Luka 22

Jodong jo-Yahudi ochano nego Yesu

(Mathayo 26.1-5; Mariko 14.1-2; Johana 11.45-53)

1 # Wuok 12.1-27. Koro Sap Makati ma ok ketie Thowi, miluongo ni Pasaka, ne chiegni. 2To jodolo madongo kod jopuonj Chik ne dwaro yo ma digineggo Yesu ling’ling’, nimar ne giluoro ji.

Judas oyie ndhogo Yesu

(Mathayo 26.14-16; Mariko 14.10-11)

3Bang’e Satan nodonjo kuom Judas miluongo ni Iskariot, mane acheil kuom jopuonjre Yesu apar gariyo. 4Omiyo nodhi opimo wach gi jodolo madongo kod jotend jorit Hekalu, kaka doket Yesu e lwetgi. 5Ne gimor ahinya, kendo ne giwinjore kode ni ginimiye pesa. 6Judas noyie, kendo nochako dwaro rieko ma doketgo Yesu e lwetgi ka ji ok ong’eyo.

Yesu ochano chamo Sap Pasaka

(Mathayo 26.17-25; Mariko 14.12-21; Johana 13.21-30)

7Chieng’ Sap Makati ma ok ketie Thowi, ma inegoe nyarombo Pasaka, nochopo. 8Yesu nooro Petro kod Johana, kowachonigi ni, “Dhiuru ulosnwa Pasaka mondo wabi wacham.” 9To ne gipenje ni, “Ere kama idwaro ni mondo walosee?” 10Nowachonigi niya, “Ka usedonjo Jerusalem, to ubiro romo gi ng’at moting’o dapi. Luweuru nyaka ot modonjoe, 11kendo nyisuru wuon odno ni, ‘Japuonj penji ni, ere ot moikne, mobiro chamoe Sap Pasaka gi jopuonjrene?’ 12Eka obiro nyisou ot malach moiki e gorofa malo. Kanyo ema mondo uikie gik moko duto.” 13Kamano ne gidhi, kendo ne ginwang’o gik moko duto mana kaka Yesu nosenyisogi, mi giiko Pasaka kuno.

Sawo mar Ruoth

(Mathayo 26.26-30; Mariko 14.22-26; 1 Jo-Korintho 11.23-25)

14Kane sa ochopo, Yesu nobet e mesa kod jootene. 15Nowachonigi niya, “Asegombo ahinya mondo acham Pasakani kodu kapok osanda, 16nimar awachonu ni ok nachak achame ngang’ nyaka chop time mogik e Piny Ruoth Polo.” 17Eka nokawo kikombe, mi ogoyo ni Nyasaye erokamano. Bang’e nowacho niya, “Kawuru ma, mondo upogru, 18nimar awachonu ni chakre kawuono ok nachak amadh divai nyaka chop Loch Nyasaye bi.” 19Eka nokawo makati, kendo kosegoyo ni Nyasaye erokamano, nong’ingo makatino, kowacho ni, “Ma e ringra mochiw nikech un. Timuru kamano mondo uparago.” 20#Jer 31.31-34.Kamano bende nokawo kikombe bang’ chiemo, kowacho niya, “Kikombe ni e remba, mochwer nikech un, kitimonugo Winjruok Manyien gi Nyasaye. 21#Zab 41.9.To ng’euru ni ng’at mondhoga ni koda e mesa ka! 22Wuod Dhano biro tho mana kaka Nyasaye nochano. To mano kaka nobed malit ni ng’at mondhoge!” 23Eka ne gichako penjore kendgi ni en ng’a kuomgi ma ditim gima kamano.

