Tich Joote 13

Roho Maler oyiero Barnaba gi Saulo

1Kuom kanyakla mar jo-Kristo man Antiokia manie piny Kilikia ne nitie johul wach kod jopuonj. Ne gin Barnaba gi Simeon miluongo ni Rateng’, gi Lukio ja-Kurene, gi Manaen, mane opidh kaachiel gi ruoth Herode, kod Saulo. 2To kane oyudo gilamo Ruoth, kendo gitueyo chiemo, Roho Maler nowacho nigi niya, “Walnauru Barnaba gi Saulo oti tich ma aseluongogi mondo giti.” 3Eka ne gimedo lemo, kendo gitueyo chiemo, bang’e ne giyieyo lwetgi kuom Barnaba gi Saulo, mi giweyogi gidhi.

Barnaba gi Saulo olando Wach Maber Saipras

4Kane Roho Maler oseoro Barnaba gi Saulo kamano, ne gidhi Seleukia, kuma ne giidhoe yie mi gikwang’ gidhi Saipras. 5Kane gichopo Salamis, ne gilando Wach Nyasaye e ut lemo mag jo-Yahudi, ka Johana konyogi.

6Ne giwuotho e chulano duto, ka gilando Wach Maber, nyaka ne gichopo Pafo, kuma ne ginwang’oe ajuoga moro ma nyinge Bar-Yesu (to dho Yunani luonge ni Eluma.) Ne en ja-Yahudi, kendo ne owuondore ni en janabi. 7Bende ne en osiep Sergio Paulo, ma ruodh chulano, kendo mane ng’ama riek. Ruodhno noluongo Barnaba gi Saulo mondo odhi ire, nikech ne odwaro winjo Wach Nyasaye. 8To ajuoga miluongo ni Elumano notamogi, kotemo geng’o ruoth mondo kik yie kuom Yesu. 9Eka Saulo ma bende iluongo ni Paulo, nopong’ gi Roho Maler. Norango wang’ ajuogano tir, 10mowachone niya, “Yaye, in wuod Satan! In jasik gik moko duto mabeyo! Ipong’ gi timbe duto mag miganga, kendo pile itemo loko adiera mag Nyasaye obed mag miriambo! 11To koro winji, kata mana sani Ruoth Nyasaye biro goyi gi lwete, kendo ibiro bedo muofu, mi ok ninen kuom ndalo moko.” Gikanyono mudho mandiwa noimo wang’ Eluma, mi owuotho komulo amula, kendo kodwaro ng’ama taye gi lwete. 12Kane ruoth oneno gima otimoreno, noyie kuom Yesu, kendo nohum nono kuom puonj Ruoth Yesu.

Paulo gi Barnaba jochopo Antiokia e piny Pisidia

13Paulo kod joma ne en go ne joa Pafo, mi okwang’ nyaka Perga e piny Pamfulia, to Johana noweyogi kuno, modok Jerusalem. 14Eka ne gia Perga, mi gidhi Antiokia e piny Pisidia, kendo ne gidhi e od lemo mar jo-Yahudi chieng’ Sabato, mi gibet piny. 15Kane osesom weche moko moa e Chik Musa, kod mag Jonabi, jodong od lemo nokowonigi wach ni, “Owetewa, ka un gi wach moro madujiwgo ji, to wachuru.” 16Eka Paulo nochung’, moting’o bade, kendo ochako wuoyo niya:

“Un owetena ma jo-Israel, kod ji mamoko duto moluoro Nyasaye, winjuru. 17#Wuok 1.7; Wuok 12.51.Nyasaye ma Nyasach jo-Israelgi noyiero kwerewa, moloko oganda motegno e ndalo mane gin jodak e piny Misri. Bang’e nogologi kuno gi tekone maduong’, 18#Kwan 14.34; R.Chik 1.31.kendo nokurogi e thim kuom higni ma dirom piero ang’wen. 19#R.Chik 7.1; Josh 14.1.Eka notieko ogendini abiriyo mane oyudo odak e piny Kanaan, mi omiyo joge owuon pinyno. 20#Bura 2.16; 1 Sam 3.20.Bang’ higni ma dirom mia ang’wen gi piero abich, nomiyogi jong’ad bura moritogi nyaka ndalo janabi Samuel. 21#1 Sam 8.5; 1 Sam 10.21.To kane gikwayo mondo gibed gi ruoth, Nyasaye nomiyogi Saulo wuod Kish ma jadhood Benjamin mondo obed ruodhgi, mi noritogi kuom higni piero ang’wen. 22#1 Sam 13.14; 1 Sam 16.12; Zab 89.20.Eka Nyasaye nogole, moketonigi Daudi ruoth. En ema Nyasaye nowuoyo kuome niya,

‘Aseyudo ni Daudi wuod Jesse e ng’at ma chunye chal gi mara,

kendo ema notim gik moko duto ma adwaro.’

23“Yesu ma nyakwar Daudi ema Nyasaye otimo Jawar jo-Israel, kaka nosingore. 24#Mar 1.4; Luka 3.3.To kane Yesu pok ochako tichne, Johana nosebedo kapuonjo jo-Israel duto mondo gilokre giwe richogi, obatisgi. 25#Joh 1.20; Math 3.11; Mar 1.7; Luka 3.16; Joh 1.27.To kane Johana koro chiegni tieko tichne, nopenjo ji ni, ‘Un uparo ni an ng’a? An ok an Jal mugeno ni biro biro. To winjuru! Ng’at moro biro bang’a ma ok awinjora gonyo wuochene e tiende.’

