa, kwa woγa na kwa kuafiza viya, ndivyo vilawile uko, wakoikala; hambu hata nguvu za lwingu zitavuwanika. 27Ne ndiho wamwone ṅwanangwa ywa muntu, avyoiza mwe zunde na nguvu nyingi na utana ungi. 28Viya vikiandiila kulawila, olezai mesho yenyu na ulanga haṅwe na kuinula mitwi yenyu, kwa kuti ukombozi wenyu u hehi!

Gonai mesho.

29-33.

29Azawazisa lushimo angwe: Olelai mkuyu na miti yoshe! 30Ndiho iandiile kushuka, mkiviona mwataila wenye kuti: Vuli ji hehi. 31Vivyoho hata inywi mkizaona, viya vikibontoka, tailai kuti: Uzumbe wa Mulungu u hehi! Kweli na 32miti: Inu mbali nkeibanike, mpaka mbuli zoshe zinebontoka. 33Lwingu nezelubanike, hata inu shi, miya mbuli zangu nkezezihanike. 34Kiγojeshei, myoyo yenyu ishezatoγeshiγwa ni kujilisha na kunywelesha na sungu za kiinushi, uja mushi ukizamitutukanya! 35Hambu viya ni mteγo, utazawagwila woshe weikala koshe koshe kunu shi. 36Gonai mesho, muvike na kushedila, kangwe nezemdahe kunyilika viya vyoshe vyeunga kulawila, kangi mdaheγoloka he mesho ya ṅwanangwa ywa muntu!

37Mishi ija azafuza vikiloi na mushii, miya na kilo azakulawa, azagona he mulima weitangwa wa miziyaγembe. 38Wantu woshe wazachainuka, wazamtimiia, wamteγeleze muja vikiloi.

Currently Selected:

Luka 21: KISHNT05

Highlight

Copy