Wach kuom bedo ng’ama duong’

24 # Math 18.1; Mar 9.34; Luka 9.46. Mbaka nowuok e kind jopuonjre ka gipenjore ni en ng’a ma kwano ka ng’ama duong’ moloyo kuomgi. 25Yesu nowachonigi niya, “Ruodhi mag pinyni nigi teko kuom jogi, kendo jotelo dwaro ni mondo ji oluonggi ni, ‘Osiepe ji’. 26#Math 23.11; Mar 9.35.#Math 20.25-27; Mar 10.42-44.To un ok uchal kamano. Ng’at maduong’ie moloyo kuomu nyaka bed ka ng’ama tinie moloyo, kendo jatelo nyaka bed ka jatich. 27#Joh 13.12-15.Kuom ji ariyogi, ere ng’ama duong’ie moloyo wadgi? Jal ma obet kachiemo, koso jal matiyone? Donge en jal ma obet kachiemo? To an, an e kindu ka ng’at matiyo. 28Un e joma osesiko koda e masichena duto, 29kendo kaka Wuora osechano mondo omiya teko mar loch, e kaka un bende asechano mondo uyud loch. 30#Math 19.28.Unuchiem kendo unumethi koda e pinya, kendo unubed e kombe ruodhi, kung’ado bura ni dhoudi apar gariyo mag Israel.”

Yesu ohulo ni Petro biro kwede

(Mathayo 26.31-35; Mariko 14.27-31; Johana 13.36-38)

31Eka Yesu nodhi nyime ni, “Simon, Simon, winji! Satan oseyudo thuolo mondo opiedhu mana kaka dhako piedho cham. 32To in aselemoni mondo yieni kik lal, kendo ka iselokori, miduogo ira, to nyaka ijiw oweteni.” 33Petro nodwoke ni, “Ruoth, aikora dhi kodi e jela kata mana kar tho bende.” 34To Yesu nodwoke niya, “Petro awachoni ni thwon gweno ok ang’ nokog tinende kapok ikweda didek ni ok ing’eya.”

Yesu owuoyo kuom gik ma koro dwarore

35 # Math 10.9, 10; Mar 6.8, 9; Luka 9.3; 10.4. Bang’ mano, Yesu nopenjogi ni, “E ndalo mane aorou ka uonge gi ofuko mar pesa, kata sandug wuoth, kata gi wuoche, ne uchando gimoro koso?” Ne gidwoke ni, “Onge gima ne wachando.” 36Eka nowachonigi niya, “To koro akonu ni ng’at man gi ofuko mar pesa, kata sandug wuoth, mondo okaw, bende ng’at ma onge gi ligangla mondo olok lawe, ong’iewgo ligangla, 37#Isa 53.12.nimar awachonu ni gima Muma wacho ni, ‘Ne okwane kod joketho’, nyaka timre kuoma, nikech gik ma ondik kuoma koro chiegni timore.” 38Jopuonjrene nowachone ni, “Ruoth, ligengni ariyo eki ni ka.” En to nokwerogi ni, “Weuru wuoyo kamano!”

Yesu olemo e got Zeituni

(Mathayo 26.36-46; Mariko 14.32-42)

39Yesu nowuok, modhi e got Zeituni kaka ne otimo pile, kendo jopuonjrene bende nodhi kode. 40Kane ochopo kanyo, nowachonigi niya, “Lemuru mondo kik udonj e tem.” 41Eka noweyogi modhi kuma ochwalore ma dirom diro kidi, mi nogoyo chonge piny, kendo olemo, 42kowacho niya, “Wuora kiyie to gol kikombe mar masirani oa kuoma, to ok kaka an ema adwaro, to gima idwaro ema mondo otimre.” [ 43Eka malaika moa e polo nofwenyorene, mi omiye teko. 44Chunye nochandore malit ahinya, mi nomedo lemo matek, kendo luya nochotne maton piny mana ka remo.] 45Kane oa malo bang’ lemo, ne odok ir jopuonjrene, mi onwang’o ka nindo oterogi, nikech chunye ne lit. 46Nowachonigi ni, “Ang’o momiyo unindo? Auru malo ulem, mondo kik udonj e tem.”

