馬太 21
21
光榮入耶路撒冷
(馬可 11:1-11；路加 19:28-40；約翰 12:12-19)
1佢等行會到耶路撒冷，到伯法其，在橄欖山，耶穌喊兩個學生先行， 2吩咐佢等講：「你等去頭前个村莊。你等黏時會看到一隻驢仔㧯一隻細驢仔紽共下；將牠兜解開，牽來給𠊎。 3若係有人對你等講麼介，就㧯佢講：『主 #21:3 「主」抑係譯做「牠兜个主人」。愛用牠兜』；該人黏時會准你等牽來。」
4這件事係愛實現先知所講个：
5去㧯鍚安城个子女講：
「看啊，你等个君王來了！
佢盡謙卑騎等驢仔來，
騎等一條細驢仔。」
6兩個學生就照耶穌个話去做。 7佢等將驢仔㧯細驢仔牽來，將自家个衫搭在牠兜个背囊頂，耶穌就騎上去。 8一大群人將自家个衫鋪在路上，也有兜人斬下樹枝，拿來鋪在路上。 9頭前行㧯後背跈个人群大聲喊講：
「和散那！頌讚歸給大衛个子孫！
願上帝賜福給該奉主名來个！
和散那！頌讚歸給至高个上帝！」
10耶穌入耶路撒冷个時，全城就踩起來。有人問講：「這個人到底係麼人？」
11眾人應講：「佢係加利利省拿撒勒个先知耶穌。」
耶穌潔淨聖殿
(馬可 11:15-19；路加 19:45-48；約翰 2:13-22)
12耶穌入去聖殿，將所有在聖殿肚做生理个人逐出去。佢㩳橫換錢个人个桌仔㧯賣月鴿仔个人个凳仔， 13對佢等講：「聖經記載上帝个話講：『𠊎个聖殿愛做祈禱个殿』，你等卻將它變做賊竇！」
14有瞙目个㧯跛腳个來聖殿肚尋耶穌；佢就醫好佢等。 15祭司長㧯經學教師看到耶穌所行个神蹟，又聽到細人仔在聖殿肚喊講：「和散那！頌讚歸給大衛个子孫！」就盡譴。
16佢等問耶穌講：「你聽到佢等喊麼介麼？」
耶穌應講：「𠊎當然有聽到。聖經講：『你使細人仔㧯孲𤘅仔發出美妙个頌讚』這句話，敢講你等無讀過係麼？」
17佢就離開佢等，出城去伯大尼，在該位過夜。
咒詛無花果樹
(馬可 11:12-14，20-24)
18第二日打早，在轉城个路上，耶穌肚飢。 19佢看到路堘有一頭無花果樹，就行前去，總係尋毋到麼介，只有葉仔。佢就對該頭樹仔講：「你永遠毋會再結果子了！」該頭無花果樹黏時就燥掉。
20學生看到這個情形，感覺盡奇怪。佢等問講：「這頭無花果樹樣般會黏時燥掉啊？」
21耶穌應講：「𠊎實在㧯你等講，你等若係有信心，無疑狐，𠊎對這頭無花果樹所做个，你等也做得到。毋單淨恁樣，你等就係對這座山講：『徙開，落海肚去！』也一定會實現。 22只愛有信心，你等祈禱所求个一切全部會得到。」
質問耶穌个權柄
(馬可 11:27-33；路加 20:1-8)
23耶穌入去聖殿，當教示人个時，祭司長㧯民間个長老來見佢，問講：「你靠麼介權柄做這兜事？麼人給你這權柄呢？」
24耶穌應講：「𠊎先問你等一句話，若係你等回答𠊎，𠊎就㧯你等講𠊎靠麼介權柄做這兜事。 25約翰行洗禮个權柄係對㖠位來个？係對上帝抑係對人來个？」
佢等就彼此爭論，講：「若係𠊎等講：『對上帝來个』，佢會講：『恁樣，你等做麼介毋信約翰呢？』 26若係𠊎等講：『對人來个』，驚怕眾人會對付𠊎等，因為佢等攏總相信約翰係先知。」 27對恁樣，佢等應耶穌講：「𠊎等毋知。」
耶穌對佢等講：「恁樣，𠊎也毋㧯你等講𠊎靠麼介權柄做這兜事情。」
兩個孻仔个比喻
28耶穌又講：「你等个意見樣般？某人有兩個孻仔。佢對大个孻仔講：『孻仔啊，你今晡日去葡萄園做事。』 29佢應講：『𠊎毋去。』總係後來佢改變主意，就去。 30該阿爸也對第二個孻仔講共樣个話。第二個孻仔應講：『好，阿爸，𠊎去。』總係佢無去。 31這兩個孻仔到底㖠個遵行阿爸个意思呢？」
佢等應講：「係大个孻仔。」
耶穌講：「𠊎實在㧯你等講，稅棍㧯妓女會比你等先做上帝國个子民。 32因為施洗約翰來，佢指示你等應當行个正路，你等毋相信佢；總係稅棍㧯妓女反轉信佢。你等看到後，還係無改變心意，還係毋相信佢。」
壞佃農个比喻
(馬可 12:1-12；路加 20:9-19)
33耶穌又講：「你等再聽另外一個比喻！有一個園主，開一垤葡萄園，周圍用籬笆圍等，又在園中挖一隻醡酒池，起一座守望台，然後將葡萄園租給佃農，自家出外去旅行。 34收果子个時節會到了，佢派僕人去對該兜佃農收佢應得个果子。 35該兜佃農揪等佢該兜僕人，打傷一個，㓾死一個，又用石頭㧹另外一個。 36園主又派其他个僕人去，人數比先前較多；該兜佃農照樣對付佢等。 37最後，園主派自家个孻仔去。佢心肝想：『最少，佢等乜會尊重𠊎个孻仔。』 38總係該兜佃農看到厥孻仔个時，彼此講：『這人係園主个繼承人；來啊，𠊎等㓾死佢，來佔佢个產業！』 39佢等就揪等佢，將佢㩳出園外，㓾死佢。
40「恁樣，葡萄園个主人來个時，佢會樣般對付該兜佃農呢？」
41佢等應耶穌講：「佢一定會出手滅掉該兜壞人，將葡萄園另外租給該兜照時交果子个佃農。」
42耶穌對佢等講：「聖經个話你等無讀過係麼？
泥水師傅所㧒掉个這垤石頭，
已經成做地基中最重要个 #21:42 「地基中最重要个」抑係譯做「屋棟个拱心石」。。
這係主个作為，
係樣般奇妙个事啊！」
43耶穌又講：「所以，𠊎㧯你等講，上帝愛將佢个國對你等中間搶走，賜給該兜會結果子个外邦人。 44麼人跌在這石頭頂，佢就會粉身碎骨；這石頭跌落麼人个身上，也會將佢磧到糜糜。」#21:44 有兜古卷無這節。
45該兜祭司長㧯法利賽人聽到耶穌講這兜比喻，知佢係指佢等講个， 46就想愛捉佢。總係佢等驚眾人，因為眾人看耶穌係先知。
Currently Selected:
馬太 21: THV12Hdb
Highlight
Share
Copy
Want to have your highlights saved across all your devices? Sign up or sign in
© The Bible Society in Taiwan, 2012
All rights reserved
© 台灣聖經公會版權所有 2012