26“Un jowetena ma nyikwa Ibrahim, kaachiel gi ji mamoko moluoro Nyasaye, wan ema osekelnwa wach warruokni, 27nikech joma odak Jerusalem kod jodonggi ne ok ong’eyo ni Yesu e Jawar, bende ne ok giwinjo tiend weche jonabi misomo pile chieng’ Sabato ka Sabato. To kata kamano ka ne ginege, to ne gimiyo gima ne jonabi okoro otimore. 28#Math 27.22, 23; Mar 15.13, 14; Luka 23.21-23; Joh 19.15.To kata obedo ni ne ok ginyal yudo gima omiyo owinjore ging’adne buch tho, to pod ne gichuno achuna Pilato mondo ogol chik onege. 29#Math 27.57-61; Mar 15.42-47; Luka 23.50-56; Joh 19.38-42.Kane gisetimone gik moko duto ma Muma wacho kuome, ne gilore piny e msalaba, mi gikete e bur. 30To Nyasaye ne ochiere oa kuom joma otho, 31#Joote 1.3.kendo kuom ndalo mang’eny nofwenyore ni joma ne oseluwe koa Galili odhi Jerusalem. Gin ema tinde gihulo ni jo-Israel weche man kuome. 32#Zab 2.7.To wan, wan kaeri mondo walandnu Wach Maber, ni, kuom chiero Yesu, 33Nyasaye osetimonwa gima ne osingore ni kwerewa, mana kaka Muma wacho e Zaburi mar ariyo ni,

‘In e Wuoda,

tiende ni asedoko Wuoru.’

34 # Isa 55.3. To kuom chiero Yesu kuom joma otho mondo kik ochak otho kendo, nowacho niya,

‘Anamiu gueth maler kendo madier,

mane asesingora ni Daudi.’

35 # Zab 16.10. E kaka bende owacho e Zaburi machielo ni,

‘Ok niwe mondo ringre Ng’ati Maler otow.’

36“To kane Daudi osetimo gik mane Nyasaye dwaro mondo otim e ndalone, notho, moyike but kwerene, kendo ne otop. 37Jal mane Nyasaye ochiero oa kuom joma otho, to ne ok otop! 38Kuom mano, owetena, unyalo neno uduto ni kuom Yesu ema ilandonue wach mar weyo richo. 39Bende nyaka ung’e ni ng’ato ka ng’ato moyie kuome, to owene richone duto mane Chik Musa otueyo. 40Emomiyo, tang’uru mondo kik masiche mane jonabi okoro timrenu. Jonabi nosekoro niya,

41 # Hab 1.5. ‘Neuru, un joma ochayo jigi!

Humuru, kendo laluru nono,

nikech tich ma atiyo e ndalou en gima ok unyal yie,

kata da bed ni ng’ato hulnu tiende!’ ”

42Kane Paulo gi Barnaba jowuok e od lemo, ji nokwayogi mondo giduog chieng’ Sabato mabiro, gimed puonjogi wechego. 43Bang’ chokruokno, jo-Yahudi mang’eny kod jomoko mathoth moluoro Nyasaye mane oselokore luwo kit lemo mar jo-Yahudi, nodhi gi Paulo gi Barnaba. Ji ariyogo nopuonjogi, kajiwogi mondo gisik mana kuom ng’wono mar Nyasaye.

44Chieng’ Sabato maluwo mano, chiegni ji duto manie dalano nobiro mondo owinj Wach Ruoth. 45To kane jo-Yahudi oneno oganda maduong’no nyiego nomakogi ahinya, mi gidagi weche Paulo, ka gikwere kendo giyanye. 46To Paulo gi Barnaba ne jomedo wuoyo gi chir moloyo, ka giwacho ni, “Un ema owinjore kwong landnu Wach Nyasaye. To kaka usedage, kendo ok une ni uwinjoru gi ngima ma nyaka chieng’, koro wabiro weyou mondo wadhi ir ogendini ma ok jo-Yahudi, 47#Isa 42.6; 49.6.nikech Ruoth Nyasaye osemiyowa chik niya,

‘Aseketi ibed ler mar Ogendini,

mondo ibed yor warruok ni piny ngima.’ ”

48Kane joma ok jo-Yahudi owinjo wachno, ne gidoko mamor, mi gimiyo Wach Nyasaye duong’, kendo ji duto mane Nyasaye oseyiero mondo oyud ngima ma nyaka chieng’ noyie kuom Yesu.

49Wach Ruoth Nyasaye nolandore kuonde duto e gweng’no. 50To jo-Yahudi noketho chuny jodong dalano, kod chuny mond joma dongodongo ma ok jo-Yahudi mane oluoro Nyasaye. Kamano ne gimiyo ji osando Paulo gi Barnaba, mi giriembogi gia e gweng’gi. 51#Math 10.14; Mar 6.11; Luka 9.5; 10.11.To jootego noteng’onigi buch tiendgi, mi owuok odhi Ikonio. 52Jopuonjre mane ni Antiokia to nodong’ kopong’ gi mor kod Roho Maler.

Currently Selected:

Tich Joote 13: DHO15

Highlight

Copy