Yohana 9

Yesu amhonya tuntu mushi wa sabato.

1Yesu akianga azaona muntu avyelweye tuntu. 2Wahina wakwe wazamwuza angwe: Mfuzi, abanileye ni ndai, ni uyu, hambu ni wavyazi wakwe, akivyalwa tuntu? 3Yesu azalandula: Uyu nkabanile, hata wavyazi nkawabanile, miya kangwe mwe ṅwili wakwe mtailikane, ndima za Mulungu zilivyo. 4Ishwi shuti tiγoshole ndima za yuja anitumileye, kuke mushi, hambu kilo chaiza, ne nkahana ndiye adahe kuγoshola ndima. 5Nike mwe inu shi, ni langaila ja inu shi. 6Akibinda kulonga ivyoho azashwa mate na shi, azaγoshola ntaγata na mate, azamubadika iyo ntaγata mwe mesho angwe: 7Hita, ukahake mwe ziwa ja Silowa! Bontokelo ja iji zina ni kuγamba: Ntuṅwa. Azahita, azahaka, azauya na mesho yeona. 8Wahundo weyae na waja wamwenewo kale, kuti aakalombeza, wazaγamba: Uyu so yuja, ndiye akiikaia na kukalombeza weyae? 9Kuṅwe wazaitikila: Ndiye, kuṅwe wazakela nkani kuti: Siye, atafanana naye du. 10Yuja ṅwenye azaγamba: Ni miyo. Wazamuti: Mesho yako yaγubulwe zeze? 11Yuja azawahitula: Yuja muntu mweitangwa Yesu azaγoshola ntaγata, azaishishila mwe mesho yangu angwe: Hita kwe ziwa ja Silowa, ukahake! 12Nizahita, nizahaka, ne nihoona. Wazamuti: Yuja a kuhi? Angwe: Sitaila.

Kushetozesha kwa wantu.

13Yuja, ndiye ai tuntu, wazamwiγala kwa Mafaliseyo. 14Uja mushi, Yesu aγosholewo nawo ija ntaγata akiγubula mesho ya yuja muntu, ni mushi wa sabato. 15Mafaliseyo wazamwuza vituhu, vilekilevyo, akidaha kuona; azawati: Azabadika ntaγata mwe mesho yangu, nizahaka, ne nihoona. 16Mafaliseyo kuṅwe wazalonga: Yuja muntu nkaanduka kwa Mulungu, kwa kuti nkagimbika sabato. Watuhu wazaγamba: Muntu mhuza adaha zeze kuγoshola ntangilo zeinga aho? 17Ne wavyopangana. Yuja tuntu wazamuti vituhu: Iwe uγambai, kuti ndiye ndai, kuti azakuγubwila mesho yako? Angwe: Ni mteγanyingwa. 18Wayuda nkawatozeshe mbuli yakwe kuti: Ne ai tuntu, ateona lushe, mpaka wakiilanga wavyazi wa yuja aγubwilweye mesho, 19wazawauza angwe: Uyu ni ṅwana ywenyu, muyelonga kuti: Avyelwe tuntu? Ivi aona zeze? 20Wavyazi wakwe wazawahitula angwe: Tataila kuti: Uyu ni ṅwana ywetu, avyeiwe tuntu. 21Miya vilekilevyo, akiona lushe, nkativitaila, hata amγubwileye mesho nkatimtaila ishwi. Mwuzei ṅwenye! Ni muntu mgima, ṅwenye adaha kulonga mbuli zakwe. 22Wavyazi wakwe walongile ivyoho, kwa kuti wazaogoha Wayuda. Hambu mishi ija Wayuda waiivane kuγamba: Ndiye alonge cha sale kuti: Yesu ni Kilisito, alemeziγwe miviko! 23Kwa ivyoho wavyazi wakwe wazaγamba: Ni muntu mgima, mwuzei ṅwenye! 24Yuja muntu, ndiye ai tuntu, wazamwitanga vituhu, wazamuti: Mgimbike Mulungu! Ishwi tataila kuti: Yuja muntu ni mhuza. 25Yuja azawalandula, azawati: Ati yuja ni mhuza, sitaila, nataila mbuli ṅwenga du kuti: Imi ndiwo nii tuntu, naona lushe. 26Wazamuti: Akutendile vivihi? Akuγubwile zeze mesho yako? 27Azawahitula angwe: Kangi nizabinda kuvimiγambila, nkamwivile, lushe mukundilai kuviiva vituhu? Hambu hata inywi mwakunda kuγaluka wahina wakwe? 28Wazamkanka, wazamuti: Iwe u mhina ywakwe, ishwi ti wahina wa Mose. 29Ishwi tataila kuti: Mose ne alongileye na Mulungu, miya uyu nkatitaila, akoanduka nako. 30Yuja muntu azawalandula angwe: Inu mbuli ni ya kumaka kuti: Inywi nkamtaila, akoanduk? nako, kangi azaniγubwila mesho yangu. 31Tataila kuti: Mulungu nkaiva wahuza; miya muntu akimwogoha Mulungu, akiγoshola avyokunda, uyu atamwiva. 32Kale hoshe nkakuivike, kuti kuna amγubwileye muntu mesho avyelweye tuntu. 33Ati uyu nkaanduke kwa Mulungu, anga nkakuna adahilecho kuγoshola. 34Wazamlandula angwe: Iwe ṅwili wako woshe uvyelwe na uhuza, lushe iwe utifuze? Ne wahomshindika na se.

Uyu muntu atozesha.

35Yesu azaiva, kuti wazamshindika na se; akimwona amuti: Iwe wamtozesha ṅwanangwa ywa muntu? 36Yuja azahitula angwe: Zumbe, ni ndai, nimtozeshe? 37Yesu azamuti: Uzamwona, mwelonga na iwe ndiye. 38Angwe: Natozesha, Zumbe. Ne ahomkinila na kumvika. 39Yesu azalonga: Ṅiizile mwe inu shi kwa gwisha masa, kangwe washionawo waone, kangi waja weona waγaluke matuntu. 40Mafaliseyo kuṅwe, awona nawo, wakiiva izi mbuli wazamuti: Kumbe hata ishwi ti matuntu? 41Yesu azawati: Ati mu matuntu, anga nkamna masa; miya lushe mwalonga kuti: Taona, ne masa yenyu yahoikala.

Currently Selected:

Yohana 9: KISHNT05

Highlight

Copy