出埃及記 26

上主个聖帳篷

(出埃及記 36:8-38)

1「愛用十幅帳幔做聖帳篷 #26:1 「聖帳篷」係所羅門起聖殿以前以色列人敬拜上帝个所在。有兜譯本分做「聖幕」㧯「會幕」 — 上帝㧯人相會个所在。。這兜帳幔愛用麻紗㧯藍色、紫色、深紅色个肨線來刺，又愛用幼秀个手工繡基路伯个圖案。 2每一幅大細相同，長十二公尺，闊兩公尺。 3愛將五幅攣共下，成做一組，另外五幅也係恁樣。 4每一組帳幔个最尾一幅邊愛攣藍色个紐襻。 5愛將五十隻紐襻攣在第一組个頭幅，另外五十個紐襻攣在第二組个最尾一幅。 6愛造五十隻金鉤仔，將兩組帳幔連共下，成做歸垤帳篷。

7「愛用山羊毛刺十一幅帳幔來做聖帳篷个篷頂。 8每一幅大細相同，長十三公尺，闊兩公尺。 9愛將五幅攣共下，成做一組，其他六幅另外做一組。愛將第六幅摺做兩層，縋在聖帳篷个正面。 10第一組帳幔最尾一幅个邊愛攣五十個紐襻，另外一組个邊也愛攣五十個紐襻。 11愛做五十隻銅鉤仔，鉤等紐襻，將兩組帳幔連起來，成做歸垤篷頂。 12愛將賸到个半幅縋在聖帳篷个後背。 13兩片帳幔賸下个五十公分縋在聖帳篷个兩片，將聖帳篷遮好。

14「愛再造兩垤篷頂，一垤用染紅个羊牯皮做个，另外一垤用盡靚个皮料，做最外層个頂蓋。

15「愛用金合歡木造搭聖帳篷个骨架。 16逐支骨架高四公尺，闊六十六公分， 17各有兩個榫頭，用來連接骨架。所有个骨架全部有這榫頭。 18愛在聖帳篷个南片做二十支骨架， 19架底有四十隻銀座，逐支骨架有兩隻銀座來固定。 20聖帳篷个北片也愛有二十支骨架， 21㧯四十隻銀座，逐支骨架底下兩隻銀座。 22愛在聖帳篷个後背，就係篷个西片，造六支骨架； 23兩頭兩隻轉角愛加兩支骨架， 24轉角兩支骨架个下背相連接，一直連到頂頭，成做一隻轉角；兩隻轉角个兩支骨架全部係恁樣連做一下。 25一共愛有八支骨架㧯十六隻銀座，每一支骨架底下各有兩隻銀座。

26「愛用金合歡木造十五支橫杠；聖帳篷一片个骨架有五支橫杠， 27另外一片五支；篷个後背，就係篷个西片，也有五支。 28中間个橫杠安在骨架半中央，愛對篷个這頭通到另外該頭。 29愛用金包等骨架，又愛安金圈仔，俾橫杠穿過；橫杠也愛用金包等。 30愛照𠊎在山頂指示你个樣式將聖帳篷立起來。

31「愛用麻紗㧯藍色、紫色、深紅色个肨線來刺一幅帳幔，頂高愛用幼秀个手工繡基路伯个圖案。 32愛將這帳幔掛在四支用金合歡木造成个柱仔頂。柱仔用金包等，柱仔頂有金鉤仔，柱仔安在四隻銀座頂。 33愛將帳幔掛在聖帳篷頂該一列鉤仔，將放兩垤石版个約櫃放在帳幔後背。這帳幔愛將聖所㧯至聖所隔開。 34愛將贖罪个蓋仔安在至聖所內該約櫃頂高， 35將供桌放在至聖所外聖帳篷个北片，將燈臺安在聖帳篷个南片，彼此對等。

36「愛用麻紗㧯藍色、紫色、深紅色个肨線，用繡花个手工，為聖帳篷門口來刺一幅門簾。 37愛用金合歡木為門簾造五支柱仔，用金包等，頂高有金鉤仔；又愛為柱仔鑄造五隻銅座。」

Currently Selected:

出埃及記 26: THV12Hdb

Highlight

Copy