利未記 5
5
獻贖罪祭个條例
1下背係獻贖罪祭个條例。
若係有人被人喊到法庭做證个時，毋肯將佢所看到、所知个講出來，佢就有罪，一定愛承擔罪个責任。
2若係有人無意中摸到禮儀上認定無淨浰个東西，無論野獸、頭牲、爬蟲个屍體，佢就無淨浰了，佢就算有罪。
3若係有人無意中摸到所有對人身體出來个屙糟東西，無論該係麼介，佢就無淨浰了；佢一發現自家所做个，就算有罪。
4若係有人無意中隨便發誓，無論係好意抑係壞意，也無論在麼介事上隨便發誓，佢一發現自家所做个，就算有罪。
5人有罪，就一定愛認罪。 6佢一定愛為所犯个罪牽一隻綿羊乸抑係山羊乸，獻給上主做贖罪祭。祭司愛為佢个罪行贖罪禮。
7若係有人買毋起一隻羊仔，佢一定愛為所犯个罪帶兩隻班鳩抑係兩隻月鴿仔到上主面前，一隻做贖罪祭，另外一隻做燒化祭。 8佢愛將這兩隻鳥仔帶到祭司該位；祭司愛先獻贖罪祭。佢愛扭斷鳥仔个頸筋，總係毋好將牠个頭扭斷掉， 9然後將一些仔血拂在祭壇堘，賸到个血全部倒在祭壇腳該位。這係贖罪祭。 10接等，佢愛照條例獻另外一隻鳥仔做燒化祭。祭司愛照這方法為這個人所犯个罪獻贖罪祭，佢就得到赦免。
11若係有人買毋起兩隻班鳩抑係兩隻月鴿仔，佢做得為自家所犯个罪獻一公斤个幼麵粉做贖罪祭；總係做毋得加上橄欖油抑係乳香，因為這係贖罪祭，毋係素祭。 12佢愛將幼麵粉帶到祭司該位；祭司愛扡一揢麵粉做代表，放在祭壇頂來燒，做火祭獻給上主。這係贖罪祭。 13祭司愛照這方法為這個人所犯个罪獻贖罪祭，佢就得到赦免。賸到个麵粉愛照素祭个條例歸給祭司。
贖過失祭个條例
14上主向摩西宣佈以下个條例。 15若係有人無意中無將應該歸給上主个聖物獻出來，佢一定愛為所犯个罪牽一隻無缺點个綿羊牯來，獻給上主做贖過失祭。羊个價值愛照聖所个標準決定。 16佢一定愛賠無獻出來个部份，另外還愛加百分之二十。佢愛將這兜交給祭司；祭司愛為佢獻綿羊牯做贖過失祭來代佢贖罪，佢就得到赦免。
17若係有人無意中犯罪，違反上主个禁令，佢就有罪，一定愛承擔罪个責任。 18佢一定愛牽一隻無缺點个綿羊牯到祭司該位做贖過失祭。羊个價值愛照聖所个標準決定。祭司愛為佢無意中所犯个過失行贖罪禮，佢就得到赦免。 19這係為到佢得罪上主所獻个贖過失祭。
Currently Selected:
利未記 5: THV12Hdb
Highlight
Share
Copy
Want to have your highlights saved across all your devices? Sign up or sign in
© The Bible Society in Taiwan, 2012
All rights reserved
© 台灣聖經公會版權所有 2012
