出埃及記 25

為聖所奉獻

(出埃及記 35:4-9)

1上主對摩西講： 2「你愛吩咐以色列人獻禮物給𠊎。所有樂意奉獻給𠊎个禮物，你等就收下來歸給𠊎。 3你等愛接受个禮物係：金、銀、銅； 4藍色、紫色、㧯深紅色个羊毛；麻紗；山羊毛刺个布料； 5染紅个羊牯皮；盡靚个皮料；金合歡木； 6燈油；製造聖油㧯香个原料； 7紅瑪瑙㧯其他寶石，愛拿來鑲在大祭司个以弗得聖服㧯胸牌頂。 8人民愛為𠊎起一座聖所，好俾𠊎住在佢等當中。 9有關這聖帳篷㧯底背所有用品，全部愛照𠊎所指示你个樣式來製造。」

約櫃

(出埃及記 37:1-9)

10「愛用金合歡木造櫃仔，櫃仔長一百一十公分，闊六十六公分，高六十六公分。 11愛用純金將櫃仔个內外全部包等，四面愛鑲齒形金邊。 12愛鑄造四隻穿槓仔用个金圈仔，安在櫃仔个四腳上，一片兩隻。 13愛用金合歡木造兩支槓仔，用金包等， 14拿來穿過櫃仔兩片个金圈仔。 15這兩支槓仔愛常常留在圈仔肚，做毋得挷出來。 16將𠊎愛賜給你寫等誡命个石版放在櫃仔肚。

17「愛用純金造一個櫃仔蓋，就係贖罪蓋，長一百一十公分，闊六十六公分。 18又愛用金仔捶出兩隻基路伯 #25:18 「基路伯」看創世記 3:24 。， 19黏在蓋仔頂，一頭一隻，成做蓋仔个一部份。 20兩隻基路伯面對面，打開翼胛，遮等櫃仔蓋。 21將𠊎愛賜給你寫等誡命个石版放在櫃仔肚，然後將蓋仔揜在櫃仔頂高。 22𠊎愛在該位㧯你相會，也愛在蓋仔頂高，對兩隻基路伯中間，將𠊎為以色列人民立个法律全部傳給你。」

供桌

(出埃及記 37:10-16)

23「愛用金合歡木造一張桌仔，長八十八公分，闊四十四公分，高六十六公分。 24愛用純金來包等，並愛在四面鑲齒形金邊。 25桌仔个周圍愛加七十五公釐闊个框仔，框仔愛鑲齒形金邊。 26愛鑄造四隻用來扛个金圈仔，安在桌仔四角个腳頂。 27安金圈仔愛偎近框仔，俾扛桌仔个槓仔穿過去。 28愛用金合歡木造兩支槓仔，用金包等。 29愛用純金造桌頂个盤仔、碗，㧯敬神用个酒壺㧯酒杯。 30桌仔愛放在約櫃前，桌頂常常擺等獻給𠊎个供餅。」

燈臺

(出埃及記 37:17-24)

31「愛用純金造一座燈臺。燈座㧯柱仔愛用金仔打造；裝飾个花蕊、花托、花瓣，全部愛捶到一垤連共下。 32燈臺兩片伸出六支枝仔，一片三支。 33逐支枝仔有三蕊花，形狀像杏花，有花托㧯花瓣。 34燈臺个柱仔有四蕊花，形狀像杏花，有花托㧯花瓣。 35三對枝仔个每一對下背有一個花托。 36花托、枝仔㧯燈臺，全部愛用歸垤純金打出來个。 37愛為燈臺造七盞燈，燈盞愛俾燈火向頭前照。 38愛用純金造燈花剪刀㧯燈盤。 39愛用三十五公斤个純金造燈臺㧯所有用品。 40愛注意照𠊎在山頂指示你个樣式去造。」

Currently Selected:

出埃及記 25: THV12Hdb

Highlight

Copy