Judith 13
13
CAB. 13
1Nish tra va’n astyr er jeet, ren e harvaantyn siyr dy gholl rhymboo, as ghooin Bagoas e chabbane cheu-mooie, as hug eh ny tendeilee er-sooyl veih kionefenish e hiarn, as jimmee ad gys nyn lhiabbaghyn: son v’ad ooilley tooillit, er-y-fa dy row yn giens er ny ve choud.
2As va Judith faagit ny lomarcan ’sy chabbane, as va Holofernes ny lhie sheeynt er e lhiabbee: son v’eh lhome-lane dy feeyn.
3Nish hug Judith sarey da e hinney-veyl dy hassoo cheu-mooie jeh e shamyr-lhiabbagh, as dy uirraght son eckish dy heet magh, myr ren ee gagh laa: son dooyrt ee dy darragh ee magh gys e padjeryn, as loayr ee rish Bagoas gys y chione cheddin.
4Myr shen jimmee [ad] ooilley magh, as cha row unnane faagit ’sy chamyr-lhiabbagh, edyr beg ny mooar. Eisht hass Judith liorish yn lhiabbee echey, as dooyrt ee ayns e cree, O Hiarn Yee, jeh dy chooilley phooar, jeeagh ec y traa shoh er obbyr my laueyn son yrjaghey Yerusalem.
5Son nish y traa dy chooney lesh dt’eiraght, as dy chooilleeney ny reddyn ta mish er n’ghoaill ayns laue gys toyrt-mow ny noidyn t’er n’irree nyn ’oi.
6Eisht haink ee gys essyn ny lhiabbagh, v’ec kione Holofernes, as ghow ee neose e chliwe jeh shen,
7As haink ee gys e lhiabbee, as ghow ee greim er folt e ching, as dooyrt ee, Niartee mee, O Hiarn Yee dy Israel, yn laa shoh.
8As woaill ee daa cheayrt er e wannal lesh ooilley e niart, as ghow ee er-sooyl e chione jeh,
9As hyndaa ee e chorp sheese jeh’n lhiabbee, as ghow ee yn coodagh neose jeh ny essynyn; as er-y-chooyl ny lurg shen hie ee magh, as hug ee kione Holofernes da e hinney-veyl;
10As hug ish eh ayns e poagey-bee: myr shen hie ad ny-neesht magh cooidjagh myr boallagh ad gys padjer: as tra v’ad er gheddyn shaghey yn camp, ghow ad mygeayrt y choan, as hie ad seose slieau Vethulia, as haink ad gys ny giattyn echey.
11Eisht dooyrt Judith foddey jeh rish yn arrey v’ec y yiat, Foshil, foshil-jee nish yn giat: ta Jee, eer yn Jee ain, marin dy hoilshaghey e phooar foast ayns Jerusalem, as e hroshid noi’n noid, myr t’eh eer er n’yannoo yn laa shoh.
12Nish tra cheayll deiney yn ard-valley eck e coraa, ren ad siyr dy gholl sheese gys giat yn ard-valley oc, as deie ad er shanstyryn yn ard-valley.
13Eisht roie ad ooilley dy cheilley, chammah beg as mooar, son ve joarree daue dy row ee er jeet: myr shen doshil ad y giat, as lhig ad stiagh ad, as doad ad aile son soilshey, as hass ad runt mygeayrt-y-moo.
14Eisht dooyrt ee roo lesh ard-choraa, Cur-jee moylley, cur-jee moylley gys Jee, (ta mee dy ghra), son cha vel eh er ghoaill er-sooyl e vyghin voish thie Israel, agh t’eh er stroie ny noidyn ain liorish my laue’s yn oie shoh.
15Myr shen ghow ee yn kione ass y phoagey, as yeeagh ee daue eh, as dooyrt ee roo, Cur-my-ner kione Holofernes, ard-chaptan armee Assur, as cur-my-ner yn coodagh ayn v’eh ny lhie ayns e veshtyllys; as ta’n Chiarn er varroo eh liorish laue ben.
16Myr ta’n Chiarn bio, quoi t’er choadey mish ayns m’immeeaght, ta m’eddin’s er violagh eh gys e hoyrt-mow, foast cha vel eh er chur-rish peccah marym, dy my vhilley as my naaraghey.
17Eisht ghow ooilley’n pobble yindys mirrilagh, as chroym ad ad-hene, as hug ad ooashley da Jee, as dooyrt ad lesh un aigney, Bannit dy row uss, O nyn Yee, quoi ta er y laa shoh er choyrt lhiat gys veg noidyn dty phobble.
18Eisht dooyrt Osias ree, O inneen, bannit t’ou uss liorish y Jee smoo-ard er-skyn ooilley ny mraane t’er feiy ny cruinney; as bannit dy row’n Chiarn Jee, chroo niau as thalloo, hug royd dy yiarey yn kione jeh ard-er ny noidyn ain.
19Son shoh dty hreishteilys cha naag creeghyn deiney, nee cooinaghtyn er pooar Yee son dy bragh.
20As dy jyndaa Jee ny reddyn shoh hoods son moylley bra, dy heet dty raad ayns nheeghyn mie, er-y-fa nagh vel oo er vooaraghey dty vioys son seaghyn yn ashoon ain, agh t’er n’ghoaill cooilleeney son nyn draartys, gimmeeaght ayns raad yn ynrickys kiongoyrt rish nyn Yee. As dooyrt ooilley’n pobble, Myr shen dy row eh, myr shen dy row eh.
Currently Selected:
Judith 13: YNAPBR
Highlight
Share
Copy
Want to have your highlights saved across all your devices? Sign up or sign in
© Yn Cheshaght Ghailckagh 1979, 2017
© Manx Gaelic Society 1979, 2017