馬可 5

耶穌醫好邪靈附身个人

(馬太 8:28-34；路加 8:26-39)

1佢等來到加利利湖對面該片，屬革拉森人个地區。 2耶穌一下船，就堵到一個對塚埔出來个人；這人被邪靈附身， 3一直住在塚埔，無人能控制佢，用鐵鍊也捆佢毋住。 4盡多擺有人用腳鐐手銬鎖等佢，總係腳鐐卻被佢打碎掉去，手銬卻被佢扭斷掉去。無人有罅力來制伏佢！ 5佢日夜在塚埔㧯山肚盡喊，又拿石頭敲自家。

6佢遠遠看到耶穌，就走過來，跪在佢个面前， 7大聲喊講：「至高上帝个孻仔耶穌，你做麼介愛干涉𠊎呢？𠊎奉上帝个名求你，莫蹧踏𠊎！」 8(佢講這個話係因為耶穌已經吩咐佢講：「邪靈啊，對這個人身上出來！」)

9耶穌問佢講：「你安到麼介名？」

佢應講：「𠊎安到『大群』，因為𠊎等盡多！」 10佢再三求耶穌莫逐佢等離開該地方。

11在附近山排頂，堵好有一大群豬仔在該位食東西； 12邪靈就求耶穌講：「准𠊎等入豬群，俾𠊎等附在豬仔底背。」 13耶穌准佢等；邪靈就對該人身上出來，入去豬群；歸群豬仔 (約兩千隻) 衝下崩崗，跌落湖底背，全部浸死。

14掌豬仔个人就走掉；佢等去城肚㧯周圍个鄉村講起這個事。眾人就出來看，到底發生麼介事情。 15佢等來到耶穌該位，看到該被鬼附身个人，就係頭擺被大群鬼附身个，坐等，著好衫褲，頭腦清醒；佢等就盡著驚。 16看到這事情經過个人，將發生在被鬼附身个人身上㧯豬群个事㧯大家講。 17佢等就要求耶穌離開佢等个地方。

18耶穌上船个時，該識被鬼附身个人來求耶穌講：「𠊎跈你去好麼？」 19耶穌毋肯，總係㧯佢講：「轉去若屋下，㧯親族講，主樣般用慈愛對待你，並佢為你所做个事係樣般个大。」

20該人就離開，即時在十邑个地方宣傳耶穌為佢所做个事情係樣般个大；所有聽到个人全部感覺盡奇怪。

葉魯个妹仔㧯血漏个婦人家

(馬太 9:18-26；路加 8:40-56)

21耶穌又坐船轉到湖該片去；在湖邊有一大群人來到佢个面前聚集。 22該所在有一個會堂个管理員，名安到葉魯，也來。佢一看到耶穌，就伏在佢个腳前， 23求佢講：「𠊎个滿女病到會死，求你來去為姖按手，醫好姖，救姖一命！」

24耶穌就同佢去。盡多人也尖等跈佢去。

25該所在有一個婦人家，發血漏病十二年， 26看過盡多个醫生，在佢等个手下受盡多个苦，所有个錢財也用掉去；總係姖个病毋單淨無好，反轉還較嚴重。 27姖識聽過耶穌个事，所以尖在人群中，行到耶穌个後背，摸佢个衫， 28心肝想：「𠊎只有摸到佢个衫，一定會得到醫好。」

29姖个血漏黏時就停止，感覺身上个病已經好了。 30耶穌即時感覺有能力從自家身上出去，就在人群中轉過身來，講：「麼人摸𠊎个衫？」

31厥學生應佢講：「你看，恁多人尖等你，你還問：『麼人摸𠊎』嗎？」

32總係耶穌四面緊尋，愛看麼人摸佢。 33該婦人家知自家身上所發生个事，就愊愊掣，來到耶穌个面前跪落去，照實㧯佢講。 34耶穌對姖講：「妹仔啊，你个信心救到你！安心轉去，你个病已經好了。」

35耶穌還講等這句話个時，有人對會堂管理員个屋下趕來，㧯葉魯講：「若妹仔已經死掉，樣般還勞動先生呢？」

36耶穌毋搭 #5:36 「毋搭」抑係譯做「聽到」。佢等所講个話，對會堂个管理員講：「毋使驚，只愛信！」 37然後佢帶等彼得、雅各，㧯雅各个老弟約翰共下去，毋肯俾別人跈等佢。 38佢等來到會堂管理員个屋下，耶穌看到大家亂吵吵，大聲噭。 39耶穌入去對佢等講：「你等做麼介亂吵吵大聲噭呢？細人仔並無死，係睡掉定定。」 40佢等就笑佢。

耶穌將佢等逐出去，就帶等細人仔个爺𡟓㧯佢三個學生入去細阿妹仔个房間。 41佢牽等細阿妹仔个手，對姖講：「大利沙，古米！」意思就係：「細阿妹仔，𠊎吩咐你，䟘起來！」

42細阿妹仔黏時就䟘起來行。 (姖已經十二歲)。這個事，使大家非常希奇！ 43耶穌嚴嚴吩咐佢等，毋好宣傳這個事情，又交帶拿兜東西給細阿妹仔食。

Currently Selected:

馬可 5: THV12Hdb

Highlight

Copy