約翰 19

1所以，彼拉多下令鞭打耶穌。 2兵仔用竻仔編一頂冕旒，戴在佢个頭那頂，又㧯佢著紫色个長袍。 3佢等進前對佢講：「猶太人个王萬歲！」然後用巴掌乸搧佢。

4 彼拉多又出來對眾人講：「你等看，𠊎帶佢出來到你等面前，俾你等知，𠊎查毋出佢有麼介罪。」 5耶穌就出來，戴等竻仔个冕旒，著等紫色个長袍。彼拉多對佢等講：「看啊，這個人！」

6祭司長㧯聖殿个衛兵一看到耶穌，就大聲喊講：「將佢釘十字架！將佢釘十字架！」

彼拉多對佢等講：「你等自家帶佢去釘十字架。𠊎查毋出佢有麼介罪。」

7 猶太人講：「𠊎等有一條法律，照該條法律，佢係該死个，因為佢自稱係上帝个孻仔。」

8 彼拉多聽到佢等恁樣講，就越驚； 9再倒轉去總督府。

佢問耶穌講：「你到底係對㖠位來个？」總係耶穌無應佢。 10彼拉多對佢講：「你毋應𠊎嗎？你愛知噢，𠊎有權好放你，也有權好將你釘十字架。」

11耶穌講：「若毋係上帝將這權柄交給你，你就無權好判𠊎。所以，將𠊎交給你个人，佢个罪還較重。」

12 彼拉多聽到這個話，越想愛放耶穌。總係猶太人盡喊講：「你若係放佢，就毋係皇帝个朋友！麼人自稱係王，麼人就係皇帝个敵人。」

13 彼拉多聽到佢等恁樣講，就帶等耶穌出來，在「石階」 (希伯來話安到「枷巴他」) 个所在開庭審問 #19:13 「開庭審問」抑係譯做「喊佢坐審判个座位」。。 14該日係𨃟過節个預備日，臨當晝，彼拉多對猶太人講：「看啊，你等个王！」

15佢等就盡喊講：「除掉佢！㓾死佢！將佢釘十字架！」

彼拉多問佢等講：「愛𠊎將你等个王釘十字架嗎？」

祭司長應講：「皇帝正係𠊎等个王！」

16因為恁樣，彼拉多將耶穌交給佢等去釘十字架。

耶穌被人釘十字架

(馬太 27:32-44；馬可 15:21-32；路加 23:26-43)

佢等就將耶穌帶走。 17耶穌出來，擎等自家个十字架，來到名安到「頭那殼个山頭」 (希伯來話安到「各各他」)。 18在該位，佢等將佢釘在十字架頂；另外還釘兩個人，一片一個，耶穌在中央。 19彼拉多又寫一垤牌仔，喊人釘在十字架頂高。該牌仔寫等：「拿撒勒人耶穌，猶太人个王。」 20有盡多猶太人看到這牌仔所寫个，因為耶穌釘十字架个所在離開城無幾遠；這牌仔係用希伯來、拉丁，㧯希臘三種字寫个。 21猶太人个祭司長對彼拉多講：「莫寫『猶太人个王』，愛寫『這人自稱係猶太人个王』。」

22 彼拉多講：「𠊎所寫个，做毋得改！」

23兵仔釘耶穌在十字架頂以後，就將佢个外衫分做四垤，一儕一垤。佢等又拿佢个內衫；這內衫毋係用線合起來个，係歸垤布仔刺成个。 24所以，兵仔彼此商量講：「𠊎等毋好將它扯開；來抽籤仔，看麼人得到。」這應驗聖經所講个：

佢等分𠊎个外衫，

為𠊎个內衫抽籤。

該兜兵仔正經就恁樣做。

25企在耶穌个十字架堘頭个，有耶穌个阿姆㧯厥姆个老妹，還有革羅罷个𡜵娘馬利亞，㧯抹大拉个馬利亞。 26耶穌看到厥姆㧯佢所惜个學生企在塍頭，就對厥姆講：「阿姆 #19:26 「阿姆」原文係「婦人家」。，你看，若孻仔。」

27佢又對該學生講：「你看，若姆。」對該時開始，該學生就接耶穌个阿姆到自家个屋下去住。

耶穌个死

(馬太 27:45-56；馬可 15:33-41；路加 23:44-49)

28耶穌知一切个事已經成就，為到愛應驗聖經个話，就講：「𠊎嘴燥了。」

29在該位，有一隻罐仔，裝等酸葡萄酒；佢等就拿海綿浸酸葡萄酒，䌈在牛膝草个莖頂高，送到厥嘴唇。 30耶穌一下，就講：「完成了！」

跈等，佢个頭那攋下來，就斷氣死掉。

用槍刺耶穌个脇下

31該日係𨃟過節个預備日，第二日个安息日係神聖个大日仔。猶太人个領袖毋愛安息日有身屍留在十字架頂，就要求彼拉多喊人打斷受刑人个腳，將身屍解下來。 32兵仔奉命就去，將該同耶穌共下釘十字架个頭一儕㧯另外一儕个腳打斷。 33佢等行近耶穌，看到佢已經死掉，就無打斷佢个腳。 34總係，有一個兵仔用槍刺佢个脇下，黏時血㧯水就流出來。 35(看到个人就做見證，愛使你等也信。佢知佢所見證个係確實个，因為係佢親眼看到个。) 36因為這兜事愛應驗聖經所講个話：「佢个骨頭連一支也毋會被人打斷。」 37聖經又有一句話講：「佢等愛仰望自家用槍所刺个人。」

耶穌个埋葬

(馬太 27:57-61；馬可 15:42-47；路加 23:50-56)