YouVersion Logo
Search Icon

Yohana 18

18
Yesu agwilwa.
1Yesu akibinda kulonga izi mbuli azakulawa haṅwe na wahina wakwe, azahita na sheja jiya ja kazuto ka Kidoloni, hana mγunda haho, ne aingileho naho na wahina wakwe. 2Yuja Yuda mweunga kumwinkila yohe aahataila haja hantu, hambu Yesu haja azahaunganana kangi muno na wahina wakwe. 3Yuja Yuda azaγuwa bumba ja washilikali na wafunguwo wa wavikizi wakulu na wa Mafaliseyo, waiza haja, waitozize taa na maγala ya moto haṅwe na mata. 4Yesu kwa viya, avyotaila vyoshe, ndivyo vimubwile, azalawila, azawati: Mumlonda ndai? 5Angwe: Yesu ywa Nazaleti. Azawati: Ni miyo. Hata yuja Yuda mwemwinkila aiγoloke haṅwe nawo. 6Akiwati: Ni miyo, wazauya na nyuma, wazakina na shi. 7Azawauza vituhu: Mumlonda ndai? Angwe: Yesu ywa Nazaleti. 8Angwe ni Yesu: Nizamiγambila kuti: Ni miyo. Ati munilonda imi, lekai awa, wahite! 9Kangwe ibontoke ija mbuli, alongileyo kuti: Waja, uninkilewo, sina ṅwiyae ywawe niazizeye. 10Simoni Petelo ne aina shime, azaisholola, azatowa nayo mupuna ywa mvikizi mkulu, azamshenga shikilo ja kulume, jizadwika; yuja mupuna zina jakwe ndiye Maliko. 11Yesu azamγamba Petelo: Uza shime na mwe luwo! Kinyweio, Tate aninkilecho, nishechinywe?
Yesu aiγalwa kwa wavikizi wakulu.
12-27.
12Waja washilikali na mγolokezi ywawe na waja wafunguwo wa Kiyuda wazamgwila Yesu, wazamshunga. 13Wazamwiγala bosi kwa Ana; ni mkwee ja Kayafa, uyu ne mvikizi mkulu jiya vuli. 14Miya Kayafa ni yuja alongileye Wayuda kuti: Vyaagiza, muntu muṅwe akifa kwa mbuli ya mbalingwa.
Petelo amtowa Yesu hulu.
15Simoni Petelo na mhina mtuhu wazamtongela Yesu; yuja mhina aatailana na mvikizi mkulu, azaingila haṅwe na Yesu na muja chengoi mwa mvikizi mkulu. 16Miya Petelo azaγoloka haja se he nkili. Yuja mhina mtuhu mwetailana na mvikizi mkulu azalawa, azalonga na muluγojo ywa nkili ywa kindele, azamwingiza Petelo 17Yuja mndele mweγoja nkili azamγamba Petelo: Kumbe iwe nawe nku mhina ywa yuja muntu? Angwe ndiye: Si miyo. 18Wapuna na wafunguwo waiγoloke haho waiashize moto, kwa kuti kuna mpeho, wazauotela. Petelo yohena aiγoloke nawo akiotela moto. 19Yuja mvikizi mkulu azamwuza Yesu kwa mbuli ya wahina wakwe na ya mifuzize yakwe. 20Yesu azamlandula: Imi nizalonga cha sale kunu shi; imi mishi yoshe nizafuza vikiloi na mwe vikilongwa, Wayuda woshe wamoungananilana, sina mbuli, nilongileyo na kufishafisha. Uniuza ywai? 21Uza waja waivilewo, niwalongilevyo! Oleia! Waja ne wetaila, imi nilongilevyo. 22Akilonga ivyoho, kuna mfunguwo aγolokeye nkandai azamtowa Yesu kibao angwe: Ne uvyomlandula mvikizi mkulu? 23Yesu azamlandula: Ati nizalonga vibada, vibunkule, kuti ni vibada! Ati nizalonga vitana, unitowelai? 24Ana azamtuma kwa mvikizi mkulu, aishungiγwe. 25Simoni Petelo aiγoloke haho akiotela moto; wazamuti: Kumbe iwe nawe u mhina ywakwe? 26Yuja azakela nkani angwe: Si miyo. Waja wapuna wa mvikizi mkulu ṅwiyae ywawe muṅwe, ni mnduγu ywa yuja, Petelo amshengileye shikilo, amuti: Imi sikuene kuja kwe mγunda, wina naye? 27Petelo azakela nkani vituhu, ne soγolo ihokema viya du lushe.
Yesu alongwa masa kwa Pilato.
28—19,5.
28Wazamlavya Yesu kwa Kayafa, wazamwiγala bomani; miya ne kui makelokelo. Kangi wenye nkawaingile bomani, kangwe washeγuwe kisitama, wadaheja ngoto ya Pasa. 29Pilato azawalawila angwe: Uyu muntu mumfyalima mbwai? 30Wazamhitula angwe: Ati uyu so mhambanyi, tangashemwinkila na kwako. 31Pilato azawati: Mγuwei inywi, mkamlahe kwa vitigo vyenyu! Wayuda wazamuti: Ishwi nkatishungulwe kumkoma muntu. 32Kangwe ibontoke ija mbuli ya Yesu, alongileyo akiwaonyesha mifiile, ndiyo afe. 33Pilato azaingila vituhu bomani; azamwitanga Yesu, azamuti: Iwe u zumbe ywa Wayuda? 34Angwe ni Yesu: Ulonga ivyoho kwa mbuli yako ṅwenye, hambu watuhu watekuγambila mbuli zangu? 35Pilato azalandula: Imi ni Muyuda? Waja wa mbali yako na wavikizi wakulu wazakuinkila na kwangu. Ubanilei? 36Angwe ni Yesu: Uzumbe wangu nkauanduka na kunu shi; ati uzumbe wangu uanduka na kunu shi, anga waluγojo wangu wazaomana nkondo, nisheinkilwe kwa Wayuda, miya lushe uzumbe wangu nkauanduka na kunu. 37Pilato azamuti: Lushe iwe u zumbe zeze? Angwe ni Yesu: Uzalonga, kuti ni zumbe. Imi ne nivyelwevyo, ne niizilevyo mwe inu shi, nilongele vye kweli uwona. Kangi kila muntu mweanduka mwe kweli aiva kanwa changu. 38Pilato amuti: Vye kweli ni mbwai? Akilonga ivyoho azalawila Wayuda vituhu, azawati: Imi sina masa, nieneyo kwakwe. 39Miya kuna msimo, mishi ya Pasa niyakamishungwila muntu muṅwe. Mwakunda, nimishungwile zumbe ywa Wayuda? 40Wazakema vituhu angwe: Uyu do! Timkunda Balaba! Miya yuja Balaba ni mumpoko.

Currently Selected:

Yohana 18: KISHNT05

Highlight

Share

Copy

None

Want to have your highlights saved across all your devices? Sign up or sign in