出埃及記 14
14
過紅海
1上主對摩西講： 2「你去㧯以色列人講愛斡轉頭，在密奪㧯紅海中間个海滣，接近巴力‧洗分个比‧哈希錄頭前安營。 3埃及王會恅到以色列人在該位迷路，被沙漠困到了。 4𠊎愛使佢心硬，出來逐你等。該時𠊎愛打贏埃及王㧯佢个軍隊，來得到榮光；埃及人就會知𠊎係上主。」以色列人照所吩咐个去做。
5 埃及王聽到報告，知以色列人已經走掉了，佢㧯佢个官員就改變心意，講：「𠊎等做麼介恁戇呢？𠊎等俾以色列人走掉，失掉一群奴才！」 6所以埃及王預備佢个戰車，召集軍隊， 7帶埃及所有个戰車出發，包含六百輛特選个戰車，有軍官指揮。 8上主使埃及王心硬，佢就出來逐以色列人，因為以色列人當大膽離開埃及。 9埃及个軍隊，有戰馬、戰車、㧯騎兵，在紅海附近安營个地方逐到佢等；該地方靠近比‧哈希錄㧯巴力‧洗分。
10 以色列人一看到埃及王㧯佢个軍隊會逐到佢等，非常著驚，就求上主救命。 11佢等對摩西講：「敢講𠊎等在埃及無塚埔，所以你將𠊎等帶到曠野來送死係麼？你將𠊎等𢱋出埃及做麼介？ 12在埃及，𠊎等敢毋係喊你莫搭𠊎等，由在𠊎等做埃及人个奴才。做埃及人个奴才總比死在曠野較好！」
13 摩西應講：「毋使驚！愛企穩。今晡日你等會看到上主樣般救你等！你等永遠毋會再看到這兜埃及人了。 14上主愛為你等相㓾；你等恬恬，莫出聲。」
15上主對摩西講：「你做麼介求喊𠊎呢？你吩咐以色列人向前行就好。 16擎起你个柺棍仔，向海伸出去。海水會分開，以色列人就會在海肚个燥地行過去。 17𠊎愛使埃及人心硬，所以佢等會落去海肚來逐你等。總係𠊎愛贏過埃及王、佢个軍隊、戰車、㧯騎兵，來得到榮光。 18𠊎打贏佢等个時，埃及人就會知𠊎係上主。」
19上帝个天使先前在以色列大隊个頭前行，這下轉到後背去；雲柱也徙到後背去， 20隔開埃及人㧯以色列人。雲使埃及人陷入烏暗中，總係有光照等以色列人，所以兩方軍隊歸暗晡無法接近。
21 摩西个手向海一伸出，上主就差當強个東風，將海水吹開。強風歸暗晡盡吹，吹到海底變燥地。海水分開， 22以色列人就行燥地過海；海水在佢等兩片像係兩扇牆。 23埃及人逐佢等，國王所有个戰馬、戰車、㧯騎兵全部跈等落海肚去。 24臨天光个時，上主對火柱㧯雲柱當中看下來，就使埃及个軍隊混亂。 25佢使埃及戰車个輪仔落到泥塥肚，毋會挺動。埃及人講：「上主幫助以色列人攻打𫣆等。𫣆等遽遽走噢！」
26上主對摩西講：「向海伸手，使海水合起來，浸掉埃及人㧯佢等个戰車、騎兵。」 27摩西就向海伸手；天光个時，海水就流倒轉去。埃及人想愛對水肚逃命，總係上主將佢等逐轉海肚去。 28海水恢復到原來恁樣，浸掉所有逐以色列人个戰車、騎兵、㧯埃及王个部隊；一個也無留。 29總係以色列人行燥地過海；海水在佢等兩片像係兩扇牆。
30該日，上主對埃及人手中拯救以色列人；以色列人看到埃及人个身屍滿海滣。 31以色列人看到上主樣般用大能个手打贏埃及人，就敬畏上主，相信佢，也信任佢个僕人摩西。
Currently Selected:
出埃及記 14: THV12Hdb
Highlight
Share
Copy
Want to have your highlights saved across all your devices? Sign up or sign in
© The Bible Society in Taiwan, 2012
All rights reserved
© 台灣聖經公會版權所有 2012
