撒迦利亞書 1
1
上主呼召佢个子民轉向佢
1 大流士做波斯皇帝第二年八月，上主將下背个信息啟示給易多个孫仔、比利家个孻仔先知撒迦利亞。
2-3上主 — 萬軍个元帥喊撒迦利亞傳話㧯人民講：「𠊎 — 上主、萬軍个元帥識向你等个祖先大發譴；總係𠊎這下對你等講：『你等愛轉向𠊎，𠊎就轉向你等。 4你等毋好像你等个祖先。以前个先知將𠊎 — 上主、萬軍元帥个信息㧯佢等講，喊佢等毋好再繼續過邪惡、犯罪个生活；總係佢等毋聽，也毋搭𠊎。 5你等个祖先這下在㖠位呢？該兜先知會生到永遠嗎？ 6其實，𠊎通過𠊎个僕人，就係該兜先知，所命令又警告你等祖先个話，全部發生在佢等个身上。佢等正悔改；佢等承認𠊎 — 上主、萬軍个元帥係照自家个計劃，照佢等所行所做个責罰佢等了。』」
馬仔个異象
7 大流士做皇帝个第二年十一月，就係細罷特月二十四 #1:7 「第二年十一月…二十四」：照現代个日曆來算係公元前五百一十九年二月十五日；也係開始重建聖殿後五隻月 (參考哈該書 1:15)。，上主用異象將信息交給易多个孫仔、比利家个孻仔先知撒迦利亞。
8在該暗晡𠊎看到一個人 #1:8 「一個人」：有現代譯本解釋做「上主个天使」，參考 1:10-12 。騎等紅馬，停在山壢个石榴樹園中；佢後背有一群紅色、黃色㧯白色个馬。 9有一個天使㧯𠊎講話；𠊎問佢：「主啊，該兜係麼介意思？」
佢講：「𠊎愛指示你該係麼介意思。」
10然後，該停 #1:10 「停」抑係譯做「企」。在石榴樹園中个人講：「這兜係上主派來地上巡查个。」
11該兜騎馬个就向企在石榴樹園中上主个天使報告，講：「𠊎等巡行全世界，發現全世界攏總平安無事。」
12然後，上主个天使講：「上主 — 萬軍个元帥啊，你向耶路撒冷㧯猶大各城發譴已經七十年了，還愛過幾久正會憐憫它兜呢？」
13上主用溫柔安慰个話回答該㧯𠊎講話个天使。 14該天使就喊𠊎宣告：「上主 — 萬軍个元帥恁樣講：𠊎深深痛惜耶路撒冷 — 𠊎个聖城錫安， 15總係𠊎對該兜享受安樂个國家大發譴。因為𠊎對𠊎子民略略仔發譴，它兜就增加𠊎子民个痛苦。 16所以，𠊎轉到耶路撒冷，愛憐憫這城。𠊎个聖殿一定愛重建，聖城一定愛整好。這係𠊎 — 上主、萬軍个元帥講个。」
17天使又喊𠊎宣告：「上主 — 萬軍个元帥恁樣講：𠊎在猶大該兜城愛重新繁榮起來；𠊎愛再一擺安慰錫安，揀選耶路撒冷做𠊎自家个城。」
角个異象
18𠊎在另外一個異象中看到四支角。 19𠊎問先前㧯𠊎講話个天使：「這兜角有麼介意思？」
佢應講：「這兜角係打散猶大、以色列㧯耶路撒冷人民个勢力。」
20後來上主又俾𠊎看到四個師傅。 21𠊎問：「這兜人來做麼介？」
佢應講：「這兜師傅係來恐嚇列國並推翻它兜个勢力；因為列國破壞猶大个土地，打散猶大个人民。」
Currently Selected:
撒迦利亞書 1: THV12Hdb
Highlight
Share
Copy
Want to have your highlights saved across all your devices? Sign up or sign in
© The Bible Society in Taiwan, 2012
All rights reserved
© 台灣聖經公會版權所有 2012
