利未記 6

1上主向摩西宣佈以下个條例。 2若係有人毋肯還以色列同胞所付个定錢抑係保證金，抑係偷拿別人个東西，抑係剝削別人， 3抑係騙人講東西跌掉，抑係發假誓毋承認有拈到別人跌掉个東西，恁樣來得罪上主，佢一定愛獻贖過失祭。 4若係佢犯以上所列个罪，佢一定愛還佢用毋誠實个方法得到个東西；無論係偷个、係剝削个、係定錢、係拈到个、 5抑係發假誓得來个東西，在查出佢有罪該日，佢全部愛還給原來个主人，還愛加百分之二十。 6為到還所犯个罪，佢一定愛牽一隻無缺點个綿羊牯到祭司該位，做贖過失祭給上主。羊个價值愛照聖所个標準來決定。 7祭司愛在上主面前為佢行贖罪禮，佢所犯个一切過失就得到赦免。

祭司獻燒化祭个條例

8上主命令摩西 9向亞倫㧯佢該兜孻仔宣佈燒化祭个條例。燒化祭愛放在祭壇頂，連暗晡頭也愛透夜俾它𤏸，一直到天光。 10該時，祭司愛著麻紗个長衫㧯褲，將祭壇頂燒化祭个灰收起來，放在祭壇堘。 11接等，佢愛換衫褲，將灰帶到營外禮儀上認定淨浰个地方。 12祭壇頂个火愛一直俾它燒等，做毋得烏掉。逐日朝晨，祭司愛在祭壇頂高放加兜柴，將燒化祭排列在頂高，也愛燒平安祭个油。 13祭壇頂个火愛日夜一直俾它𤏸，做毋得烏掉。

祭司獻素祭个條例

14以下係素祭个條例。亞倫个子孫愛在祭壇前向上主獻素祭。 15祭司愛扡一揢幼麵粉、橄欖油，㧯素祭上所有个乳香放在祭壇頂來燒，代表獻全部給上主做清香个素祭。 16亞倫㧯佢个子孫愛食賸下來个祭物。這兜祭物愛做無酵餅，在聖所，就係在聖帳篷前个庭院食。 17用火燒个祭物當中，上主已經將這部份賜給祭司；這同贖罪祭㧯贖過失祭共樣係至聖个。 18亞倫後代个男人全部做得食這用火燒个祭物，係佢等世世代代應當得个部份。其他个人抑係麼介東西憑到這兜聖物，就會分別為聖 #6:18 「分別為聖」抑係譯做「被神聖个力量傷到」。。

19上主向摩西宣佈 20有關設立亞倫㧯佢个子孫做祭司个條例。祭司受設立該日，佢愛向上主獻一公斤幼麵粉 (㧯逐日獻个素祭平多)，朝晨頭㧯暗晡頭各獻一半。 21麵粉愛攪油，放在淺鑊頭來煏，然後將它擘碎，獻給上主做清香个素祭。 22亞倫族个祭司承接做大祭司个，每一代全部愛獻這種祭。這種祭物愛全部燒獻給上主。 23祭司做个素祭一定愛全部燒掉，做毋得食。

祭司獻贖罪祭个條例

24上主吩咐摩西 25將贖罪祭个條例宣佈給亞倫㧯佢个子孫。愛在上主面前、祭壇北片㓾燒化祭頭牲个地方，㓾贖罪祭个頭牲。這牲儀係至聖个。 26獻贖罪祭个祭司愛在聖个所在，就係聖帳篷个庭院底背，食這獻祭个牲儀。 27其他个人抑係麼介東西憑到這祭肉，全部會分別為聖 #6:27 看 6:18 。。用布料做个所有个東西，若係膏到這牲儀个血，一定愛在聖个所在洗淨。 28煮這種祭肉缶个鑊頭一定愛打碎；若係煮在銅鑊頭肚，愛先拭淨，正用水洗。 29祭司家屬中个所有男人全部做得食這種祭肉；這係至聖个。 30總係，牲儀个血若被人帶入聖帳篷，為到愛在聖所行贖罪个禮儀，這牲儀个肉就做毋得食，一定愛燒掉。

Currently Selected:

利未記 6: THV12Hdb

Highlight

Copy