Yesu omaki

(Mathayo 26.47-56; Mariko 14.43-50; Johana 18.3-11)

47Kane pod owuoyo, ji moko mang’eny notucho, ka jal miluongo ni Judas otelonigi. Ne en achiel kuom joote apar gariyo. Nosudo ir Yesu mondo onyodhi. 48To Yesu nopenje niya, “Judas, indhogo Wuod Dhano mana gi nyoth koso?” 49Kane jopuonjre Yesu oneno gima dwaro timore, ne gipenje niya, “Ruoth, waked gi ligangla koso?” 50Eka ng’at achiel kuomgi nong’ado it jatich jadolo maduong’ ma korachwich oko. 51To Yesu nokwere ni, “We timo kamano!” Eka nomulo it ng’atno, mochango. 52Bang’ mano Yesu nowacho ni jodolo madongo gi jotend jorit Hekalu, kod jodongo mane obiro mondo omake niya, “Ere gimomiyo ubirona gi ligengni kod arunge, mana ka gima an jamecho? 53#Luka 19.47; 21.37.Pile ne an kodu e Hekalu, to ne ok umaka. To koro ma e sa maru, ka teko mar mudho tiyo.”

Petro okwedo Yesu

(Mathayo 26.57-58, 69-75; Mariko 14.53-54, 66-72; Johana 18.12-18, 25-27)

54Ne gimako Yesu, mi gitero e od jadolo maduong’, to Petro noluwo bang’gi gi chien. 55Kane gisemoko mach e laru, mi gibet piny kanyo, Petro nobiro mobet kodgi. 56To nyako moro ma jatich nonene ka mach liel, morango wang’e tir, kendo owacho niya, “Jali bende ne ni kode!” 57To Petro nokwer ni, “Nyako! Ok ang’eye.” 58Bang’e matin, ng’at moro bende nonene mowachone niya, “In bende in achiel kuomgi!” To Petro nodwoke ni, “Omera, ok an!” 59Bang’e kinde ma dirom sa achiel, ng’at machielo nojiwo wach matek, ni, “Adier, jali bende ne ni kode, nikech en ja-Galili.” 60To Petro nokwer, kawacho niya, “Omera, ok ang’eyo gima iwacho!” Gikanyono, kapod owuoyo, thwon gweno nokok. 61Eka Ruoth Yesu nolokore mong’iyo Petro, mi Petro noparo wach mane osewachone ni, “Tinendeni, kapok thwon gweno okok, to ang’ nikweda didek.” 62Mano omiyo Petro nowuok oko, moywak malit.

Askeche ojaro Yesu

(Mathayo 26.67-68; Mariko 14.65)

63Joma ne rito Yesu nojare, kendo ogoye. 64Ne giumo wang’e mi gipenje ni, “Hul ane ng’ama ogoyi.” 65Bende ne giyanye gi weche mang’eny maricho.

Oter Yesu e buch jo-Yahudi

(Mathayo 26.59-66; Mariko 14.55-64; Johana 18.19-24)

66Kane piny oyawore, jodong jo-Yahudi gi jodolo madongo kod jopuonj Chik nochokore, mi oter Yesu e buchgi. 67Ne giwachone ni, “Ka in e Mesia adier, to nyiswa ane.” En to nokonigi ni, “Ka anyisou, to ok ubi yie, 68to bende ka apenjou gimoro, to ok ubi dwoka. 69To chakre kawuono, Wuod Dhano biro bet e bat korachwich mar Nyasaye Manyalo Gik Moko Duto!” 70Eka ne gipenje giduto ni, “To kara, in e Wuod Nyasaye?” Nodwokogi ni, “Uwacho adier ni an e en.” 71Bang’ mano, ne giwacho ni, “Koro pod wadwaro joneno nang’o, to wan wawegi wasewinjo dhoge owuon?”

Currently Selected:

Luka 22: DHO15

Highlight

Copy