馬太 28

耶穌復活

(馬可 16:1-8；路加 24:1-12；約翰 20:1-10)

1安息日過去，禮拜日天曚光个時，抹大拉个馬利亞同另外一個馬利亞共下去看墳墓。 2忽然，發生大地動，因為有主个天使對天頂下來，將石頭徙開，坐在該頂高。 3佢个面貌像𥍉爧，衫像雪恁白。 4該兜衛兵驚到愊愊掣，像嚇到會死个人一樣。

5天使對該兜婦人家講：「毋使驚；𠊎知你等係尋該被人釘十字架个耶穌。 6佢無在這位，照佢所講个，佢已經復活了。你等過來，看安葬佢个所在。 7你等遽遽去㧯厥學生講：『佢已經對死復活了；佢愛比你等先去加利利；在該位，你等會見到佢。』愛記得𠊎㧯你等講个話。」

8該兜婦人家就趕緊離開墳墓，又驚又盡歡喜，走等去愛㧯厥學生講。

9忽然，耶穌堵到姖等，講：「願你等平安！」姖等就進前，揇等佢个腳，拜佢。 10耶穌㧯姖等講：「毋使驚；去㧯𠊎个兄弟講，喊佢等去加利利；在該位，佢等會見到𠊎。」

衛兵个報告

11該兜婦人家去个時節，有兜掌墳墓个兵仔轉城肚去，對祭司長報告所發生个一切事。 12祭司長㧯長老參詳後，拿一大袋錢給兵仔， 13對佢等講：「你等愛恁樣講：『佢該兜學生暗晡時來，在𠊎等睡掉个時將佢个身屍偷走。』 14若係總督聽到這件事，𠊎等會代你等講話，保證你等無事。」

15所以，兵仔就拿該兜錢，照所吩咐佢等个去做。這謠言就流傳在猶太人个中間，直到今晡日。

耶穌差派學生

(馬可 16:14-18；路加 24:36-49；約翰 20:19-23；使徒行傳 1:6-8)

16十一個學生去加利利，到耶穌吩咐佢等去个山頂。 17佢等一見到耶穌，就拜佢；總係還有人疑狐。 18耶穌行過來，對佢等講：「上帝已經將天頂㧯地上所有个權柄賜給𠊎。 19所以，你等愛去全世界，使萬民全部做𠊎个學生，奉父、子、聖靈个名㧯佢等行洗禮， 20教佢等遵守一切𠊎所命令你等个。愛記得！𠊎會常常㧯你等同在，直到世界个末日。」

Currently Selected:

馬太 28: THV12Hdb

Highlight

Copy