創世記 27

以撒為雅各祝福

1 以撒年老个時，目珠花花看毋到了；佢喊大孻仔以掃來，講：「𠊎个孻仔啊！」

以掃應講：「𠊎在這！」

2 以撒講：「你看，𠊎已經恁老，毋知還食幾久？ 3你帶弓箭去外背為𠊎打獵， 4照𠊎好食个口味煮好，拿來給𠊎食，然後𠊎愛在吂死以前祝福你。」

5 以撒㧯厥孻仔以掃講話个時，麗百加也聽到。以掃出去打獵个時， 6麗百加就對厥孻仔雅各講：「𠊎聽到若爸對若哥以掃講： 7『你去將野獸帶來，煮好給𠊎食，然後𠊎愛在吂死以前，在上主面前祝福你。』 8𠊎个孻仔啊！你愛注意聽，照𠊎个話去做。 9你到羊群中尋兩隻又肥又嫩个細山羊來，𠊎會照若爸好食个口味煮好。 10你拿去給若爸食，好使佢吂死以前先祝福你。」

11 雅各對厥姆麗百加講：「總係你知吾哥以掃全身生毛，𠊎渾身光滑。 12萬一吾爸摸𠊎，發現𠊎騙佢；𠊎毋單淨得毋到祝福，反轉會為自家帶來咒詛。」

13厥姆應講：「吾孻仔啊！𠊎來承擔咒詛！你照𠊎个話去做，牽山羊來！」

14 雅各就去將山羊牽來，交給厥姆；厥姆就照厥爸好食个口味煮好。 15麗百加又將長子以掃留在屋下最好个衫褲拿出來給細个孻仔雅各著， 16又用山羊皮包佢个雙手㧯頸筋光滑个部份， 17正將煮好个肉㧯餅交給厥孻仔雅各。

18 雅各到厥爸該位，喊講：「阿爸！」

以撒問講：「孻仔！你係㖠個？」

19 雅各對厥爸講：「係你个長子以掃。你吩咐𠊎做个，𠊎做好了！請坐起來，食𠊎為你打來个野味，好祝福𠊎。」

20 以撒講：「孻仔！你樣般恁遽就打到！」

雅各應講：「上主 — 你个上帝俾𠊎當好運！」

21 以撒對雅各講：「孻仔！過來兜仔，俾𠊎摸看啊，你有影係吾孻仔以掃麼？」 22雅各行過去，以撒摸摸，就講：「聲係雅各个聲，手係以掃个手。」 23佢認毋出這係雅各，因為摸起來像以掃个手共樣有毛。佢愛祝福雅各个時， 24又問：「你斷真係吾孻仔以掃嗎？」

雅各應佢講：「係！」

25 以撒講：「孻仔，肉拿過來！𠊎食掉就祝福你。」雅各將肉拿過去俾佢食，又㨮酒俾佢啉。 26以撒對佢講：「孻仔，你行過來唚𠊎！」 27雅各行過去唚佢；佢一鼻到雅各身上衫褲个味，就祝福佢，講：

「吾孻仔身上个香氣

就像上主賜福个土地所發出个香氣。

28願上帝對天頂賜甘露給你，

俾你个土地盡肥，

俾你五榖豐登、新酒滿槽。

29願萬國服事你，

萬民跪拜你。

願你統治所有个兄弟；

願若姆个孻仔跪拜你。

咒詛你个，會受咒詛；

祝福你个，會得到祝福。」

以掃求以撒祝福

30 以撒祝福雅各以後，雅各對厥爸該位出來，堵好厥哥以掃也打獵轉來。 31以掃也將肉煮好，拿到以撒面前，講：「阿爸，請坐起來，食若孻仔為你打來个野味，好祝福𠊎。」

32厥爸以撒問佢講：「你係麼人？」

佢應講：「𠊎係你个長子以掃！」

33 以撒全身愊愊掣問佢：「頭先拿野味給𠊎食个係麼人？你入來以前𠊎已經食了。𠊎已經祝福佢，這個祝福會永遠屬佢。」

34 以掃聽到厥爸个話，非常艱苦，大聲噭，講：「阿爸！求你也愛祝福𠊎！」

35 以撒講：「若老弟先入來騙𠊎，已經將愛給你个祝福搶走。」

36 以掃講：「這係佢第二擺欺騙𠊎，難怪佢个名安到雅各#27:36 「雅各」有「欺騙」个意思。。佢搶走𠊎長子个名份，這下又搶走𠊎个祝福。你敢無留一項祝福給𠊎？」

37 以撒應講：「𠊎已經俾佢做你个主人，俾所有个兄弟服事佢。𠊎也祝福佢，俾佢五榖豐登、新酒滿槽。𠊎个孻仔啊！𠊎還有麼介好給你呢？」

38 以掃還係緊哀求厥爸：「阿爸，你無留半項祝福，係麼？阿爸，求你也祝福𠊎啊！」以掃就大聲噭。

39厥爸以撒應佢講：

「天頂个甘露毋降給你；

盡肥个土地你也無份。

40你愛靠刀劍生活，

愛服事你个老弟；

到你強盛个時，

你會對若頸項

脫掉佢加个軛。」

41 以掃當恨雅各，因為騙走厥爸愛給佢个祝福。以掃心肚想：「吾爸會死了，喪事辦了後，𠊎愛將吾老弟雅各㓾掉。」

42有人將長子以掃个計劃㧯麗百加講，麗百加就喊細个孻仔雅各到姖面前來，講：「你聽𠊎講！若哥以掃愛尋你輸贏，愛㓾死你。 43𠊎个孻仔啊！你愛聽𠊎个話，黏時去哈蘭，去吾哥拉班該位， 44㧯佢共下住一站時間，等若哥以掃个氣消掉。 45等到佢毋記得你對佢所做个事該時，𠊎正派人接你轉來。𠊎樣使一日內失掉兩個孻仔呢？」