Yohana 5

Yesu ahonya mtamu he ziwa ja Betesida.

1Mishi ikizinka kuna mviko wa Wayuda, Yesu yohe azahita Yelusalemu. 2Kuja Yelusalemu he nkili yeitangwa ya ngoto hana ziwa, Kiebuleyo jiitangwa Betesida, jina makumbi mashano. 3Muja mwilele watamu wangi, washiwoona, washidahawo kuγenda, waholozewo mili, wazaafiza, mazi yakivuviγwa; 4hambu mlau ywa Zumbe aakasheela na muja mwe ziwa, avuvye yaja mazi; lushe mazi yakibinda kuvuviγwa, mwelongola kuingila atahona, hata ni utamu ani umtozizewo. 5Kuna muntu kuja, atoziγweye ni utamu wakwe mavuli milongo mitatu na mnane. 6Yesu akimwona uyu, avyolala, azataila, kuti azabinda mishi mingi, azamuti: Wakunda kuhona? 7Yuja mtamu azamlandula: Zumbe, sina muntu, ndiye anigele mwe iji ziwa, mazi yakivuviγwa; nikidema ṅwenye, mtuhu aingila, nishizati nibule. 8Yesu azamuti: Inuka, uinule lusazi lwako, uhite! Viya du lushe yuja muntu azahona, 9azainula lusazi lwakwe, azahita. Miya mushi uja ni sabato. 10Wayuda wazamγamba yuja ahonyiγweye: Ni sabato, vina ṅwiko, ukiinula lusazi. 11Angwe ndiye: Yuja anihonyizeye azaniti: Inula lusazi lwako, uhite! 12Wazamwuza: Uyo akuγambileye kuti: Inula lusazi lwako, uhite!, ni ndai? 13Yuja ahonyiγweye nkataile, ati ni ndai; hambu Yesu azahauka, kwa kuti haja hantu hana wantu wangi. 14Vikibinda Yesu azamwona mwe vikilongwa, azamuti: Olela! Uzahona. Ushezabana vituhu, kangwe usheone vyeiha kuzinka viya! 15Yuja muntu azahita, azawalonga waja Wayuda, kuti ahonyiγwe ni Yesu. 16Ne vilekilevyo, Wayuda wakimlonda Yesu, kuti azaviγoshola mushi wa sabato.

Mlaho wa ufufuki.

17Yesu azawalandula angwe: Tate aγoshola ndima mpaka ivi lushe, nami naγoshola ndima. 18Kwa ivyoho Wayuda wazaisiiza kulonda ndivyo wamkome, kwa kuti nkabanile kitigo cha Sabato du, miya kwa kuti azamwitanga Mulungu, kuti ni ishe ṅwenye, kwa kuti azakiliγanyanya na Mulungu. 19Yesu azawalandula angwe: Kweli namiti: Nkakuna mbuli, ṅwanangwa ayodaha kuγoshola ṅwenye du, ati nkamwene ishe, akiiγoshola; hambu yuja ndivyo aγoshole, ṅwanangwa yohe ataviγoshola vivyoho. 20Hambu ishe amkundisha ṅwanae, amwonyesha ndima, ṅwenye azoγoshola, hata zekula kuzinka izi neazimwonyeshe, kangwe mshemake. 21Hambu Tate avyoinula wafilewo na kuwauza moyo, vivyoho ṅwanangwa yohe auza moyo, awokunda. 22Hambu Tate nkana ayelaha, miya milahile yoshe azaiinkila kwa ṅwanae, 23kangwe woshe wamgimbikaye ṅwanangwa, sa wavyomgimbika Tate. Ashimgimbikaye ṅwanangwa, Tate yohena amtumileye nkamgimbika. 24Kweli namiti: Mweiva mbuli yangu na kumtozesha anitumileye, ana nkalamo ya kale na kale, nkaingila mwe masa, miya kwe kifa azakulawa, azabula kwe nkalamo. 25Kweli namiti: Nehabule, kangi ivi lushe haibuzile, ndiho wafilewo waive kanwa cha ṅwana Mulungu, kangi ndiwo waive watatenda nkalamo. 26Hambu sa Tate avyona nkalamo ṅwenye, vivyoho azaimunka ṅwanae, yohe lushe ana nkaiamo ṅwenye. 27Kangi azamunka ufuṅwa wa kulaha masa, kwa kuti ni ṅwanangwa ywa muntu. 28Mshemake iyo mbuli kuti: Nehabule, ndiho woshe we mwe mbila waive kanwa chabwe, 29walawe waja waγosholawo vitana kwe ulufubi wa nkalamo, waγosholawo vihada kwe ufufuki wa mlaho. 30Nkakuna nichodaha kuγoshola ṅwenye. Nivyoiva ne nivyolaha, kangi milahile yangu ni ya utanda, kwa kuti silonda, nivyokunda ṅwenye, nilonda, anitumileye avyokunda.

Uwona wa Yohana.

31Ati nakilongela uwona ṅwenye, uwona wangu so wa kweli. 32Ni mtuhu mwenilongela nwona, nataila kuti: Uwona, awonilongela, ni wa kweli. 33Inywi ne mkituma kwa Yohana; vye kweli azavilongela uwona. 34Imi silongelwa uwona ni muntu, nilonga ivyoho, kangwe mhonyiγwe. 35Yuja ne ai taa yeaka na kugwisha langaila; inywi mzakunda kuja nyemi hadodo ani he langaila jakwe. 36Miya imi nilongelwa nwona wekula kuzinka uja wa Yohana; hambu ziya ndima, Tate aninkilezo, nizibontole, zanilongela uwona, kuti Tate azanituma.

Uwona wa Tate.

37Tate anilumileye yuja azanilongela uwona. 38Kanwa chakwe nkamwachiivile, alivyo nkamwaviene; mbuli yakwe nkamna nayo, ikiikala kwenyu, kwa kuti yuja, amtumileye, inywi nkamumtozesha. 39Londezai mwe vitabungwa! Hambu inywi wenye mwafanyanya, kuti nkalamo muna nayo muja, kangi viya ne vyenilongela uwona. 40Nkamkunda kuiza kwangu, kangwe mwone nkalamo. 41Sigimbikwa ni wantu; miya nizamitaila kuti: 42Lukundisho lwa Mulungu nkamna nalo kwenyu. 43Imi niizile mwe zina ja Tate, miya nkamunihokela; ati mtuhu azaiza mwe zina jakwe ṅwenye, yuja nemumhokeie. 44Inywi mdahe zeze kutozesha mkigimbikana? Kangi ija migimbikilwe yeanduka kwa Mulungu ike nkamwilonda. 45Mshefanyanye, kuti nenimifyalime kwa Tate! Kuna mwemifyalima, ni Mose, muyemwalila. 46Hambu ati mwamtozesha Mose, mwanganitozesha nami, hambu azagonda mbuli yangu. 47Miya mkishetozesha, yuja agondilevyo, nemtozeshe zeze, nivyomilonga?

Currently Selected:

Yohana 5: KISHNT05

Highlight

Copy